【宜蘭親子遊】羅東小築 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

試玩日期:2017-04-28
【宜蘭親子遊】羅東小築

出外旅行,幾乎每一次都係住酒店。今次一於改改一貫作風,入住民宿,體驗一下當地人文風情。宜蘭嘅民宿十分之多,每一間都各具特色,各擁愛戴。在機緣巧合之下,我哋揀選咗溫情洋溢嘅羅東小築。為我哋充實緊密嘅行程中,帶來輕鬆悠閒嘅時光呀!
未住過民宿嘅朋友,可能會想像民宿都係一啲陳舊、簡陋嘅小屋。但其實宜蘭嘅民宿,大多數都好新淨企理,裝修得好靚嘅別墅嚟㗎!


好悠閒自在呀!去旅行就係想搵呢份感覺喇!


後園有一大片綠油油嘅稻田,一望無際,心情頓時輕鬆起嚟!感覺好舒服喔~


上層有露台嘅一間,就係我哋將會入住嘅「恰恰賽車四人房」喇!好心急!馬上上去睇下囉!


踏入民宿,木板堆砌而成嘅服務台,好有大自然風味~


一入屋已經有玩具恭候,晴朗又點會唔開心丫?呢啲就係親子民宿嘅魔力喇!


木味濃厚,客廳裝修得好骨子。四四方方嘅舒適梳化加上軟棉棉嘅座墊,好有「家」的感覺~


客廳嘅角落原來埋藏咗一套兒童專用枱櫈,好可愛呀!


推過小熊維尼嘅趟門,就會到達我哋嘅樓層喇!


相信睇過《反斗車王》嘅小朋友,都唔會對麥坤感到陌生。成間房都係麥坤& friends,就好似走進卡通世界一樣呀!*o*


閣樓有一張車車設計嘅兒童床,仲有埋滑梯,睇嚟玩滑梯都可以玩成晚喇!~ XD


迷你麥坤梳化,特別為小朋友而設。旁邊嘅雙人床,又大又舒服,攤咗上去就唔願郁喇!


通過滑梯底部,可以到達另一張兒童床。床上有一個類似馬戲團嘅帳篷,朗朗話:「坐響呢度,落雨都唔怕啦!」~ XD


窗台擺滿咗車車玩具,好明顯呢間房係為男孩子而設嘅啦!


又唔可以咁講,原來女孩子都一樣玩得咁開心!


咦!仲可以變身做超人添喎!小朋友快啲過嚟換衫啦!


但晴朗正忙着不停上上落落,一時瀡滑梯,一時由滑梯上放玩具落嚟!嘻嘻哈哈!冇時停~


感受完房間嘅設施,不如出去玩車車囉!無論係電動定係腳動,都一樣咁好玩呀!


不過玩車車設有時間限制,想玩就要趁早喇!


晴朗想起客廳啲玩具,就急急腳落咗去喇!精力十足呀!


首先騎馬仔,然後一齊玩搖搖板,再去玩埋煮飯仔。我呢個媽媽可以懶洋洋咁攤響梳化,咩都唔駛做。如果日日係咁你話幾好呢?XD


玩個夠又番上房繼續玩玩具,不停玩玩玩,做小朋友真開心!


差唔多時候要刷牙洗面沖白白,廁所都幾乾淨企理,設計亦有點古典味~


浴室有個大浴缸,拉埋趟門,鍾意浸浴定係淋浴都得!


沖完白白,臨瞓前上晒閣樓繼續計玩樂,玩多陣先肯瞓呀!

不過機程加車程,舟車勞頓之下,大家都攰喇!唔駛一陣就已經瞓到冧冧豬lu~


朝早先發現原來天花板有個小天窗,柔和嘅自然光透入嚟嘅感覺好舒服呀!


打開窗簾,已經被外面嘅鄉野風情早深深吸引住,馬上出去吸一口新鮮空氣囉!


廣闊嘅視野,稻苗排列得整整齊齊。感覺就好似去咗世外桃園一樣,無拘無束~

趁晴朗未起身,出去逛逛,細味欣賞民宿嘅每個角落先~


房間門外擺放咗巴黎鐵塔同一啲小擺設,「家」的味道十分濃厚~


原來小熊維尼趟門背後,係一幅咁可愛嘅機械人城巿。男款女款都有齊,好細心!


門後有一個茶水間,可以隨時添水或使用雪櫃,設備都好齊全喎!


地上特別開咗幾個癃,設計有創意又有心機!不過畏高嘅朋友就要注意喇!


河花池嘅玻璃地板好迫真,啲錦鯉生動得好似真係在水中游梗水咁呀!


房間對出有個大露台,大到可以玩電動車,等我帶大家出去睇下啦!


坐響座椅上欣賞美麗風景,好寫意呀!


屋與屋之間距離好遠,呢個就係地方大,人口少嘅好處喇!


沿住樓梯逐層落去,周圍都可以見到特色小擺設~


就連樓梯間都用心佈置,可見屋主都花咗唔少心思!


你估下牌匾上所寫嘅係「我怕太太」定係「太太怕我」呢?好有趣!XD


冇諗過雀籠都可以變為燈罩,十分有創意!


望住希臘藍色小屋嘅掛畫,好有旅遊feel,好relax~


再落一層嘅共用空間有個小客廳~


好多圖書喎!可以攤響呢張梳化度同小朋友一齊閱讀,好溫馨啊!


抬頭一看,平凡嘅紅色吊燈,只要在天花板上加一點心思就變得不再平凡~


下一站係巴黎鐵塔,屋子裡注滿異國風情,相信屋主都同我哋一樣喜愛旅遊呀!


唔同嘅掛畫,加上唔同嘅得意小擺設,整間屋都充斥着幸福嘅感覺~


飯廳嘅傢具亦係以木為主,住響呢度就好似同大自然拉近咗關係咁呀!


飯廳嘅右手邊係大門口~


而左手邊係一個又大又齊全嘅廚房~


差不多每一層都設有茶水間,咁就去到邊一層都唔會感到口渴啦!


早餐時間快到,一講到食就精神㗎喇!快啲去睇下民宿為我哋預備咗咩嘢食先~


嘩!原來係自助餐呀!十分驚喜!


有白粥~


加埋配菜更美味!


粟米湯~


唔同款式嘅熱盤~


水果有菠蘿同茂谷柑,都係台灣嘅特產~


飲品有冷熱豆漿、冰紅茶同鮮奶。任君選擇!


晴晴將兒童餐盒放進滿滿的食物,好豐富呀!*o*


見到晴朗嘅笑容,就知道幾咁滿意啦!叉足電,食飽飽,又可以去玩過囉!


平時嘅早餐習慣食好少,但呢度款式咁多,實在係忍唔到口呀!


原來仲有幾款麵包,可以用焗爐或多士爐烘番熱~


不同醬料,啱晒不同口味嘅客人啦!


我就鍾意花生醬,另外兩款麵包都好味喎!有水準!


豐富嘅早餐,為我哋精彩嘅一天揭開序幕。響咁舒服嘅環境之下嘆早餐,好正呀!


食飽飽,晴朗又發現新玩意!發揮小宇宙,畫出無限創意~


晴朗二人都展翅高飛,唔知係咪代表咗呢度自由自在、無拘無束嘅生活呢?^^


番上房執行李嘅時候,被窗外嘅風景再一次吸引住~


好鍾意呢一片風景如畫嘅地方~


臨走,屋主仲為晴朗送上小禮物添!好窩心!謝謝您們喔~

在羅東小築嘅時間,過得好悠閒自在、輕鬆寫意。冇選擇錯!去旅行就係想搵呢種感覺喇!晴朗最鍾意係呢度啲車車同玩具,而我就喜歡呢度嘅環境、佈置同埋令我哋十分驚喜嘅早餐。早餐期間,見到屋主一家人分工合作,用心為客人做出豐富美味嘅食物。真係食得出佢哋果份認真同心機㗎!老闆亦都介紹咗好多附近景點嘅資料畀我哋,傾得好開心!響體驗當地人生活嘅同時,亦深深感受到果份真摯嘅人情味。雖然民宿冇華麗嘅裝修,亦都冇昂貴嘅傢俬,但有嘅係最真、最親切嘅服務。感謝羅東小築為我哋帶來珍貴、難忘嘅回憶!到而家都仲好記得佢哋燦爛嘅笑容!想見識宜蘭人嘅生活,入住民宿絕對係最佳選擇呀!


羅東小築
地址:269宜蘭縣冬山鄉安農二路156號
電話:0913-876872 李小姐, 0939-319292 劉先生
網址:http://www.luo-dong-villas.com
facebook: https://www.facebook.com/pg/羅東小築-195683947170783


FIND US on:
     

BLOGs:

CONTACT US:



晴朗媽媽
Editor's Pick