Wildfire新出好狠辣薄餅！秘製指天椒醬汁辣到流鼻水！ - 品味新聞 | CLASSES 香港學習資訊平台

每個人身邊都有啲好食得辣嘅朋友，佢哋無辣不歡，無辣不愛……10小辣點滿足到我哋呢班辣友呀！小編搵到呢隻「好狠辣」Pizza，辣到上鼻窿呀！難得佢毫不留情咁豪撒辣椒，小編一於帶大家睇吓佢又幾勁抽！
 

 
Wildfire pizzabar & grill為無辣不歡嘅朋友精心泡製出「好狠辣」薄餅及4款火辣小食，務必辣到各位㷫熻熻。唔食得辣嘅朋友一樣可以報到，只因Wildfire推出埋解辣精選，用3款「Corona Beerita」特飲解救味蕾！逐樣睇吓抵唔抵食先！
 
「好狠辣」薄餅


 
一聽個朵就知辣味十足！香脆嘅薄餅底上，搽滿咗特製嘅醬汁，呢種醬汁以指天椒、香茅、檸檬葉、薑、香蒜等勁辣食材特製，小編覺得火爆程度絕對超標！唔會淨係得個辣字咁dry掛？原來呢個Pizza嘅配料一樣夠殺食！鋪上入口即融嘅美國牛腹肉、熱溶嘅蒙紗里拉芝士，再加埋香甜多汁嘅芒果，酸甜香辣乜都有，一試就停唔到口，就算再辣都要繼續食呀！
 
4款火辣小食
 
除咗辣到飛起嘅薄餅，Wildfire還炮製咗4款具異國風情嘅火辣小食！充滿中東香料辛辣味嘅特色香草雞肉串燒（HK$198），伴埋葡萄葉包番茄飯，淋上椰香味濃嘅辣汁……嗚呀好醒胃，辣味冇得頂呀！
 


至於美國經典嘅水牛城雞翼（HK$98），以酸辣醬汁調味，沾上濃醇嘅藍芝士醬，香口惹味又creamy。

 

而炸魚墨西哥捲餅（HK$88），香脆嘅捲餅夾着大塊魚肉、牛油果醬、酸忌廉等配料，以微辣帶出番茄洋蔥碎粒嘅清爽甜味。


 
燒青芥辣雞沙律夠抵食，兩個人份量都係HK$128，雖有清新酸甜嘅香橙、青瓜、芒果莎莎、柚子汁等，但千其唔好唔記得佢仲有嗆鼻辛辣嘅青芥辣，後勁十足呀！
 

 
解辣Corona Beerita



解解辣，三種口味絕對是滅火必備！倒轉嘅Corona啤酒直插在Wildfire今季全新嘅鮮果沙冰，單飲一支又得，一齊飲2公升嘅三支裝極速降温亦得。小編覺得叫1支已經要HK$88，但叫埋3支先HK$198，多人去就梗係3支抵玩啦！


 
要阻止1級火火勢蔓延，就有清爽怡人嘅「綠」，以蘋果、青蘋果、青檸、薄荷等材料特調；而以香蕉、菠蘿及熱情果為主軸，味道酸甜嘅「黃」足夠為5級火降温；以士多啤梨、西瓜、紅莓等調配嘅「紅」可以解救10級口腔火災指數！
 
現凡上傳「好狠辣」薄餅嘅照片，再於Wildfire嘅Facebook或在Instagram簽到，即可免費獲贈堂食Mövenpick雪糕1球。快啲約埋幾個火辣辣隊友，去Wildfire挑戰「好狠辣」美食，享受非一般辣勁！
 
Wildfire pizzabar & grill店鋪資料
FASHION WALK
銅鑼灣Fashion Walk百德新街59-65號
電話：2352 0198
 
SOHO EAST蘇豪東
西灣河鯉景灣太康街45號
電話：2261 2999
 
山頂
山頂道128號凌霄閣102號
電話：2849 5123
 
諾士佛臺
九龍尖沙咀諾士佛臺2 號
電話：3690 1598
 
相關文章：
食得辣中辣各國辣椒醬大比拼

EDITED BY CLASSES