3000蚊月租宿舍大玩共居生活！連天台同會議室都可以Share！ - 品味新聞 | CLASSES 香港學習資訊平台

一切都係土地問題！樓價狂升，政府短時間內都未解決到問題嘅時候，民間就有自發組織Synergy推廣居住共享生活，打造兩棟共享居住空間，名都改好啦，就叫「書匯」（The library - Bibliotheque）。一齊睇吓3000蚊起嘅宿舍可以點做到開心Share！


 
建築項目團隊Synergy深信「生活就是分享」，而共居呢個概念，正正係指一套由個人同共享空間組成嘅生活模式。住客透過共同分享空間、資源，一方面可以減低租金和日常開支，另一方面亦會促進人與人之間嘅交流，不斷互相學習，拓展人際網絡。
 

兩棟共享居住空間分別位於登打士街及東安街，主要由三座五層樓高嘅唐樓組成，一共提供166個宿位。書匯提供應有盡有嘅起居設施，住客可以使用每層唔同主題嘅共用空間，以及全天開放嘅天台花園，想休息又得，聯誼亦得！仲會有專人管理，協助大家處理日常生活事務。



宿舍內設施包括基本傢俱、廚房連煮食設施，當然唔少得WIFI上網！服務方面，有24小時專人管理宿舍，仲有清潔服務添！
 
大家仲記唔記得小編早前介紹過政府新興建嘅青年宿舍？
重溫：大伏還是大著數？大埔青年宿舍月租只需2500蚊！
 
未來九月落成嘅「書匯」同之前講嘅政府青年宿舍一樣，都是以過渡居住（transition living）為要旨，但就唔會學政府咁，強制性只俾大家住五年。
 


房租亦已經暫時有定價，雙人房3千蚊起，單人房4000蚊起，而每層只有一間嘅大單人房就要5千蚊起。因為係唐樓改建，所以冇電梯供應，而租價都會因應樓層高矮而調整，當然係樓層愈高，租金愈低啦！



依家Synergy誠徵緊不同主題嘅書籍，包括設計、建築、烹飪、生活風格、攝影、電影、旅遊和文化。收集所得嘅書本，會設置於書匯，等住客可以閱讀交流。如果大家想知詳情，就打電話去3974 5705 或電郵至info@synergypm.org啦！
 
（資料及圖片來源：co-living.hk）

相關文章：
夏天奪目野餐必備！文青書一秒變型格摺凳

EDITED BY CLASSES