2017台灣牛肉麵節又到啦！同場仲有蘇打綠小威個人攝影展！ - 品味新聞 | CLASSES 香港學習資訊平台

2017年咁少紅日，想去個旅行都度住度住！好想去一轉台灣呀！咦？原來2017年台灣牛肉麵節就快開始啦！難得一見嘅正宗台灣風味旋風式登陸香港，真係全部都係台灣寶島好出名嘅餐廳，由當地主廚來港煮俾大家食！一齊睇吓台灣人有咩至愛先～～
 
今年台灣牛肉麵節會於7月1號至2號舉行，只有兩日咋，想去食好西嘅朋友記得mark低時間去荷里活廣場大食特食！
 
每年台灣牛肉麵節都唔係浪得虛名，會有專人精心搜羅最令人垂涎嘅牛肉麵名家，誠邀主廚們來港親手炮製「台北國際牛肉麵節」得獎作品架！一齊睇吓小編推介邊幾間啦～
 
1.      皇家傳承牛肉麵：紅燒冠軍牛肉麵


 
紅燒冠軍牛肉麵湯底用新鮮牛大骨加埋秘製紅燒醬料，熬足三日！加埋一隻牛只有四舊嘅牛腱子心同牛肋條，口感同肉香都係滿分！小編最怕湯頭太膩，但佢絕對唔會有咁嘅感覺，4個字，簡約不凡！
 
2.      洪師父牛肉麵：獨當一麵牛肉麵


 
「獨當一麵」用咗肌肉腱子心與脂肪分布最均勻嘅牛小排製成。師父會將腱子心切開，再洪師父特製醬料，燉足兩小時，嗚呀！牛肉吸滿醬香，好甜呀！最巧妙嘅係師父會用炙燒噴槍將牛小排表面油花高溫燒烤，勁正呀！
 
3.      蘭岳坊麵食館：腱心牛排麵
 

 
蘭岳坊一樣係用頂級牛腱心，但小編最特別嘅係豆瓣醬！湯頭慢熬一天一夜而成，成粒腱心煮好先會分切，口感勁似六成熟牛扒～～仲有佢嘅刀削麵一樣唔惹少，值得一試！
 
4.      牛也：真情牛肉麵



知唔合牛三寶係咩？係牛筋、牛肚同牛腱心！真情牛肉麵有齊呢3樣，仲會以崗山出產嘅辣豆瓣燉煮，鍾意香辣嘅朋友千其唔好錯過！
 
5.      老外一品牛肉麵：老外人氣冠軍牛肉麵



你冇估錯，老外真係指外國人呀！老闆David來自伊朗，將伊朗地道嘅香料同燉煮技巧融入台灣牛肉麵，創出獨樹一格嘅風味！秘制香料全部由老闆親自調配，牛大骨湯頭味道層次分明，每一口都帶微辣感！David仲分享獨門心得：牛肉麵唔加酸菜，就會大大提升湯頭嘅醇度。但小編好鍾意酸菜啵……你哋又會點抉擇？
 
6.      新九九牛肉麵：蕃茄紅燒牛肉麵


 
湯頭完全冇味精及人工香料，唔會用茄膏扮鮮茄！師父用勁多時令新鮮蔬果熬湯，連甘蔗同梨都有，湯頭一定好甜呀～～佢最特別係一滴醬油都唔加，但肉香依然濃郁，好考功夫架！新九九選用比一般麵條更闊、更厚、更香嘅北方麵條，有別於一般拉麵架～
 
仲有其他牛肉麵鋪，大家最想試邊款呢？

重頭戲唔止食野！大家係咪好掛住休團中嘅蘇打綠？唔緊要，有機會俾你見到鼓手小威啦！佢會喺6月30日出席台灣牛肉麵節嘅開幕禮。



佢仲喺香港搞咗首個個人攝影展「HALO - GEOMETRY」，用「有節奏嘅影像」凝住台灣人對美食、生活、人情、土地嘅熱愛，帶你停下腳步靜下心，看台灣，看人，看世界。想睇佢嘅作品？快啲約埋一班為食鬼朋友或者蘇打綠粉絲go go go！

相關文章：
【香港好去處】香港都食到！台式平民滋味「蛋餅」！

EDITED BY CLASSES