香港好去處-尋覓北角地道七味 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2015年12月21日
【香港好去處】尋覓北角地道七味
【香港好去處】尋覓北角地道七味
其實港島區真係美食多多,同埋唔一定會好貴。上次去完西環,今次小編就帶大家行去遠少少去北角,雖然冇銅鑼灣咁多連鎖式餐廳,但北角都有好多老字號都好值得大家過海試晒佢架!唔止大家講得最多嘅北角街市熟食中心,其實仲有好多隱世寶藏,不如一齊再尋下寶啦!

1. 德成號:老字號蛋卷
長期堆滿人龍嘅德成號賣嘅只係三款味道嘅蛋卷(原味、牛油味仲有椰汁味),但係就成日好快賣晒,原因好簡單,就係好食、好食同好食,加上老字號咗 30 幾年,同埋佢哋最標榜嘅「每日新鮮製造」,夠晒保證。難怪大家每朝倒塔咁早走黎排。小編都曾經試過原味,又真係非常唔錯,好鬆脆,食落好重蛋味,齒頰留香,蛋卷有幾層,每一層都好平均,厚薄岩岩好,果然名不虛傳。為咗食埋牛油味同埋椰汁味,排就排啦!新年前入定貨送俾親友戚朋都唔錯。(聽講朝早 7 點排定實冇死,如果遲過 9 點真係明日請早喇)


圖片來源:Weronika (Openrice)

德成號
地址:北角渣華道64號地下


2. 梅花村小館:潮州鹵水拼盤
北角七姊妹道有間賣鹵水拼盤好出名嘅老字號 - 梅花村小館開業已有 30 年以上,一盤鹵水拼盤除咗有招牌鹵水鵝之外,仲有基本嘅鹵蛋、墨魚片、紅腸、大腸、豆腐、豬耳、五花腩片,而且仲有新奇嘅海蜇!海蜇肥美爽脆,豬耳、墨魚片好彈牙,鹵水鵝肉唔會太厚,油脂比例恰到好處,食起上黎甘香柔軟,再蘸埋附送嘅蒜蓉醋,口感就更加豐富;其他鹵味亦鹵得非常入味,超過 30 年歷史嘅鎮店滷水汁真係應記一功。每次經過呢度,聞到果陣鹵水味,小編就會忍唔住又會買黎食。


圖片來源:梅花村小館

梅花邨小館
地址:北角七姊妹道8號A地下


3. 利強記:北角雞蛋仔
提起北角,點可以唔提近排好出名,入選埋米芝蓮嘅利強記雞蛋仔?簡直係學生放學後嘅一點甘露呀!離遠已經蛋香噗鼻,等大概 10 分鐘就有得食新鮮出爐熱騰騰嘅雞蛋仔。蛋皮外殼勁脆,入面就軟棉棉,而且蛋漿好足,唔似出面果啲咁空心,好好味,放工食真係填到肚,絕對可以無限 Encore!


圖片來源:SophieT888 (Openrice)

利強記
地址:北角英皇道492號


4. 福元湯圓:芝麻糊湯圓
要試一間中式糖水舖好食與否,嗌一碗芝麻糊就知佢真章,小編食過咁多間,會番轉頭食嘅都只有呢間 - 福元湯圓,點解?因為佢啲芝麻糊真係磨得好幼好滑,芝麻味又夠重,甜度岩岩好,絕對唔會出現漿住一舊嘅情況。再加埋芝麻湯圓,就真係無敵喇!咬開之後,啲芝麻流心瘋狂湧出,澎湃非常,而且比芝麻糊更香濃!雖然店子細細,但係平日夜晚真係極度旺場,據講每日都搓到最少 1000 粒去賣架。


圖片來源:ahiru313 (Openrice)

福元湯圓
地址:北角炮台山福元街7號利都樓地下I-1舖


5. 素食主意:煎釀素食三寶
越來越多人著緊自己嘅健康,所以素食近年都多咗好多 market,呢間開喺北角嘅素食小店,最出名嘅名物反而係煎釀三寶!不過大家可以放心,因為青椒呀、茄子呀同冬菇入面釀嘅係素魚肉,釀好之後,輕輕煎煎,唔會太油膩,加入日式燒汁,味道同質感仲好過平時食開果啲煎釀三寶架,最緊要係健康丫嘛!


圖片來源:irishblue (Openrice)

素食主意
地址:北角電氣道254-280號華凱大廈A座6號舖


6. 潮樂園:蠔仔粥
潮樂園出咗名打冷正,不過佢哋鎮店之寶其實係蠔仔粥!呢款粥係正宗潮州粥,所以米粒分明,粥底比較稀,完全岩晒打冷食多啲餸。蠔仔新鮮好味大大隻,蠔味夠濃郁,加埋啲魚、肉碎同芫茜,真係極度鮮甜!打冷唔叫對唔住自己呀!


圖片來源:VCV (Openrice)

潮樂園
地址:北角和富道84-94號銀煇大廈地下4號舖


7. 東寶小館:南乳炸豬手
戰鬥碗係就係東寶小館最搶眼嘅野,但最吸引到小編嘅都仲係佢哋嘅南乳炸豬手!炸到脆卜卜,真係好似德國咸豬手咁脆,睇落唔油唔肥膩,食落啖啖骨膠原,配埋南乳汁,講起都口水流!


圖片來源:OLC Wong  (Openrice)

東寶小館
地址:北角渣華道99號渣華道市政大廈2樓


睇完北角仲未完架,正所謂區區有食神,我哋仲有好多區仲未試架,記得捕實 CLASSES,下次繼續一齊搵食啦!

睇多啲:
【香港好去處:深入西環】尋找8大必試新舊美食
去韓國汗蒸幕首先你要知道的九件事

Edited by CLASSES




新聞資訊