食生蠔真係可以壯陽或催情 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2016年01月06日
食生蠔真係可以壯陽或催情?
食生蠔真係可以壯陽或催情?
自助餐「回本」生蠔人見人愛,生蠔有好多種,食法亦層出不窮,好食蠔吧開到通晒行,但係小編今次就唔係諗住教大家去邊度「食好蠔」,而係同大家解究一下有關食蠔嘅江湖傳聞。不過生蠔咁好味,相信大家睇完都一定會繼續食!

傳言一:食生蠔有壯陽或催情之效?
10 個有 9 個人都會認為生蠔係男性嘅恩物,壯陽又似乎真係講得通嘅,因為生蠔所含嘅礦物質同牛磺酸對個腎好補架,加上生蠔含有豐富蛋白質,個腎又點會再虧?係唔係壯陽大家應該懂的了。之不過,如果真係要好執著科學根據嘅話,大家就要日食 50 隻先有足夠嘅鋅元素做到大量提升生育能力、性能力同性慾等功效!雖然生蠔所含嘅礦物質同生殖系統嘅健康係有一定關係,但作用其實未去到令人如狼似虎、重振雄風咁誇張,對健康其實都算有啲作用嘅。

傳言二:食生蠔唔好飲埋啲海水!
未開嘅生蠔本身係會有海水喺入面維持生命,好多酒店 buffet 嘅生蠔即開完之後都會因為衛生問題喺你面前用鹽水沖洗過,但係識食嘅一定係食佢嘅原汁原味,亦即是飲埋呢啲海水。一般黎講養蠔嘅水域都係乾淨,而且常見嘅「海洋弧菌」係乾淨嘅水域都係一樣會滋生,水域乾唔乾淨其實真係同海洋弧菌含量全無關係,所以絕對唔洗怕佢會污糟或者會影響健康!海水就係最天然嘅調味劑,咸咸地,大大提高咗生蠔嘅鮮味。但當然呢份美味只能夠留俾有經驗嘅師父或者自己賣蠔番去自己拆啦。

如果想自己學開蠔,可以參考下:

影片來源:Andy Dark (Youtube)

傳言三:生蠔加牛奶有助發育、強化骨骼!
對發育期的青少年而言,蠔同埋牛奶當中豐富嘅鈣質對發育成長同埋牙齒、骨骼有強化作用,兩者一齊食,更加事半功倍!

傳言四:生蠔只在 R 字尾(9-12)的月份才好吃!
正所謂「冬天食法國蠔,夏天食澳洲蠔」,識食嘅一定食「秋冬」蠔,因為寒冷水域生長嘅生蠔肉質會更肥美,夠晒鮮甜多汁!而家運輸發達咗咁多,身處北半球嘅我哋就算夏天食唔到冬天當造嘅歐洲生蠔,你都可以食到南半球嘅補數,亦即係澳洲嘅生蠔,因為我哋夏天咪即係佢哋嘅冬天,加上而家大部份嘅蠔都係人工養殖,產量有保證,要一年四季食好「蠔」,一定零難度!


圖片來源:Bruce Foreman/ cnngo
 
傳言五:生蠔原來係「仔」黎!
生蠔其實得一種性別,就係公,至於佢點繁殖呢?其實佢哋會喺某啲季度會自動變番做雌性,然後撞手神,雌雄各方各自排放出卵子同精子喺海入面,海中受精然後「蠔卵」會秒速變成幼蟲喺水中漂浮,搵一個合適嘅落腳點,例如:海邊石頭,聽落好似好難,但其實而家多咗人工培植呢家野已經易好多喇,大家唔洗愁冇蠔食喇咁就!

傳言六:食生蠔蘸辣醬可以殺菌?
雖然食生蠔點都有啲風險,緊有啲什麼病毒、細菌,例如:海洋弧菌、幽門螺桿菌等,不過我諗大家應該都好少理,照食可也,覺得蘸啲 Tabasco 就自我感覺可以殺到菌,但其實係完全冇科學根據架!反而日本 wasabi 仲大機會殺到菌,不過就唔知 work 唔 work 喇!海洋弧菌無色無味,單憑肉眼、味覺都難睇得出,所以,大家唯有繼續克服呢一點,最多揀番岩個產地,咁風險咪低啲囉!

傳言七:食蠔要配白酒點醬?
普遍食蠔法係一定會先飲一啖白酒,然後狂加檸檬汁同埋 Tabasco 癖腥。但係如果你想試真蠔嘅鮮味,其實最好就係先飲一啖蠔殼上嘅海水,滴兩滴檸檬汁就 ok 喇;如果係第一次食怕腥可以加入紅酒醋汁癖腥,咁就唔會破壞咗個原味。較淡味嘅生蠔最好都係用番茄醬調味,而海水味濃啲嘅就配紅酒醋好啲!白酒同生蠔永遠都係最好嘅朋友,一般生蠔最好用比較乾身或帶有多啲礦物味嘅白酒;而肥美厚肉啲嘅生蠔最好就揀番啲果味同甜味濃啲白酒飲,咁至夠 perfect 池!食完隻蠔,記得飲一啖海水,再飲白酒,果種 After Taste 真係出晒黎架!


圖片來源:look-see-eat.blogspot.com

傳言八:吃生蠔要由淡到濃咁食至好?
其實唔洗講大家都會咁做,但係必須先攪清楚邊個國家嘅蠔會濃味啲,咁先可以比較到同埋排到呢個食蠔次序架嘛!不過通常餐廳嘅生蠔拼盤會一早為你準備好晒,你只要順時針咁食,就可以食到由淡至濃,爽口、清甜、柔滑、飽滿肥大、帶有海水鹹味、強烈礦物味,多種味道層次嘅生蠔。一般黎講,日本、加拿大、美國、南非蠔比較淡味,然後就係英、澳兩國,最重礦物味嘅就會係「蠔中之王」極品法國蠔。


圖片來源:zagat.com

傳言九:濕熱者暫須戒口!
係中醫角度黎講,生蠔好寒涼好毒,如果有皮膚病、敏感、濕疹、生瘡或者濕熱,都係建議唔好食咁多生蠔,信唔信?忍唔忍到?就真係睇下大家嘅定力喇!


圖片來源:oysterfestri.com

下集我哋就再睇埋唔同國家生蠔係味道同外貌上嘅分別啦!等大家可以識揀屬於自己嘅 Mr./ Mrs Oyster!

延伸閱讀:
【去旅行必須知道的事】10個酒店禁忌DOs and DON’Ts
【夠鐘High Tea喇喂】$99帶你平嘆層層Tea Set

Edited by CLASSES




新聞資訊