都市傳聞之呃味蕾大法你試過幾多種 - 品味新聞 | CLASSES 香港學習資訊平台

呃視覺嘅份子料理就聽得多，大家有冇試過呃自己味蕾？每逢糧尾，小編嘅銀包得返幾個散銀……唔想乾啃餅乾？傳聞有好多方法教你呃自己食緊好西！將兩種平民食物撈埋一齊，登登登櫈，即刻搖身一變成為滋味之選！到底係真定假，即管試下！

1.    牛油果+豉油=三文魚


（圖片來源：lafujimama.com）

牛油果再加上食刺食必備嘅壽司豉油……竟然會變成三文魚味！牛油果獨有嘅脂肪質感無疑係模彷緊三文魚嘅肥美，而壽司豉油……咳，梗係用黎呃自己食緊日本野啦，順便掩蓋冇魚味呢個缺點嘛。記得記得要用壽司豉油，小編娘親試過錯用普通生抽，結果……冇好結果。
 
2.    烏龍茶+碳酸飲料=啤酒


（圖片來源：mix.com（左） Coca-cola Company （右））

用啲咩碳酸飲料就隨家喜好，小編自己覺得橙味就唔太溝到啤酒味。而烏龍茶方面，聽講咩牌子都得，最緊要係現成貨，千其唔好買烏龍茶葉嚟沖，否則只會喧賓奪主，記得黃金法則係材料一定要夠平民！
 
3.    布丁+豉油=海膽


（圖片來源：Grape）

呢個傳聞應該係最多人否定嘅一個，小編唔信邪，於是親自操刀。首先，將數滴美極輕輕點落滑嫩嘅布丁上面，再用匙羹勺起一小口。呢個步驟非常重要，記得唔可以多過一個茶匙大小，否則一定會失敗！將佢放入口中慢慢咀嚼，唔……口腔內嘅味覺非常衝擊，香濃嘅布丁味加上淡淡嘅鹹味，簡直……簡直……就係一個平凡布丁，別無其他，完。
 
4.豆腐+乳酪= 芝士蛋糕


（圖片來源：brodandtaylor.com）

小編係唔會講到底食到咩味！點解？因為伏已中！肚已痛！豆腐根本唔可以撈埋乳酪一齊食！！！唔信？嗱，我提左你地架啦！ HEHEE~~~
 
5. 橡皮糖+牛奶= DOMDOM （？！）


（圖片來源： geekologie.com （左） 沪江部落 （右））
 
呢個……係小編係朋友口中聽返黎，我相信絕對係謬論。嗱，牛奶橡皮糖其實通街都係啦，完全唔見有人反映有怪味啵～（自我說服中）仲有呀！Condom即係咩味先！嗯，果然疑點重重，所以小編都係唔（敢）試啦。咩話？不負責任？咁好啦，呢個拯救地球嘅重任就交俾你啦。（拍肩）
 
五個傳說，全部無須烹調，零失敗！至於邪惡度就………大家自己諗啦！哈哈哈……（逃）


相關文章：
邪惡食物是「被邪惡」？其實都有益？

Edited by CLASSES