為食編輯推介-祥興記爆汁皮脆生煎包 - 品味新聞 | CLASSES 香港學習資訊平台

大家仲記唔記得「米芝蓮」嘅「死亡之吻」呀？之前荃灣有間超好味嘅上海生煎包入選咗國際餐飲美食指標《米芝蓮指南香港澳門2016》街頭小食推介之後，唔係住嗰區嘅小編諗住去朝聖，點知未去就聽到消息話因為業主加租同埋租約期滿而要結業……食唔到真係覺得好遺憾，小編一直耿耿於懷……

估唔到，最近就喺尖沙咀巧遇「祥興記」！機會難逢，趁未有好多人知，小編就拿拿試下，係咪真係咁好食！


圖片來源：foodgasmic.hk @IG

去到店外，已經見到有啲師傅喺度即場包生煎包，有啲就係度煎包，煎好就即刻上碟，或者放入外賣盒……真係夠曬新鮮熱辣，即整即食！


圖片來源：littlemsfoodie @IG

生煎包即叫即煎，上檯時熱辣辣，仲冒緊煙。底部煎得焦香，灑上嘅芝麻和蔥花，更令人手指大動。一咬，肉汁湧出！大家食嗰時要小心，否則就會被肉汁燙到，舌頭受罪呢。生煎包皮薄而香脆，汁多而鮮甜！雖然中間嘅肉餡係用半肥瘦豬肉，不過食起嚟又唔覺得好肥膩，中間嘅汁其實係上湯，唔係油，所以小編食得好放心！


圖片來源：foodiehuntxx @IG

點食最好？

小編覺得原汁原味食最好，唔使特別蘸醋、辣椒醬或者其他調味料；蘸咗反而會食唔到湯汁嘅鮮味！大家去食，記得第一個一定要原汁原味食咗先喇！


圖片來源：lukeyl @IG

大家一定好想知到底呢度嘅生煎包有無上海嘅「小楊生煎」咁好味！咁啱小編曾經去過上海 Exchange，係小楊生煎嘅常客，返到嚟香港想食生煎包懷緬下「小楊」，但一直都搵唔到～估唔到今日終於可以喺香港食到同上海「小楊生煎」好似嘅生煎包，搵返喺上海嘆生煎包嘅感覺喇～巧感動！

祥興記上海生煎包
尖沙咀樂道48號地下6A號舖

相關文章：
【香港好去處】尖沙咀10大必試新餐廳
【搵食至上】走遍荃灣尋覓8大特色美食　齊齊食好西！

Edited by CLASSES