唔係叮叮！7仔出現咗自選兩餸飯同車仔麵？ - 品味新聞 | CLASSES 香港學習資訊平台

 
之前7-11已經出咗兩餸飯，依家仲出埋自選，即係可以自己揀食咩餸，真係好似變左舊街市食堂咁，正呀！除左自選兩餸飯，仲有埋外國式車仔麵，一齊睇吓有咩揀先！
 


叫得做自選兩餸飯，當然係自己想食咩就揀咩，小編見現有嘅菜色都幾親民，都係舊街市食堂會見到嘅魚香茄子、粟米班腩等等。睇佢個擺法，都幾似大快活喎！（誤）


 
除左自選兩餸飯，仲多咗車仔麵！除左香港人至愛嘅雞翼，仲有好多其他幾特別嘅菜式，例如泰式香茅魚餅、越南扎肉、溫泉玉子、日式叉燒，連韓國泡菜都有，唔通係國際車仔麵？唔單止可以自選餸，連湯底都可以自選，最後就要揀埋麵底，拉麵、烏冬、米線都有，小編覺得一定要試韓國水晶粉！今日lunch，你想點搭配？


 
下午茶同同事一齊食個tea係何其幸福～～小編搵到7-11依家除左有地道嘅魚蛋燒賣之外，仲多咗個下午香腸拼盤，送埋啤酒一流！價值30蚊，大家覺得抵唔抵玩？



如果鍾意鬆餅糕點，仲可以揀埋勁多款式嘅Fresh Buns，好正呀！
 

 
目前只有金鐘力寶中心嘅7-11概念店先有，呢間7仔大到無倫，成間coffee shop咁，好舒服。而且大部份野食都唔算貴，個樣夠哂吸引，至於味道…就要試哂先知啦！想間間７仔都有咁豐富嘅野食，就要去支持吓啦～
 
【小編講兩句】好玩係好玩，但只有金鐘先有，實在太少地方啦！有冇金鐘嘅朋友報告吓質素如何先？

7-Eleven概念店店舖資料
地址：    金鐘力寶中心1樓2B舖
營業時間：星期一至五：07:00-20:00
星期六：07:00-16:00
星期日及公眾假期：休息

相關文章：
唔使再刷廁所！教你自製超神奇「廁所炸彈」
Hea Hea廢之寶！超爽癮炸蝦睡袋
 

EDITED BY CLASSES