咪再用漂白水!三大奇招教你白衫變黃點搞好! - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2017年03月02日
咪再用漂白水!三大奇招教你白衫變黃點搞好!
咪再用漂白水!三大奇招教你白衫變黃點搞好!

白色衫咁易襯,每個人都梗有幾件!但著左幾次硬係會變黃,點搞好呀……咩話?漂白水?有冇搞錯!知唔知漂白水雖然可以令件衫變白,但就會破壞衣物纖維,令件衫「霉霉dup dup」!真正嘅漂白方法……應該係咁!

1. 菠菜水浸泡法


煲完菠菜嘅湯水都可以做清潔?原來係菠菜入面有生物酶,可以清走白衫上面嘅黃漬,撈起嘅菠菜仲可以食添呀哈哈!記得呢招主要對付因為汗水引起嘅黃漬,因為生物酶只可以溶解蛋白質(汗水內含有蛋白質),而唔係其他污漬!
 
步驟:
1)      先煮熱一煲水,煲熟菠菜,大概煮10分鐘左右。
2)      撈起菠菜,洗完衫就開餐食菠菜宴。(大誤)
3)      將菠菜水浸住白色衣物,約10分鐘。
4)      用力擦有黃漬嘅地方,再浸20分鐘。
5)      用清水洗淨白色衣物,晾乾。
 
2. 雙氧水漂白法


其實雙氧水同漂白水一樣都係氧化劑,但就較為溫和,冇咁易令衣物質地受損。要注意嘅係,雖然雙氧水本身已經經過稀釋,但對漂洗衣衫嚟講仍然太濃,用嘅時候一定要再加水!
 
步驟:
1) 將雙氧水加到一盤水中,比例係3:100。
2) 加入2湯匙梳打粉,攪拌均勻(記得唔好直接用手攪拌)。
3) 將白色衣物完全浸入雙氧水溶液。
4) 擺放一晚,約10小時,用清水洗淨後放於陽光下曝曬至乾。

*大家可先將要漂白嘅衫褲用清水洗濕,再扔落雙氧水溶液入面,咁就可以防止件衫浮起幾個大泡泡,搞到啲衫唔可以完全被雙氧水浸透。
 
3. 鹽溝檸檬曝曬法


檸檬係天然嘅氧化劑,對清潔、漂白一向都有效,而且唔傷皮膚添!但淨係檸檬汁其實唔夠架,唔講唔知,原來再加埋粗鹽先係王道!
 
步驟:
1)     將兩個檸檬份量嘅檸檬汁溝入一湯匙粗鹽,攪至半溶狀態。(其實用粗幼鹽都得,但粗鹽效果最佳~)
2)     將混合物敷喺衣衫泛黃部份上面,敷大概10分鐘。
3)     大力擦洗泛黃部份
4)     再滴少量檸檬汁,敷多5分鐘。
5)     用清水洗淨衣衫,曝曬至乾。
 
相關文章:
唔使再刷廁所!教你自製超神奇「廁所炸彈」

【還我清白!】8招讓白鞋持久潔白
絲襪常常破洞?教你怎樣保養、補救!

EDITED BY CLASSES



新聞資訊