去韓國汗蒸幕首先你要知道的九件事 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2015年12月21日
去韓國汗蒸幕首先你要知道的九件事
去韓國汗蒸幕首先你要知道的九件事
韓風呢家嘢好似永遠都停不了,特別係韓妹嘅造型,香港女士們就更加想學到十足,化妝技巧從來唔係一個問題,反而係佢哋天然嘅好皮膚就真係令人羨慕不已。當小編去過一趟韓國,試過一次「汗蒸幕」就開始明白,唔係因為佢哋整容,只係因為佢哋重視養生,其實絕對唔係誇張,唔止韓劇啲主角,普通韓民久不久都會約埋成班 friend 去汗蒸幕,焗出一身汗,排晒啲毒素出黎,所以咪咁白滑囉!唔好葡萄喇,人哋有付出架。

韓國汗蒸幕又叫蒸氣房﹝JjimJilBang﹞『沾沾班』,簡單黎講就好似焗桑拿咁,走入一間溫度40℃以上嘅蒸氣房入面焗出一身汗,將體內要透過流汗先可以排走嘅重金屬毒素完全迫出體外,然後去浴場沖三溫暖,呢個排毒法真係好 work 架!不過飛去韓國體驗之前,大家真係要做定功課先,事關韓國子民英文認真麻麻,你問佢哋流程隨時可能會變咗做「雞同鴨講」,小編試過出動埋 body language 都唔得掂!所以首先你要…熟讀流程先好去呀!有啲咩係一定要知?不如一齊睇下!

1. 基本流程同設施
首先佢哋會俾你睇價目表,通常分兩個入場時間黎收唔同嘅費用,凌晨5點前入場平幾十蚊港紙,夜晚8點後就貴啲。係櫃檯俾完錢之後,你會2條毛巾、1套短袖運動衫同埋1條放鞋 locker 嘅鎖匙。一般汗蒸幕專門店都有幾層,最底層係男女更衣室連浴場,樓上每層都會有唔同嘅設施,如:大廳、食堂、按摩椅、卡啦OK、睡房等,同埋唔同主題例如:黃土、優質木炭、鹽巴、玉石,唔同溫度嘅蒸氣房。係底層換完果套短袖運動衫就可以是但搵個吉嘅 locker 好啲個人物品,之後拎埋鎖匙(冇記錯應該係條橡筋手帶),不過有啲行家會一早俾定條電子手帶過你,之後買野食、做按摩、美甲、艾草坐浴等額外收費就用黎佢記脹,臨走果陣先一次過計。


圖片來源:news.nate.com

2. 營業時間
全部都係全日開放,所以好多人第一日嘅行程就係佢,半夜落機,最好就係去呢度沖下涼,抖一抖先番酒店 check in!又平又舒服又暖又安全又有行李寄存服務!汗蒸幕店長開暖氣,所以喺任何一個角落都可以歇一歇都唔怕凍親,亦唔需要任何被舖,唔洗怕!因為每個人去到呢度都可以席地而睡,大家入鄉隨俗就可以喇。


圖片來源:tistory.com

3. 開放式更衣室
大家真係要有剥光豬嘅覺悟,就算你齋焗桑拿唔沖涼,你都係要係 locker 面前換衫,因為底層澡堂果度係冇所謂嘅更衣室,但請放心,有分男女嘅!

4. 收費
有啲汗蒸幕係會有埋「搓澡」呢樣野,即係光脫脫咁訓係張床度等「亞珠媽」幫你撤底洗白白同去角質,經過為時20分鐘嘅忍耐(因為真係好痕),啲皮膚就會神級白滑幼嫩番,價錢都只係貴百幾蚊港紙咋!

5. 羊角帽
講起一開始派果2條毛巾,除咗拎黎沖涼之外,其實仲有一件韓國人必做嘅事!冇錯就係將佢摺成 Running Man成日出現係 oppa 頭上面果頂好 kawaii 嘅羊角小帽喇!小編自己一個去韓國試玩汗蒸幕果陣為咗入鄉隨俗,都忍唔住要請教下路人點整呢個!其實有好多網上教學架,大家不妨參詳下。下次可以係朋友面前威威下!

影片來源:Emily Chen(Youtube)


圖片來源:health.chosun.com

6. 食蛋飲甜米露
用朋友個頭扑開隻蛋係大家睇韓劇時最期待嘅畫面,大家必須有「突然被扑頭」呢個覺悟。另外蒸完桑拿應該好熱,除咗食蛋,飲番杯凍冰冰嘅甜米露咁就夠晒透心涼,balance 番。除咗飲燒酒之外,韓國人飲甜米露都飲得好豪邁架!


圖片來源:egloos.com

7. 適應高溫
每間唔同嘅汗蒸室門外都會有提示寫住個溫度同建議停留嘅時間,小編建議大家循序漸進,一步一步黎,由溫度冇咁高的汗蒸室開始坐,唔好坐得太耐,事關真係會暈架!最後記得要去埋「冰屋」(低溫房)過一過冷河,縮一縮毛孔,咁就靚晒、生猛番晒!


圖片來源:news.nate.com

8. 澡堂
澡堂有澡堂嘅規矩,大家記得唔好著衫入去,小編記得好似連毛巾都唔俾帶入,沖完之後,可以係出面拎條新嘅擦乾就去 locker 著番衫(過程好尷尬,小編已經特登唔帶眼鏡入去,但仍然「紅都面晒」。要吹頭嘅話,其實都有吹風機,不過每幾分鐘會 charge 你200韓元,所以大家都要準備定啲散銀,如果唔係就要光脫脫咁跑番去身處好遠嘅 locker …仲要發現自己差 100 …

9. 其他
好多店都唔會提供洗頭水、護髮素、沖涼液等,所以最好自己帶定去,如果唔係就要同其他人共用「公用番梘」架喇,或者唔用囉。另外,記得帶多件替換嘅內衣褲,出咁多汗,你懂的!仲有提提大家唔好貪靚化濃妝同帶 con 入去焗,蒸房咁熱,溶妝事小,眼睛可大可小架!

下次去韓國,大家應該識得點樣帶埋班朋友開心又愉快咁去見識下呢種韓國文化啦!

延伸閱讀:
【世界街頭美食大全】
【聖誕LED燈突襲】日韓聖誕冬日光之慶典

Edited by CLASSES




新聞資訊