升職餅與散水餅！教你派餅四大學問！ - 品味新聞 | CLASSES 香港學習資訊平台

 
無論係散水餅定升職餅，都唔應該馬虎了事！升職固然要請大家食好西，叫大家日後關照關照；辭職更應該好來好去，第日交心嘅同事，好可能再有機會合作，又或者關鍵時刻會幫到你！
 
1.      咪再送老土西餅
 

 
大家可能儲低好多餅券，但無論係升職餅定係散水餅，都唔適合送呢啲食到厭嘅西餅。即使你係專登去買，大家都會覺得你只係拎出屋企陳年餅劵，派埋啲免費野……既然要洗錢，相同價錢下你有更多選擇！
 
2.      烘焙小店更獨特
 

 
依家市面上有好多烘焙小店專門幫人整散水餅，例如mini Bon Bon Cake同Baking Diary by Christy，蛋糕仔超級精美，部份鋪頭仲可以自己設計圖案，寫吓同事名，甚而簡單畫低同事樣，都幾過癮！價錢同一般Cupcake差唔多～想多啲玩味，又想令人覺得更有誠意，不妨考慮吓烘焙小店！
 
3.      迎合同事口味
 

 
唔係話奉承同事，但投其所好對大家都開心嘛！小編最鍾意食光酥餅，有個舊同事Last Day時專登送多件光酥餅俾我，獨家一份，真係窩心死人！另外又有朋友喺地盤入面嘅office返工，無論地盤工人定係office同事都係一大班麻甩佬。我朋友升職時果斷決定唔送cookies，而係叫咗幾個Pizza加1大箱啤酒，大家放工食件芝心批，大啖飲啤酒，爽呀！
 
大家會唔會有同事鍾意印尼撈麵？哈哈，或者可以試吓呢招：
生日Party必備？？竟然可以用印尼撈麵整蛋糕！？

4.      懷舊小食顯獨特
 

 
近排吹起一陣懷舊風，身邊唔少朋友都大玩新意思，升職時都請大家食啲老香港小食，每人一袋禮盒，入面有齊叮叮糖、龍鬚糖同糖蔥餅，收到人人都笑哂口！

咩話？睇到呢到突然想食懷舊小食？即睇：
必試特色雪糕！懷舊利園雪糕節重點推介！

 

 
其實送餅仲有好多玩法，唔一定吓吓都要出動Lady M先叫有誠意！大家仲有咩新鮮諗法，或者收過啲咩最獨特嘅餅？
 
圖片來源：Eatpizzafresca、cathaypacific、bbcfoodrecipe、openrice
 
相關文章：
 握手先定係遞卡片先？職場禮儀你識幾多？
咪再用Best Regards！十大Email結語用法皆不同！

EDITED BY CLASSES