世界街頭美食大全 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2015年12月17日
【世界街頭美食大全】
【世界街頭美食大全】
香港街頭小食大家可能食得多,但係其實呢個世界真係好大,大把好野等住我哋去食!DO 姐之前就帶完我哋去 Shopping,四個反咗面嘅「小生」又帶完我哋去旅行,咁今次就等小編帶大家重新向世界出發搵食,explore 下世上有咩街頭美食係大家一定係要試嘅!人哋話「不到長城非好漢」,計我話,冇試過一個國家最出名嘅街頭小食就真係唔好同人講自己去過喇!

1. 韓國 - 雞蛋糕
講起韓國街頭小食,大家可能會即時諗到亞豬媽街檔「地到貼晒地」嘅魚糕串同魚糕湯。但係原來最紅嘅係…蛋黃哥個 Buddy – 人稱「蛋中蛋」嘅雞蛋糕,呢樣都係小編個韓國朋友講架。去親韓國經過梨大正門附近都會見到總有幾間「快餐車」有賣呢啲雞蛋糕,香噴噴架真係!「蛋中蛋」顧名思義即係真係有隻雞蛋係入面,外面係西多士 mix 粟米包咁嘅樣,入面有原隻雞蛋,仲可以揀流心或者全熟架!外脆內軟,甜中帶咸,好好食!不過據聞得冬天先有得買黎食啊!呢種「好味道」更加係帶到過去台灣,HIT 到連台灣人都誤以為呢種係本土美食,早年《康熙來了》都有講過呢件事。


圖片來源:timetree.zum.com

2. 德國 - 椒鹽捲餅
德國唔係淨係下下得大肉腸或者咸豬手架,有種小食都好出名,就係呢款外型上有啲似蝴蝶結嘅烤包 - 椒鹽捲餅。「烤包」香脆可口但唔會太硬,通常會係包面上灑上粗鹽或糖粉或牛油或者朱古力,德國人仲會加埋甜芥末 (Mustard) 落去食。小編覺得如果加埋德國腸黎食下仲正呀!


圖片來源:Sean Gallup(Pinterest)

3. 英國 - 炸魚薯條
歷史悠久嘅炸魚薯條永遠都係英國人嘅好朋友,大至高級餐廳、酒吧;細至快餐店,甚至有陣時 take away 仲好食呀!歐洲食野真係好貴,唯獨呢個炸薯條,又香口又飽肚,重點係相對其他野食平,所以小編之前去英國旅行一個禮拜都食咗3次,而且覺得越「地」嘅炸魚薯條越好味!做法好簡單,將鱈魚去骨同埋啲薯塊切成條狀,蘸上麵粉落油炸至金黃。雖然係喺世界各地都有得賣呢樣野,但英國嘅炸魚薯條真係寧舍唔同過人,因為佢哋會加麥醋和鹽黎食,加埋他他醬同埋檸檬,味道更豐富有層次。


圖片來源:pixgood.com

4. 日本 - 章魚燒
我諗應該冇人會否定章魚燒(章魚小丸子)係日本街頭美食磅上嘅地位,相信去開日本旅行嘅你點都會食過!雖然香港都有章魚燒,但係自問真係做唔到呢個質素,粉漿、椰菜、海苔碎、沙律醬、柴魚片嘅分量有條岩岩好嘅 formula,章魚大大粒夠咬口,日本人真係有佢嘅獨門配方,令到小丸子更加外脆內軟,令人回味,番到香港都食唔番呢種質素!
 

圖片來源:thisisjapan.asia

5. 法國 - 法式薄餅
法國巴黎街頭轉角成日都會出現賣 Crêpe (法式薄餅)嘅小攤檔,呢種薄餅超級薄,但係就好 crewy 同超鬆軟,蛋香味爆登,一般係用平底鍋上面倒入薄餅漿然後煎香兩邊,加入唔同嘅配料捲埋就食得架喇!有甜食亦有鹹食,小編就比較鐘意加朱古力同榛子醬食,有埋香蕉或者雪糕仲 perfect 「池」!不過呢期興芝士,加埋火腿咁就鹹香美味,岩晒各位「芝心」Fans 啦!


圖片來源:Aaron.Appelle

6. 美國 - 熱狗
睇戲食熱狗是常識吧!係美國食街頭小食首選當然係紅到開行嘅熱狗啦!每年美國都會有一日叫 “National Hot Dog Day”,受美民熱愛嘅程度可想而之了。雖然坊間出現好多改良版,例如:改用芝士腸、香菇、牛肉、魚、香蕉、煙肉,甚至花生醬等做餡,但係個人認為都仲係傳統嘅熱狗最好食,用嘅只係一條法蘭克福腸加埋甜青瓜、洋葱同埋美式芥末醬已經好好味。


圖片來源:Julia Burgi

7. 泰國 - 炒雪糕卷
泰國真係熱到飛起,串燒反而冇咁吸引,望到呢款咁冰涼嘅雪糕卷,相信冇人會抗拒。加埋自己揀嘅生果、topping、朱古力醬、牛奶,即時係冷凍板上面喪炒,睇住啲人炒果下真係超精彩,不如一齊去片睇下有幾勁!

影片來源:Ice manias (Youtube)

8. 越南 - 翠綠卷
外型有啲似釀長辣椒嘅翠綠卷就係越南最出名嘅街頭小食,用蒟醬葉包住足料牛肉碎,獨特嘅蒟醬葉香氣同啖啖爆汁嘅牛肉碎出奇地 match 到爆!


圖片來源:grabyourfork

9. 阿根廷 - 拉丁風味的餡餅 (Empanadas)
拉丁風餡餅可算係阿根廷最家喻戶曉嘅小食,入面嘅餡料可以係牛肉、雞肉、火腿甚至係生果都得,不過識揀一定係揀阿根廷牛肉啦!包好之後外層掃啲蛋黃就可以拎去烤熱,小編已經可以想像到一出爐果陣香味同埋果層黃金脆皮,口水已直流了!


圖片來源:wikiwand.com

10. 捷克 - 麵包卷 (Trdelnik)
捷克街頭經常都會有好大陣牛油飄香,原來係賣緊一款叫 “Trdelnik” 嘅烤麵包卷甜食,排隊嘅人打晒蛇餅,大家怕且都要行近啲先見到呢啲小食亭呢!“Trdelnik” 最特別之處係個製法,佢哋會將麵粉團放係木棍上面繞成幾個圈,然後拎去烤爐烤,之後淋埋糖同埋核桃碎,所以製成品出黎係會呈「通窿」長筒狀,外型相當特別,麵包卷新鮮出爐又香,食落又唔會太甜,難怪咁受歡迎。


圖片來源:LauraW317

要深入了解每一個國家嘅文法同味道,最好就係去食盡佢哋最地道最出名嘅小食,越「地」就越試到佢哋嘅「真味」,唔試過都唔知呢個世界咁大呀!上面嘅例子都只係世界冰山嘅一角,仲有大把好野等住大家去「開心大發現」呀!

延伸閱讀:【香港好去處-深入西環】尋找8大必試新舊美食
【聖誕自助餐大搞新意】令女士們著迷的Le-Cresuset x Mövenpick任食雪糕火鍋

Edited by CLASSES



新聞資訊