【香港好去處】超足料「口爆海膽波」-帶你玩盡港島西盡頭 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2017年01月24日
【香港好去處】超足料「口爆海膽波」 帶你玩盡港島西盡頭
【香港好去處】超足料「口爆海膽波」 帶你玩盡港島西盡頭

之前就同大家介紹過西環美食,不過又點止咁少呢。今次小編就帶你哋行入啲,去港島線嘅西邊盡頭——堅尼地城,尋找更多好去處!
 
重溫:【香港好去處:深入西環】尋找8大必試新舊美食

 
1. 爆Like打卡必到處

愈嚟愈多人鍾意影靚相,之後post上instagram吸Like。而去到堅尼地城,除咗食嘢要影相即post之外,一定要去埋呢個地方影相打卡兼即時Post,一定比你平時嘅post多Like!呢度就係西環嘅域多利道泳棚喇!好多街坊都以為呢個泳棚無咗,其實仲喺度。呢度最特別嘅就係嗰條竹橋。竹橋同大海,加埋上面的樹枝,側面望去,這個構圖實在無法不叫人著迷。很多人特意在一天嘅唔同時份嚟呢度,捕捉唔同嘅景象。單係白天同黃昏,美得已經叫人尖叫,今次一定爆Like啦!
 

圖:lam_heng@IG、manhinchi@IG
 
2. 一次做晒野餐行山睇日落

去堅尼地城都唔怕遠,不如挑戰埋去摩星嶺。去摩星嶺,有人會選擇行山;不過小編唔係行山達人,今次就暫時唔教行山,教你去野餐。唔講你唔知,原來喺摩星嶺食水配水庫上蓋有個摩星嶺配水庫臨時花園,2013年10月開始啟用。嗰度有一大片草地,背山面海,入秋時分仲有芒草,去野餐真係好有Feel!陣陣微風吹過,令人感覺更舒暢!野餐完,落山到達摩星嶺山腳海邊喺域多利道嘅「日落觀瀾亭」(原為銀禧砲台遺址),就可以享受一望無際嘅日落景色喇!
 



圖:spr@IG、vansamilk@IG
 
摩星嶺配水庫臨時花園
到堅尼地城地鐵後轉58號小巴,在摩星嶺道巴士站下車。再沿著摩星嶺徑走,步行約20分鐘便可。
 

更多野餐好地點推介:踏踏青 香港親子野餐好去處】


 
3. 令你一食就上癮嘅小食店!

唔知點解,有時總係有心癮想食一啲煎炸食物,而呢間名叫「罌粟花」(英:Opium Snack Bar)的小食店嘅炸物小食別有洞天,唔係普通嘅炸雞髀薯條魚蛋或煎釀三寶,而係大過乒乓波嘅海膽丸,仲有芝士蟹肉蟹蓋配溫泉蛋同埋鮮蟹肉沙律炸饅頭……更加唔少得嘅就係足料又好味嘅自家製漢堡啦!漢堡夠創新,用港式菠蘿包夾住啖啖蟹肉嘅自家製蟹餅。最吸睛嘅一定係「口爆海膽波」!切開就見到厚厚嘅蝦膠中間釀咗好多海膽,一睇顏色就知好新鮮,據聞話係用日本海膽。炸物最怕外皮厚,呢個唔只薄,而且口感酥脆,蝦膠彈牙,隱約食到有蝦肉,果然真材實料!抵讚!食完真係令人想食幾粒!以前罌粟花令人諗起鴉片,人人避之則吉;宜家,罌粟花小食店,令人無法抗拒呢!


圖:wooshungry@IG、hkfoodiexblogger@IG
 
罌粟花
西環堅尼地城吉席街99號添利閣地下3號舖
FB: https://www.facebook.com/opiumsnackbar/?fref=ts
 
4. 家一般的和風餐廳

你以為呢度係賣日式食品嘅超市就拂袖而去,咁你走寶喇。其實,每日晚飯時間,呢度就會變身成居酒屋,提供甚有日式住家菜風味嘅食物。白天,店主出售由日本訂嚟嘅酒、醬料同米等日常食品;晚上,呢間小型超市就變為店主同一班街坊嘅深夜食堂,一齊「度過」呢個晚餐。店主煮,客人吃,雖然店舖唔大,但勝在可以閒話家常。店內食材來自日本,因此以日本京都鰻入饌嘅鰻魚飯最受歡迎!落重本,價錢($88)又親民,小編撐!
 

圖:33selphie@IG、f.t.h_13@IG
 
萬家廚房
西環堅尼地城卑路乍街124號聯基新樓地下M號舖
FB: https://www.facebook.com/%E8%90%AC%E5%AE%B6-581540871992895/
 
5. 尋找城中最大Pizza!

聽過 Checkmate Pizza未呢?未聽過唔緊要,記住佢有全港最大個嘅Pizza賣就得喇!全港最大即係有幾大?Checkmate Pizza未出現之前,坊間已經有24吋大嘅Pizza,但Checkmate Pizza嘅出品就係30吋!雖然你同我平時都未必會買咁大個Pizza,不過一大班搞聚會,叫到會時就可以考慮下喇。呢度嘅Pizza唔係只有「大」嘅賣點,製作亦好用心。全店有超過10款Pizza,當中有肉有素,只要你唔嫌煩,仲可以自己揀餡料,即叫即整。而本身餐廳亦提供多款26吋Pizza畀客人分件選購,仲可以即時翻熱。為咗迎合港人口味,Pizza嘅餅底一啲都唔厚,入口微脆又有啲煙韌,大大件又餡料!
 

圖:Checkmate Pizza FB
 
Checkmate Pizza
西環堅尼地城新海旁街7-8號地舖
FB: https://www.facebook.com/Checkmate-Pizza-Hong-Kong-1488346518048345/?fref=ts
 
6. 無敵大海景 吹風大嘆fish & chips !

這不是英國,但你很想吃炸魚薯條;這是香港,但你竟然在海傍吹風,享用著炸魚薯條。差不多走到堅尼地城的盡頭,到達海旁街,吸引你注意嘅不只是大海,而是嗰家藍白色裝潢,同周邊建築物「格格不入」叫「Fish & Chick」嘅餐廳。唔知「魚」和「雞」有咩千絲萬縷嘅關係,但知道嗰度嘅名物係炸魚薯條。炸魚大大塊,金黃色嘅炸粉皮唔厚,魚都唔乾又唔腥味,食起嚟啖啖肉又無骨!再加埋厚切嘅粗薯條一齊食,人都開心啲!喺網上之後見到有人post烤雞嘅相,先明白魚同雞嘅關係原來係咁。
 

圖:恩子@OP、panpan_penpen@IG、kimpochi@IG、satoru11@IG
 
Fish & Chick
西環堅尼地城新海旁街25號地下6號舖
FB: https://www.facebook.com/fishandchick/
 
7. 尋找屬於你的那杯fine cup 咖啡

或許你係個咖啡控,也許不是,但嚟到堅尼地城,你不得不去尋找那杯屬於你嘅咖啡。由附近環境到店內裝潢陳設,Fine Cup絕對是一個令人流連忘返嘅悠閒一角。咖啡的選擇多,水滴咖啡和手沖咖啡最吸引。店內亦有出售咖啡豆和咖啡包,方便一班咖啡喜愛者回家DIY嘆咖啡。想喝一杯真正屬於自己的咖啡,手沖咖啡就最有親切感。你大可以向店員提出個人喜好,讓他沖出一杯你的the fine cup!店裡仲供應輕食,你可以享用新鮮在店內焗嘅牛角包、軟曲奇同鬆餅!呷一口咖啡,嚐一啖搽咗自家製士多啤梨玫瑰果醬嘅提子鬆餅,真愜意!
 
The Fine Cup
西環堅尼地城士美非路19號地下D1舖
FB: https://www.facebook.com/TheFineCupHK/?fref=ts
 



圖:The Fine Cup FB

【香港好去處】一路向北 上水隱世美食推介
【香港好去處】輕鬆搭地鐵去黃埔 食勻區內美食
【香港好去處】粉嶺十大平民美食
【香港好去處】深入屯門食好西 試盡13間屯門特色小店
【香港好去處】元朗搵食Trip 邊走邊食12個好介紹
【香港好去處】沙田大圍-新舊美食11個好介紹
【香港好去處】走入大埔密密食
【香港好去處】齊齊入荃灣 食盡地膽街坊10大推介
【香港好去處】美孚荔枝角邊走邊食
【香港好去處】走進西灣河太安樓 冷氣叮叮一日遊

EDITED BY CLASSES

 
 


新聞資訊