旅遊教室-日本以外一啲都唔膠嘅膠囊酒店 - 進修新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 進修
  • >
日期:2016年01月22日
【旅遊教室】日本以外一啲都唔『膠』嘅膠囊酒店
【旅遊教室】日本以外一啲都唔『膠』嘅膠囊酒店
當你以為喺日本見到形形式式嘅膠囊酒店 (Capsule Hotel) 或者甚至見到膠囊酒店都有可以有一層式 (First Cabin) 嘅類型,就好似發現新大陸嘅時候,原來其他國家一早已經有呢啲 idea,而且仲要有埋一層式果種添呀!

1. 台灣代表:丰潮屋膠囊旅店 

台北原來都有一間膠囊酒店,而且仲好近地鐵站,由中山站 6 號出口行只須 10 分鐘路程。一間房有 30 個床位,分上下兩隔,雖然 Public area 唔太大,張床倒算幾舒適同乾淨,加上柔和嘅燈光,同埋因為新裝修,所以個感覺一啲都唔 cheap。加埋有免費洗衣機、烘乾機、風筒同 WIFI 用 (而且仲好流暢),老闆又極熱情招待,真係俾到人五星級酒店嘅感覺。女仔自己一個怕嘅話,可以早少少 book 定全女班房。


圖片來源:hotels.ctrip.com (WeChat29301*)

每晚價錢:約 $93(男女混合房)/ 約 $119(只限女性房)
住得過度:★★★★☆
地址:台北大同區南京西路288號


2. 俄國代表:Sleepbox 旅館

莫斯科謝列梅捷沃 (Sheremetyevo) 國際機場有個區域擺滿好多一舊舊、唔同顏色,好似小型獨立屋嘅木造房間原來都係膠囊旅館嘅一種,房間雖小,但就有齊所有 business men 需要嘅設備,例如:插座、閱讀燈、鏡、放 lap top 嘅枱、電視同鬧鐘等。因為開起機場 terminal 入面,啱晒大家轉機小休片刻,靜靜地咁搵個位做吓嘢,又或者喺遇到班機 delay 嘅時候臨時臨急救搵個地方解救自己都好。除咗舒適寧靜之外,仲好安全,所以唔洗怕瞓機場會俾人偷野!Sleepbox 有一層或兩層式膠囊旅館可供選擇,每間房最多可以容納到3個人,兩層式就啱晒同家人或朋友 share,不過因為間房有透明窗,變相私隱度比較低,住唔住就要睇你接唔接受到呢點喇!




圖片來源:sleepbox.com (官網)

價錢:按使用時數計算(逗留越耐,以每小時嚟計嘅話會相對地平。)
住得過度:★★☆☆☆
地址:莫斯科謝列梅捷沃 (Sheremetyevo) 國際機場內


3. 杜拜代表:Snoozecube 

杜拜呢個富貴之地,竟然都有膠囊酒店。Snoozecube 膠囊酒店同樣都係開喺機場入面,但話明係杜拜,間房當然點都大過人,有隻窗仔,令空間感變大咗。間房嘅景觀都真係正過人,每間房入面嘅牆貼滿森林圖案嘅牆紙,等入去住嘅人可以好輕鬆咁放鬆心情,就好似感覺到自己行咗入野外原林咁,完全唔覺住緊膠囊咁!免費 WIFI 一定唔少得,仲要有埋極 high-tec 嘅 touch screen,簡直係最佳享受呀!



圖片來源:snoozecube.com (官網)

價錢:每小時約 $164(單人房)/ 每小時約 $219(雙人房)(最少要住2小時)
住得過度:★★★★☆
地址:杜拜國際機場T1內


4. 新加坡代表:The Pod 精品膠囊旅館

新加坡地方咁乾淨,膠囊酒店嘅質素又點會差呢?呢間位於新加坡地鐵武吉士站 (Bugis) 附近嘅 The Pod 除咗交通方便之外,水準都幾高下,比五星級更似五星級。裝修設計簡潔、光線充足、床邊有晒獨立插頭方便叉電;床舖企理舒適,仲要有埋一硬一軟兩個枕頭;就連獨立沖涼房同廁所都乾淨過人,俾人一種安穩同舒適嘅感覺,所以住落真係有「家」嘅感覺!最大特色係行李可以放喺床底嘅儲物櫃內,而且仲要有埋鎖添,用番房卡就開到,超級安全方便。加上每日店家都會好貼心咁供應一支礦泉水同新毛巾,真係值得加分呀!另外,The Pod 亦設有全層只限女生入住嘅樓層,各位獨身女士就更加可以住得安心同放心啦!



圖片來源:The Pod Capsule Hotel (官網)

影片來源:The Pod Capsule Hotel (Youtube)

每晚價錢:約 $485(男女混合房 / 只限女性)/ 約 $595(雙人床)
住得過度:★★★★★
地址:新加坡武吉士Beach Road 289號 199952


不過住得膠囊都應該想慳錢,所以建議大家真係要降低一吓要求,如果接受唔到就咪亂試喇!再唔係就俾貴少少,試下啲高級少少嘅試試水溫先,反正襯後生體驗番次膠囊都唔錯。俾小編揀的話,一定揀新加坡嚟試!

延伸閱讀:
【去旅行必須知道的事】10個酒店禁忌DOs and DON’Ts
【去韓國汗蒸幕首先你要知道的九件事】

Edited by CLASSES






新聞資訊