食得辣中辣各國辣椒醬大比拼 - 烹飪新聞 | CLASSES 香港學習資訊平台

有時食麵唔夠味，落一匙辣椒醬真係醒腦提神，特別係打邊爐，如果屋企無辣油辣醬，真係會衝落街買！如果你都係無辣不歡，咁以下介紹六款唔同國家嘅辣椒醬就岩晒你！
 

余均益辣椒醬
產地：香港
 


最出色嘅香港本士辣椒醬，有人講過余均益辣椒醬同蘿蔔糕係最佳拍檔，炒麵、魚蛋河、乾炒牛河呢啲香港獨有嘅菜式，落多幾滴余均益真係香辣又滋味！不過因為余均益辣椒醬用料較講究，定價都較高，原本好多用緊余均益嘅餐廳都慢慢改用較平嘅牌子了。

售價：$25/100克
購買地點：西營盤第二街八號地下

蝦米辣椒醬
產地: 馬來西亞

      

蝦米辣椒醬成分包括紅辣椒、蝦米、紅蔥肉、蒜肉，係馬來西亞家常辣椒醬，辣度適中，辣椒嘅香味濃郁，但油膉味唔會好重，而且蝦米酥脆，打邊爐同煮烏冬落少少就一流！

售價：$32.9/190克
購買地點：一般超級市場，網購店
 
老干媽
產地：中國
 


老干媽係由一個內地農村婦人起家，將民間本味嘅辣椒醬，憑誠信同天生嘅靈敏味蕾，打造出全國知名嘅品牌。老干媽辣、麻、甜、咸、油、香嘅比例獨特，加落湯麵、熱炒小食或許打邊爐都非常惹味。

售價：$25/210克
購買地點：一般超級市場，雜貨店
 
是拉差香甜辣椒醬
產地：美國
 


是拉差香甜辣椒醬（美國公雞嘜）係美國生產嘅辣椒醬，泰文「是拉差」指泰國一個小城，最早係用嚟煮海鮮菜餚，宜家去越南餐廳一定見到，用嚟做河粉中牛肉的沾醬。是拉差香甜辣椒醬係美國勁普遍，甚至有雞尾酒用佢調味！

售價：$49/17oz
購買地點：一般超級市場
 
韓國順昌辣椒醬
產地：韓國

       
          
韓國辣椒醬可以烹調各式各樣嘅韓國菜，去過韓國嘅都知，煮親海鮮最後都會加辣椒醬，炒到又紅又辣。除左煮海鮮，仲可以用嚟炒辣年糕、炒辣雞、煮部隊鍋、泡菜鍋等等，係每個韓國家庭必備嘅醬料！

售價：$55/450克
購買地點：樂天市場購物網
 
台灣辣妹頂級生鮮辣椒醬
產地：台灣

                   
 
台灣辣妹頂級生鮮辣椒醬材料有朝天椒、蒜頭、莞茜、白芝麻油等，唔似其他曬乾嘅辣椒，辣妹辣椒醬有一種生鮮辣椒嘅香辣，而且其他配料都係新鮮醃料，好適合做涼拌小吃，例如涼拌青瓜、涼拌海蜇等，或者最簡單加落麵食都好正，有台灣朋友唔食辣，但都食到停唔到口！
 
售價：$50/600克
購買地點：台灣

睇左咁多款，你又最鍾意邊隻辣椒醬呢？

EDITED BY CLASSES