西蘭花原來好多蟲！？一招教你點洗西蘭花！ - 烹飪新聞 | CLASSES 香港學習資訊平台

你以為西蘭花沖沖水就乾淨哂？其實西蘭花每粒花蕾中間都暗藏好多菜蟲同灰塵！唔通要逐粒花蕾洗？咁天黑都未洗完！等小編教你呢一招，等大家可以極速洗乾淨西蘭花啦！
 

（圖片來源：網上圖片）

西蘭花係菜蟲嘅溫床，因為花蕾密密麻麻，下層又有足夠空間俾蟲仔鑽嚟鑽去。而灰塵基本上係有入冇出，粘附喺細小隙縫到，就咁沖水一定沖唔走！有啲無良餐廳只為咗唔好俾客人見到有蟲，就用消毒藥水浸泡西蘭花。蟲雖然死哂，但點知有冇殘留物？


（圖片來源：網上圖片）

小編當然唔會叫大家浸火水，你需要嘅係：一包鹽同暖水！跟足以下步驟，包你以後輕輕鬆鬆就可以洗乾淨西蘭花！

1.      按照西蘭花本身嘅組織結構，用刀切成一小朵一小朵，莖部都切成小塊。
2.      用清水沖洗西蘭花。
3.      準備洗菜盤（有隔水層更佳），倒入熱水或暖水。
4.      將5-7湯匙食鹽倒入水中，攪勻。（小編慣左落好重手....如果大家覺得倒太多鹽，可以自己調整份量，試吓work 唔work）
5.      浸泡10-20分鐘，你就會見到有蟲蟲浮上水面啦！
6.      再次用清水沖洗西蘭花，咁就可以拎去煮嚕～
 
大家等緊蟲蟲浮上嚟之際，仲可以整其他餸。但小編就會一直凝望呢盤水，觀察一條條蟲浮上嚟......嘿嘿，呢種莫名嘅快感，先係小編食西蘭花嘅主要原因....A_A大家快啲玩吓啦！（咦？）

相關文章：
咪再用漂白水！三大奇招教你白衫變黃點搞好！
唔使再刷廁所！教你自製超神奇「廁所炸彈」

EDITED BY CLASSES

大家支持一下CLASSES KITCHEN 嘅煮食教學啦！