英國慳媽60蚊食足三餐?!9招教你慳錢食平啲! - 烹飪新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 烹飪
  • >
日期:2017年05月11日
英國慳媽60蚊食足三餐?!9招教你慳錢食平啲!
英國慳媽60蚊食足三餐?!9招教你慳錢食平啲!

想食平DD,你可以去到幾盡?英國39歲嘅Amy Sheppard話每日三餐6英鎊(約港幣$60.5)就搞掂,仲出書分享點樣慳到盡之餘仲食得有營養!嘩,咁咪仲勁過$100四餸一湯!即刻睇吓佢有咩秘技~呢啲招數喺香港又work唔work?
 

(圖片來源:The Savvy Shopper's Cookbook @ FB)
 
39歲嘅Amy Sheppard係兩子之母,憑住精打細算以及出色廚藝,一家四口平時飲食慳得就慳。佢今年四月推出食譜,由普通家庭主婦變身食譜作者,喺書中分享點樣慳到盡,揚言60蚊港幣就可以夠一家四口食一日,到底點做到呢?
 
第一招:買急凍及罐頭食物


(圖片來源:bottomlineinc.com)
 
Amy認為新鮮食物同急凍/ 雪藏食物、罐頭食物等一樣咁有營養,加上冇咁易變壞,可以入多啲貨,又可避免造成浪費。當然啦,唔可以餐餐都豆豉鯪魚同午餐肉咁鹹咁肥,要揀就揀啲比較健康嘅款式,例如沙甸魚、吞拿魚等。
 
第二招:放棄做品牌忠粉


(圖片來源:Mashable)
 
好多人都不自覺做咗品牌fans,買死一兩個牌子嘅食物。試吓買唔同牌子嘅食物,分分鐘可以慳好多錢。
 
第三招:對價錢保持敏感度

為咗方便,好多人都會慣咗去同一間超市買一樣嘅嘢。就算冇時間周圍格價,每件貨品放入購物籃之前都睇清睇楚,買嘢之前三思,防止自己亂使錢。
 
小編私人醒一招:報大數!首先一路買野要記得價錢,唔好埋到櫃位先計。另外,見到件貨賣$16.2,就預佢買20蚊,唔好預佢係16蚊。計吓計吓好快就發現:嘩,突破幾舊水啦喎,好收手啦!
 
 
第四招:設定預算,付諸實行

每次入貨之前都設定預算,諗清楚自己需要買乜,一定可以買少好多無謂嘢。如果只想買豉油,就唔好貪特價買辣椒油買沙津醬,要知道,特價時時有,但你未必真係需要呢啲貨品!
 
咪以為慳家一定冇啖好食,呢個朱古力香橙曲奇蛋糕,睇見都好想食啊!諗定自己想整咩蛋糕,唔好買其他多餘野啦。
 

(圖片來源:The Savvy Shopper's Cookbook @ FB)
 
 
第五招:諗定一星期餐單

每個星期都諗定下星期食乜,再列出一個購物清單,咁自己就會心裡有數,唔會浪費。以Amy個人經驗,plan定七日食乜已經係極限。有人都分享過,話草埋啲野一齊買,會冇咁大使,亂買其他野架!
 
第六招:Lunch帶飯

公司附近好食又抵食嘅餐廳實在可遇不可求,帶飯唔單止可以食得使康啲、荷包慳多啲,仲可以將之前一晚食剩嘅嘢徹底消滅!
 
第七招:煮多D,食多餐

如果每樣食物買少少,一定會用更多錢。Amy整嘢食時會整多啲,或者準備多啲分量放喺雪櫃,當一家人唔得閒煮飯時可以整熱嚟食,食少餐外賣,又成功慳番一筆啦。


(圖片來源:The Savvy Shopper's Cookbook @ FB)
 
Amy推介佢最鍾意嘅食材:三文魚,可以煎魚扒、整湯、整沙津,變化多多,而且營養充足。但小編覺得呢招對香港人嚟講可能比較難,外國人整沙津整通粉就話可以食幾餐,我哋蒸條魚點食幾餐呀……
 
第八招:多菜少肉
 

(圖片來源:Advanced Nutrients)
 
肉類愈來愈貴,習慣食多啲素菜,既健康又可慳錢。所以Amy十分支持一個星期一日堅持全素,即係香港嘅Green Monday咁囉。
 
第九招:浪費食物黑名單

無論算到幾盡,總會有啲嘢食唔晒就變壞。養成記低「浪費食物黑名單」嘅習慣,有效防止自己重覆犯錯。小編自首!我成日買咗牛奶都唔記得飲!嗚呀以後小編會較鬧鐘飲奶架啦!
 
九招慳住食大計,邊招好使得?快啲Share俾啲大使朋友,以後月尾唔使度住度住啦~!

相關文章:
10蚊就去到黑頭!?自製又抵又有效黑頭貼!
 

EDITED BY CLASSES



新聞資訊