老麥精選點樣食-港人7大不同食法 - 烹飪新聞 | CLASSES 香港學習資訊平台

香滑炒蛋、熱辣辣嘅豬柳漢堡加一塊香脆薯餅呢個黃金組合絕對係前無古人，後無來者咁 match，而且份量仲岩岩好。麥當勞呢個3號「精選早晨套餐」一向都係小編心目中嘅「飛佛」！而家仲要多埋每個星期日全日供應，真係可以瞓到晏一晏先落街當 Brunch 食。

就快又到拜年嘅日子，通常新年都會好多人排老麥食完早餐先去拜年，一嚟啲茶記好多都休晒息，二嚟去茶記係要派利是，所以食麥記是一個「常識」吧！最受歡迎嘅精選套餐入面有咁多樣野，其實都真係可以有好多種食法同變化，小編亦見識過唔少，單係男朋友同自己嘅食法已經相差勁遠！但其實又邊有話咩食法先係最正確呢，好食、啱自己口味咪得囉！唔知到時你又會點樣食「精選」呢？



食法一：炒埋一碟

一次過將豬柳、炒蛋、薯餅夾埋入包食。（食前會加少少鹽同黑椒調味，但唔會用佢包提子果 jam）


圖片來源：stripeboy.com

食法二：切粒 BB 餐

將塊包、炒蛋、豬柳、薯餅全部切碎晒，撈勻食。

食法三：Happy Share

將所有野食分一半（除咗個包），一半拎嚟食，淨番果啲就留嚟夾包食，記得要落埋黑椒同鹽，夠薑可以落埋包果 jam 架！

食法四：排住次序逐樣食

識食緊係首先食咗熱辣辣嘅薯餅先啦！然後搽果醬食個包。食完包再落鹽同黑椒調味食埋個炒蛋，最後先再慢慢嘆埋塊豬柳。

食法五：加料重口味

食包果陣要先搽 jam，之後再夾豬柳；炒蛋要落晒鹽同埋黑椒調味；然後食薯餅果陣要加茄汁食，咁至夠 perfect！

食法六：先薯餅，後食豬柳「半蛋」包

呢個食法其實同（食法三：Happy Share）大同小異，不過會係先食咗塊薯餅先！然後先將所有食物分一半咁食，一半夾包，一半就咁食。

食法七：小編指定食法

小編唔鍾意又鹹又甜咁食，所以都唔會用得著包果醬，首先會用鹽同黑椒幫炒蛋調味，然後切粒，之後將豬柳夾落個包到扮「豬柳強走蛋」咁食，食完一啖炒蛋，然後再食一啖「豬柳漢堡」，之後先慢慢享用塊薯餅，咁至係小編嘅 Good Morning！

講咗咁多款，唔知有冇一款講中咗係你平時食開咖呢？定係仲有啲更加創新嘅方法我哋未試過呢？

部份圖片來源：online-instagram.com

延伸閱讀：
【薯條食法有好多種，你又試過幾多種？】
【香港好去處：走遍荃灣尋覓8大特色美食】齊齊食好西！

Edited by CLASSES