日本居酒屋食壽司要懂的8大禮儀 - 烹飪新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 烹飪
  • >
日期:2016年02月24日
日本居酒屋食壽司要懂的8大禮儀
日本居酒屋食壽司要懂的8大禮儀
去日本當然就要食正宗老店嘅壽司,感受一下當地文化啦!雖然香港人喺香港食壽司真係密過食生菜,但係其實「食相」就真係令唔少日本人為之側目。可能平時冇人話你知日本人對食壽司嘅要求有幾高,潛移默化下,令大家根深蒂固咗,唔覺得自己嘅食法(即係全港大部份人嘅食法)都係有啲問題!有冇咁嚴重?我話你知絕對有,因為日本人真係好嚴格架!不如就一齊參透下日本人點食壽司法,睇下自己踩中咗幾多個 Trap!

1. 喺日本,如果你喺一啲日式傳統老店打洋前三十分鐘內入去覓食,唔該請你有禮貌啲問人一句係咪仲開緊。呢句日本人真係估你唔到咁重視,係唔係好含蓄呢?呢啲咪就係日本文化囉!不過人家食物同服務質素又真係好過人喎!

2. 日本居酒屋門口位通常會有塊白色嘅暖簾(Noren),原來日本人對於呢樣野喺咩位揭同揭幾多都好有研究架!由底部數起對上 3.2 寸位置向下打斜揭。(幻想下其實就好似一個48゚角嘅三角形咁,唔明就睇下面幅圖)


圖片來源:buliwenzi

3. 入到去,要自己主動俾 signal 店員,做手勢話俾人知同行有幾多位。如果只係得自己一位,就要俾啲戲,眼神中要帶有少少 guilty 同比番少少笑容。(乜唔係淨係韓國先唔 welcome 一人前架咩?日本明明就好多定食架,又點會怕一個人食飯?所以小編都唔太明呢點嘅用意。

4. 日本人有禮貌就出晒名,但估唔到連有人帶位,就算 bar 枱果邊啲位明明冇人坐,都要同隔離果位陌生人打聲招呼,好明知顧問咁問人哋「唔好意思,請問有冇人架?」,「我可以坐嘛?」,然後要等人回覆咗你先坐。雖然有啲虛偽,但係禮多人不怪,當地人已經慣咗,我哋去到咪當語言不通,所以要 Double confirm 下囉!

5. 如果間野得 bar 枱,冇店員 serve 你千祈唔好覺得奇怪,你直接向師傅 order 就得架喇!就好似《深夜食堂》咁。

6. 啤酒係每間居酒屋必備嘅嘢,師傅淨係會幫你開蓋,至於斟果下喇喎?就交番俾你自己啦!如果你同職位高過你或者係長輩嘅話,就要幫人斟咗先再幫自己,仲要一路斟一路口噏噏住「maa maa maa maa」以示尊重。被斟果個就要不停回應「Oh toh toh toh」。小編去日本果陣都見識過,有個女仔自己唔飲,但就要係咁幫長輩斟酒,仲要好密下,真係睇見都有啲攰。

食壽司嘅步驟:首先你喺櫃台攞出所要載甜豉油嘅碟仔,然後倒入大概 20 cc 嘅「murasaki」甜豉油。最正宗嘅食法係用頭三隻手指(姆指、食指同中指)直接拎起嚟食,事關日本壽司嘅果舊飯捏得唔會好緊,如果用筷子食會好容易夾散或者夾扁架!

食唔同嘅壽司,蘸豉油嘅方法亦各有不同,例如:

一塊塊魚生壽司
反轉壽司,用魚生果面蘸豉油,然後 keep 住反向咁直接仰望45゚角咁放入口,好浮誇咁享用你舊壽司。記得喇!要一啖過,唔好分開兩啖食。


圖片來源:buliwenzi

軍艦壽司
如果好似魚生壽司果個食法就應該會跌晒啲料出嚟,所以日本師傅好細心咁已經喺入面加咗調味或者適量嘅芥辣,如果真係要加重口味,可以用薑片蘸啲豉油,再掃落壽司度食。

另外,落 wasabi 或者過多嘅豉油係會蓋過魚生嘅原汁原味,甚至破壞壽司嘅味道。而且如果俾老牌師傅見到你用「港式混合法」嚟將芥辣同豉油溝埋食都不特只,仲要叫佢哋俾多啲你嘅話,分分鐘會黑你臉架!

嗌壽司果陣,應該先 Order 比較淡味嘅壽司先,咁先唔會影響到之後嘅味覺,通常會係咁樣叫:

白色嘅魚 >> 光魚 (如:鰹魚、鯖魚) >> 赤身 (拖羅) >> 三文魚 >> 魚子、筋子 >> 玉子 >> 貝類 >> 蝦類 >> 海鰻 >> 卷物 / 軍艦

7. 去到尾聲,食到夠晒皮嘅時候,大家就應該咁樣表達:「agari」,意思就係叫佢哋上「飯後茶」,因為大部份嘅日本老店都會係餐後供應一杯玄米茶俾每位客人,然後先埋單。

8. 埋單果陣,如果你想請客,就要俾定個 signal 人,用左右手食指打個交叉,咁 waitress 就會識做,俾張單你埋。


圖片來源:buliwenzi

其你圖片來源:karinshibata.com

延伸閱讀:
【日本必守】溫泉九大禮儀
【去旅行必須知道的事】10個酒店禁忌DOs and DON’Ts

Edited by CLASSES

 


新聞資訊