廚房新手注意！教你避開5項烹飪通病！ - 烹飪新聞 | CLASSES 香港學習資訊平台

 新手煮野食出錯只係小事，最緊要可以由錯誤中拎到 exp，慢慢自然會 Level up！但弊就弊在自己錯咗都唔知，每次只會重覆犯錯，咁點進步呀～等 CLASSES 教你避開5項廚房新手容易犯下嘅錯誤，咁黑暗料理就唔會老是常出現啦！
 
1.          切忌未讀完食譜就開始烹煮



有時見到啲精緻小食好想整，匆匆買完材料先發現……自己根本冇光波爐！Orz 一大堆材料咁就浪費哂！小編建議食譜一定要由頭睇到尾，確保自己有足夠器具、時間、能力，咁先好開始買材料呀！
 
2.          切忌跳過材料準備


 
好多人開爐一刻先準備材料，其實咁樣好易做錯做漏野。試想像，炒個蛋最後先發覺唔記得切蔥花，如果當下先急急切蔥，隻蛋已經熟過熟女啦……所以喺開爐之前，一定要確保所有材料已經ready，配料已經切好、凍肉已經解好凍、醃料已經夠入味等等，咁開咗火之後就唔會手忙腳亂啦。
 
成日都炒蛋煎蛋咁悶，睇吓雞蛋仲可以點玩：
自製夢幻早餐無難度-教你整軟綿綿雲霧雞蛋
 
3.          切忌省略部份配料



當屋企冇咁多配菜，好多廚房新手都會自把自為 skip 咗一兩樣食材，或者搵其他野代替，薑、蔥、香草等等成日都會「被消失」！如果你唔知該食材有咩作用，最好唔好亂咁代替。例如一味黑椒洋蔥炖雞，你以為用紅蔥頭或薯仔一樣可以代替洋蔥，以為小小洋蔥要唔要都罷？殊不知，洋蔥嘅作用除咗調味之外，仲可以令雞塊保持 QQ 滑嫩！如果走左洋蔥，咁啲炖雞就會老哂架啦……
 
嘿嘿，係咪諗起都想食返煲洋蔥炖雞呢？即睇：
Twitter爆紅電飯煲料理？！懶懶閒自製勁多汁洋蔥炖雞！
 
4.          切忌忽略下廚時間



想整九大簋，但得兩個鐘時間準備，會唔會太大貪呀？計定烹煮時間，先可以得心應手，同埋確保全部菜式上枱時仲係熱辣辣！如果只有2個鐘，整2-3個小菜就差唔多啦～
 
5.          切忌失去耐性


 
要煮一餐好餸，最忌唔耐煩！蒸野嘅時候不斷揭開鍋蓋，會令熱氣流失；煎牛扒急住將牛扒翻面，牛扒點煎都唔夠香；鑊都未燒熱就急住將食材放入鑊……呢啲全部都係唔夠耐性嘅常見例子。
 
講到牛扒，睇吓 BOB 叔點教你整慢煮牛扒：
低溫慢煮牛扒Sous Vide Steak
 
最重要係千其唔好隨便縮短烹煮時間，對於燜煮類食材，即使你以為已經「淋咗」，都未必夠入味，一定要夠鐘先好熄火。一心只諗住「熟未呀？食得未呀？」係唔會煮到好餸架～
 
快啲記低呢5點，以後煮野食就唔會錯過黃金時間，做出同食譜一樣嘅效果啦！下一次就教各位廚房初哥用焗爐有咩要小心～
 
圖片來源：pexels.com
 
相關文章：
夏天必學消暑水果酒！兩個步驟整出「西瓜炸彈」！
最萌柴犬屁股！教你自製超可愛柴犬團子！

EDITED BY CLASSES