幾時落蠔油幾時落豉油？教你蠔油真正用法！ - 烹飪新聞 | CLASSES 香港學習資訊平台

你以為蠔油同豉油一樣都係「加啲鹹味」？其實兩者用法完全唔一樣！到底點區分呢？一齊嚟睇吓啦！
 
1.      蠔油忌與重口味調味料混合



比起豉油，蠔油有較重鮮味，所以用蠔油時唔應該再撈埋重口味調味料，例如辣醬、XO醬、陳醋等，因為呢啲配料會破壞蠔油特殊風味，反而搞到不倫不類。而豉油就冇咁講究，撈上其他調味料時會更加出味，所以大家就會見到有辣椒豉油，但唔會有辣椒蠔油啦～
 
2.      蠔油用於去腥



蠔油同豉油都會用作醃料或燜煮配料，咁幾時決定落邊樣呢？原來用蠔油醃製食品時可以去除內臟腥味，令菜式香濃提鮮，但豉油就冇去腥效果。所以如果係燜煮內臟或海鮮，例如豬潤或魷魚，就應該落蠔油。
 
至於豉油應該點用？其實豉油都有好多種，生抽、老抽、頭抽各有不同。即睇：
生抽、老抽、頭抽？你用對了嗎？教你豉油真正用法！
 
3.      蠔油沾醬有禁忌
 

 
蠔油作沾醬好常見，去茶記叫一碟炒芥蘭已經會用蠔油上菜。但原來唔係所有菜式都適合用蠔油。蠔油沾醬只會用喺少汁嘅菜款，清炒蔬菜時就可以用作提味。對於多肉汁嘅餸菜，例如煎餃子，就絕對唔可以沾蠔油。因為蠔油會蓋過肉汁鮮味，加上蠔油較稠，會影響口感。
 
知道豉油、蠔油嘅用法分別後，以後唔好再傻傻吓亂用啦！
 
圖片來源：Taste、recipeler.com、Kat Juju
 
相關文章：
食鹽多過你食米！到底粗鹽幼鹽用法有何分別？
落糖都要落得啱！糖霜糖粉有何分別？
 

EDITED BY CLASSES