叮水叮蛋之外仲有危機！四大微波爐叮叮禁忌！ - 烹飪新聞 | CLASSES 香港學習資訊平台

近幾年基本上家家戶戶都有部微波爐擺喺屋企，貪夠哂方便，翻熱野食一兩分鐘就食得。但係微波爐暗藏殺機，大家又知唔知？除咗叮蛋叮水好危險之外，仲有咩唔叮得？

 

1.    湯水類



相信大家都知微波爐唔可以叮水，但大家知唔知點解？因為加熱水時，就算已經過咗沸點，水依然唔會沸騰，但一郁佢就會暴沸，好易造成燙傷。液體愈少雜質就容易發生呢個情況，因此清湯類都應該盡量避免用微波爐加熱。如果一定要叮，小編建議喺湯中間放一支攪拌棒，幫助散熱。而且加熱後亦唔可以即刻拎出嚟，起碼要等30秒，要等液體已經有基本散熱先拎。
 
2.    鹽漬類



鹽漬類食物因為表面鹽份較高，但內部水份較少，加熱速度會好快，導致好易叮燶表面，但內部仍然凍冰冰。有人試過叮叮吓出哂煙，原來係成舊食物都燶哂！小編建議切開鹽漬類食物，再擺一小杯水入微波爐一齊叮，咁就唔會出現焦燶問題啦！
 
3.    多油類



脂肪含量高而水分含量低嘅食物，例如yogurt、五花肉等，用微波爐加熱一樣會因為溫度上升太快而容易焦煳，一咬開時更容易被飛彈出嚟油燙傷口腔同喉嚨。而且油漬亦會喺加熱過程中四周噴濺，整污糟微波爐。因此叮熱脂肪含量高嘅食物時一定要加個蓋，防止噴濺；而且加熱完成後要再等30秒先食用。
 
4.    麵包類



叮麵包其實好常見，小編當然唔會唔准大家叮麵包，但高溫叮麵包就係禁忌啦！因為微波加熱可以做到由內至外，即係內部溫度升得比表面快。而麵包內部水份較多而表面較乾，流心包同隔夜包情況更甚，所以內部加熱會比表面快好多，好易出現表面微熱，但實際上內部已經滾燙嘅情況。所以小編建議調低微波爐溫度同火力，慢慢加熱，令麵包盡量均勻加熱，咁就安全得多啦！
 
成日都有人唔知邊啲食物可以叮，快啲Share呢篇文章俾佢哋啦！

圖片來源：tw.bid.yahoo.com、Steamy Kitchen、Food.com

相關文章：
Twitter爆紅電飯煲料理？！懶懶閒自製勁多汁洋蔥炖雞！
10大懶人叮叮食譜-節省時間善用微波爐
 

EDITED BY CLASSES