【牛大媽買餸教學】點樣聞味、聽聲？揀靚榴槤必學四大步驟！ - 烹飪新聞 | CLASSES 香港學習資訊平台

好多人都大愛榴槤，但偏偏大家都最怕揀榴槤，覺得又重又拮手，多數都係請檔主幫手揀榴槤就算。不過，唔想做水魚，自己就一定要識，先冇咁易俾人呃，教定幾招俾大家傍下身啦！
 
1. 借刀聽聲



通常榴槤檔檔主都一定會有把刀喺手，成日見佢地喺度拍拍拍，究竟做咩？就係要「聽聲」！拍落去，聲音立體、迴盪為之成熟，如果聽落係死實實好細聲嘅，就代表未夠熟。

2. 聞味
 


「聞味」係煮食同買餸最經常派得上用場的技巧。榴槤末端係最易出味的位置，聞一聞，如果帶草青味，即未夠熟；若帶發酵或酒味，即太過熟；聞得出榴槤香亦不嗆鼻就最好。
 
3. 撳釘
 


用拇指同食指輕輕用力將兩粒榴槤釘拉埋，如果拉得埋就代表已經熟，相反，好實好難拉，就係唔夠熟。
 
4. 觀色
 


青BB的一睇就知唔熟啦！最好揀外殼帶黃色的榴槤，同埋記住個殼爆咗嘅千祈唔好揀呀，通常都係熟得滯先會爆。



靚榴槤係軟硬適中，更加唔會出水。

 

Guest Writer – 牛大媽教買餸 要煮嘢好食，首先材料要好！林林總總嘅食材究竟點分好唔好，即刻等牛大媽帶路買好西煮好餸啦！

 

EDITED BY CLASSES