【牛大媽買餸教學】點分舊橙同新橙 - 烹飪新聞 | CLASSES 香港學習資訊平台

 
天氣一熱，就會好想食生果，解解暑。無論就咁食定係榨汁，「橙」都係消暑之選！所以一於講下點揀「靚橙」啦！
 
首先，點揀靚橙？
揀橙要留意3點，第一點，好多人都應該知，就係要墜手，代表多汁；第二點，要有光澤，冇白斑點；第三點，顏色偏深較好。



咁點分舊橙同新橙？
好多人都鍾意買舊橙，所以有啲街市生果檔會標明邊一啲係舊橙，但如果冇又點分？咁就要睇月份同橙嘅品種。唔同品種嘅橙都有唔同嘅當造期，而喺當造初期賣嘅就係新橙，當造期尾賣嘅就係舊橙。
 
以最常見嘅「石榴篤橙」為例，石榴篤橙即係尾端有粒「肚臍」，標籤上寫住「Navel」，佢嘅當造期係12月至6月左右，所以夏季賣嘅石榴篤橙就係舊橙；另一個品種「蜜篤橙」，標籤上寫住「Valencia」，當造期係5月至10月左右，所以年尾賣嘅「蜜篤橙」就係舊燈。



而近年大家都熱烈討論緊嘅「黑牌橙」正正就係舊橙的標示，大家認住黑色標籤就分到，簡單得多！



舊橙真係好食啲？
其實好睇個人口味，有啲人鍾意食舊橙，係因為舊橙比新橙甜，但講到新鮮橙香味，舊橙就唔及新橙啦！

標籤嘅謬誤
好多人以為某啲號碼嘅橙特別好食，但其實橙「品質」同編碼係冇關係。唔同號碼主要係用嚟分別橙嘅大小，例如石榴篤橙中嘅4012係大碼橙，3107係中碼橙，而4013就係細碼橙。即使係同一個號碼，因唔同嘅天時地利因素都會改變到橙嘅品質，所以今年同下一年食到嘅同一款橙喺味道上都可能會唔同㗎。

資料及圖片來源：牛大媽教買餸
 

 

Guest Writer – 牛大媽教買餸 要煮嘢好食，首先材料要好！林林總總嘅食材究竟點分好唔好，即刻等牛大媽帶路買好西煮好餸啦！

EDITED BY CLASSES