美容教室-唇膏可以遮蓋黑眼圈？ - 美容新聞 | CLASSES 香港學習資訊平台

對成日夜瞓開嘅女士嚟講，遮瑕膏基本上都係佢哋每日急救熊貓眼嘅必備良物，日覆日、年覆年咁 keep 住夜瞓，然後個黑眼圈越嚟越深，最後深到遮瑕膏都遮唔到，因為再深色嘅遮瑕印上去眼皮都變得好白，白咗一撻咁就好肉酸，試問仲點可以中和到個深色到爆炸嘅黑眼圈呢？

網上流傳一種方法可以令黑眼圈遮得更自然同更有效，而且唔會白到好似彊屍咁，不過夠膽試嘅好似都係皮膚比較白淨嘅外國同韓國女仔居多，以為膚色白真係可以易啲遮？都唔係呀！早排網上睇到有段片教人用唇膏遮黑眼圈，個 youtuber 嘅膚色就偏黑嘅，但係…佢化完之後，效果都超級好呀，極度自然添！


圖片來源：Deepica Mutyala (Youtube)

咁究竟係咪求其就咁拎支紅色唇膏搽上個眼袋到？當然唔係啦，不過都唔太難嘅，就咁跟住以下 step 做就已經好足夠：

1. 用淡粉紅色 / 蜜桃紅色嘅唇膏或者膏狀胭脂搽喺上下眼袋同埋黑眼圈位置（用按壓方式，然後慢慢推開），最好搽到好似熊貓咁，鼻翼同雙頰都可以搽埋，作遮瑕之用。


圖片來源：Ellko (Youtube)

或

將遮瑕膏同液態嘅胭脂或唇膏溝勻先搽上去適當位置上。（用按壓方式，然後慢慢推開）

2. 然後再搽一層遮瑕膏上去相同位置，然後 blend 開直至均勻，如果覺得唔夠，可以再加多一層薄啲嘅遮瑕。


圖片來源：Ellko (Youtube)

3. 最後可以掃番層光影粉或者蜜粉遮一遮啲眼紋，咁就可以令個妝貼啲喇！


圖片來源：Ellko (Youtube)

4. 溫馨提示：如果膚色比較深可以用紅色或者深紅色嘅唇膏。


圖片來源：alicebraga

黑眼圈嘅出現其實係因為微絲血管破裂又或者係色素沉澱而令眼部四周嘅皮膚多咗好多藍同紫色素，所以日子耐咗咪會有咁深層嘅黑眼圈囉！如果用美術原理去睇，用上藍、紫色嘅對比色，即係橙紅色系嘅唇膏，正正就可以作互補色調之用，成功遮到黑眼圈就必然啦！

之但係，都要溫馨提示番大家，東方人嘅膚色同西方人有異，呈現嘅黑眼圈顏色都會比較深色（通常係咖啡色或者黑青色）同臉部其他位置嘅膚色相差更遠，要中和番個色差，最好都係用番啲正路嘅方法比較穩陣啲！即係點？咪就係用暖色系，帶啲蜜桃或者偏橙色嘅遮瑕液打定個底，然後先再加遮瑕膏會比較好，紅色唇膏都係留番俾外國人試好喇！

延伸閱讀：
【仙氣《奶酪》妝】單眼皮美妝三步曲
【美容教室】紅棕色眼妝步驟示範

Edited by CLASSES