女生必學-宋慧喬-太陽的後裔-凍齡造型 - 美容新聞 | CLASSES 香港學習資訊平台

近排 hit 爆韓劇《太陽的後裔》雖然今個星期只係出到第8集，但係小編已經忍唔到手，要開始睇喇！宋仲基 oppa 固然吸引，但係女主角宋慧喬先係亮點，仲越睇越靚，越睇越後生，真係唔講唔覺佢原來已經係年過34嘅輕熟女。究竟點解佢啲皮膚喺劇入面可以保持時刻自然亮澤，望落真係好似冇化過妝咁嘅？除咗因為佢皮膚底子好之外，原來妝容同髮型都好有影響架！


圖片來源：news.joins.com

髮型方面：

1. 減齡空氣八字劉海　及肩中長髮

其實「喬妹」塊臉唔算好尖，但係呢款髮放喺佢身上，真係令佢變得好清秀，除咗成功減齡之外，仲修飾到佢啲 baby fat。呢種空氣八字劉海真係夠晒百搭，大部分面型都 carry 到！每朝吹一吹，定一定整就得，極方便。

點整？

其實用風筒或直髮夾整都得，劉海長度必須要過眉毛(最好長多 1-2 cm，如果唔係就會顯得好幼稚)，眉心正中間位嘅頭髮要短啲，輪廓兩邊就要長番少少，要呈現八字咁嘅形態先岩。用風筒吹果陣，記得要用手指將髮根稍為向內捲起，用熱風固定造型。如果用直髮夾夾劉海果陣，記得要拎起左右兩邊比較長嘅劉海向外夾，咁就自然會出到「八」字劉海嘅效果。要營造蓬鬆嘅青春活力之感，及肩中長髮就最有代表性，不過少少嘅修飾係必須嘅！大家最後可以微微向內捲一捲個髮尾，記得千奇唔好整到塌晒或者油笠笠，如果貼住個額頭咁就唔方唔「女神」喇！





圖片來源：viu



圖片來源：asiae.co.kr

2. 清爽可人馬尾　盡顯隨性美

聽人講男性一向對馬尾情有獨鍾，大家都有一種《那些年》情誼結同埋憧憬。咁都係嘅，因為馬尾的而且確有一種爽朗、清純、唔造作嘅奇妙吸引力；有一種帶佢哋回到過去少年時嘅回春感覺。《太陽的後裔》入面嘅宋慧喬係個醫生，平日都冇咩時間打扮，隨性、簡約、利落嘅馬尾裝反而更加帶出佢嘅氣質同埋專業。不過大家可以學「喬妹」咁，不妨扎鬆啲，又或者隨性啲咁扎個髻。記得左右臉兩邊放番一執髮絲，塊臉望落就會細啲，咁樣真係會呃到下人架！







圖片來源：viu

妝容方面：

1. 清新素顏　水潤自然裸妝

貴為 Laneige 代言人嘅「喬妹」當然戲裡戲外都用自己代言品牌 Laneige 嘅新 product 水感輕透氣墊粉餅「BB Cushion 霜SPF50+ PA+++」啦！佢喺劇入面淡到近乎零嘅裸妝，自然水潤、透薄之餘又遮到瑕，皮膚望落真係似足十八廿二，難怪呢款氣墊粉餅早就風靡全球，據聞每4個韓妹入面有3個已經用緊氣墊粉餅喇！



圖片來源：viu


圖片來源：Laneige 官網

2. 韓系清新裸眼妝　拉長眼線

韓妹好鍾意將眼線勾畫到好似貓眼咁，但係因為「喬妹」嘅角色係一個專業嘅醫生，所以眼妝都要一樣咁清。不過眼線都係要畫，點樣做到裸眼妝又可以做到眼大大嘅效果？重點在於要拉長個眼尾！

貼士：
先用近膚色嘅淺啡眼影喺眼窩打咗個底先，然後用深一度嘅啡色眼影輕輕掃一掃雙眼皮摺疊位；跟住自己眼型畫一條好幼嘅眼線，去到眼尾位就順住眼型稍為拉長，之後再輕輕掃一掃深啡色眼影；最後搽埋睫毛液就得喇！


圖片來源：mjcoffeeroasters.com





圖片來源：viu

3. 自然層次變化唇色

有冇人發現到喬妹第一次同宋仲基 oppa 約會喺醫院架 lift 度補妝果支唇膏就係佢代言品牌 Laneige 最新推出嘅雙色唇膏「Two Tone Lip Bar」？減齡裸妝 young look 當然就要襯番啲自然又有層次感嘅唇膏先可以突出佢嘅優雅、智慧型美女嘅氣質。相信呢款《太陽的後裔》「姜暮煙唇膏」將會成為續《來自星星的你》「千頌伊的專用唇膏」後嘅另一支備受追捧嘅神級妝物！




圖片來源：viu

Laneige雙色唇膏「Two Tone Lip Bar」


圖片來源：Laneige (Facebook)

延伸閱讀：
【美容教室】唇膏可以遮蓋黑眼圈？
【化妝袋必備】氣墊粉餅推介及正確使用法

Edited by CLASSES