【頭髮教學】亂洗頭易甩頭髮！教你避開五大洗頭禁忌 - 美容新聞 | CLASSES 香港學習資訊平台

人人都識洗頭？未必！洗咗咁多年頭，你有冇觸犯以下五個禁忌？
 
1.      切忌頭乾就搽洗頭水



有啲 Salon 都會跳過濕髮步驟，直接將洗頭水搽落頭髮，以求方便。大家千其唔好有樣學樣，乾髮就搽洗頭水係錯架！正確方法係先用溫水沖洗頭部，沖走表面污垢。再將洗頭水倒落掌心，用手搓出泡沫，然後先抹上頭髮。
 
2.      切忌熱水過熱



雖然用熱水沖涼好爽，但用過熱嘅水洗頭會令頭皮受太大刺激，有可能發生紅腫。而且熱水會令頭皮變脆弱，仲會令佢過於乾燥，導致甩頭髮。咩水溫先最啱？ 38 - 40℃就啱啱好啦！
 
3.      切忌用指甲抓頭皮



無論你有冇留指甲嘅習慣，洗頭時都唔應該用指甲抓頭皮，因為指甲太硬，會對頭皮造成損傷。作為代替，大家應該用指腹按摩頭皮。
 
如果實在好想追求磨擦時嘅快感，小編建議大家買一把梳專用嚟洗頭，搽洗頭水時慢慢梳理頭皮，一樣有按摩效果！但切記唔好將洗頭梳同平時理髮梳撈亂，因為平時用嘅梳一定會有斷髮同塵埃粘住，如用嚟洗頭反而會將污垢粘上頭髮！
 
4.      切忌抹頭時擦拭頭髮



咩話？抹乾頭髮時唔可以擦拭頭髮？咁點抹呀？洗完頭嘅時候係頭髮最脆弱嘅時候，如果擦拭頭髮會令頭髮受損，以及產成毛燥。正確方法係「印」乾頭髮，將毛巾夾住頭髮，慢慢印乾。
 
5.      切忌留低殘餘護髮素



搽完護髮素有滑溜溜嘅感覺，摸落好舒服呀～～咪住，記得沖乾淨佢呀！你以為滑溜溜係保護？錯錯錯，其實呢啲殘餘物唔會做到保護，反而會粘住更多污糟野，同埋造成毛孔阻塞。
 
想擁有一把秀髮，由洗頭開始！快啲Share俾朋友，一齊學識洗個靚頭啦！

圖片來源：You Queen、Wiki How、lifestyle.okezone、Stylish and Trendy、Judith B Salon


相關文章：
甩頭髮必睇！原來戴呢種帽可以生頭髮？！
韓國新出洗瀏海專用布！擦兩下瀏海乾淨又立體！

EDITED BY CLASSES