香港好去處-齊齊入荃灣食盡地膽街坊10大推介 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2016年08月17日
【香港好去處】齊齊入荃灣 食盡地膽街坊10大推介 
【香港好去處】齊齊入荃灣 食盡地膽街坊10大推介 
 
今年年頭,小編帶過大家去荃灣食好西。最近,因為識到比小編更街坊、更地膽嘅荃灣人,就愈嚟愈有口福!小編最鍾意同各位 CLASSMATES 分享搵食 Tips,所以快啲跟住小編入荃灣,試勻呢10間推介啦!
 
1. 鰻魚汁任倒唔嬲 $60蚊有找鰻魚飯

小編大愛鰻魚飯,呢間由真正日本人主理嘅餐廳,鰻魚飯竟然$60蚊有找,簡直
唔敢相信。見到呢碗鰻魚飯,真「嘩」咗出嚟。鰻魚好大塊,個樣又靚仔;鰻魚飯最緊要夠汁,無汁嘅小編?傻啦!老闆好闊佬,一大樽鰻魚汁畀你自己倒,任加唔嬲,鰻魚入口嫩滑,又肥美,啖啖肉!白飯(珍珠米)軟身,口感啱啱好,完美呀!加多$2可以有嘢飲,仲可以揀凍飲呢!小編食完無嘢講,因為呢個飯,無得彈!


 
和食快餐
地址:荃灣西樓角路荃昌中心昌寧商場地下23號舖

 
2. 美食大匯集

雖然名叫「大食部」,但其實間舖唔算大,不過嘢食夠出位、又足料,種類愈出愈多,今時今日,只係呢幾點都足以箍住一班食客個胃啦!令「鮑記」闖出名堂嘅一定係個芝士漢堡,見到張圖你都明點解。而繼上次介紹過嘅「爆曬醬芝士牛堡」之後,佢就出咗呢個「火山爆發熔岩牛堡」,紅菜頭汁溝芝士,中間好創新咁夾泡菜肥牛,小編試過,果然超乎想像地夾!最近佢推出咗「午市車仔飯」、「唔係錢嘅下午茶」、用春卷皮包住新鮮菠蘿同黑松露芝士嘅炸芝露卷、串燒拼盤……仲自創埋鮑記特飲忘憂茶,正呀!
 
重溫:【邪惡至極】全港必試瘋.芝美食

圖:鮑記大食部FB 、iantang310IG@IG
 
鮑記大食部
地址:荃灣荃華街36-48號富麗花園B商場地下38A舖
FB:https://www.facebook.com/a.valdocco/?fref=ts

 
3. 肉餅大升呢 龍蝦破格變肉餅 

每個人嘅回憶裡面都應該有一碟媽媽煮嘅蒸肉餅,小編鍾意嘅係梅菜蒸肉餅同蒸肉餅。不過,小編從來都無諗過家常小菜嘅肉餅可以升呢,仲得到好多人嘅喜愛。肉餅哥將好多矜貴食材 mix 肉餅,好似龍蝦、黑松露、瑤柱,真有新意。原隻龍蝦畀曬你!龍蝦鉗托住一大塊肉餅,肉餅裡面有超多龍蝦肉,表面煎封,勁香口。最驚喜係兩個鉗唔係得個樣,仲有龍蝦肉架,記得食埋先喇!


圖:肉餅哥小炒料理FB
 
肉餅哥小炒料理
地址:荃灣聯仁街28號康睦庭園地下3號舖
FB:https://www.facebook.com/meatpiegor/?fref=ts


4. 貼地價 $48平食魚生丼!15分鐘一定有得食

日本嘢從來都係唔少香港人至愛,魚生飯更加係不可或缺嘅,最近又有過江龍嚟香港,食「丼」一啲都唔平。呢間極有宗旨嘅定食店就供應劃一價$48蚊定食,仲保證15分鐘一定有得食。呢個豪華海景丼舖有三文魚、劍魚、鮮蝦、帶子、帆立貝等等,勁足料,成個套餐包埋枝豆,茶碗蒸蛋、湯同埋甜點,都只係賣$48,而茶、湯同飯仲可以喺自助區任加,抵到呢,去邊搵喎?


圖:fisholidayu @IG
 
定食8
地址:荃灣荃華街3號悅來坊地下G10號舖
FB:https://www.facebook.com/Teishoku8HK/?fref=ts

 
5. 創新食法 出煙玉子燒

玉子燒大家食唔少,不過呢個玉子燒就應該連日本人都未試過。呢間玉子燒專門店嘅出品唔單止有凍食同熱食兩類,最特別嘅係,玉子燒捲好之後,就放入紙盒蓋上膠蓋,由膠蓋上嘅洞口注入美國核桃木煙薰,焗2-3分鐘(甜味:2分鐘、鹹味:3分鐘),令玉子燒更有層次,蛋香更突出。當日最多人揀嘅係紫菜明太子味同紫薯味,嘩,真係好吸引!明太子辣辣哋,加埋紫菜,好特別!玉子燒本身係甜,加埋用新鮮紫薯整成嘅紫薯蓉餡,甜得自然又有粒粒紫薯,好夾呀!
 

圖:emily_hkfoodie@IG
 
煙燻玉子燒
地址:荃灣鱟地坊80-84號華成樓B座地下B3號舖
FB:https://www.facebook.com/SmokedTamago/?fref=ts

 
6. . 西式甜品新成員

餐廳上個月先開,地膽朋友住附近梗係知啦,但小編見到網上已經有食家發現咗佢,仲話啲甜品多款又好味!呢度啲甜品都幾齊,有心太軟、窩夫、蜜糖吐司、芭菲……中曬宜家甜姐兒鍾意食嘅嘢。小食都有,真係好貼心!最近佢做埋夜市,例如意粉、all day breakfast,掂啦!
 

圖:Leaves Dessert Café FB
 
Leaves Dessert Cafe
地址:荃灣沙咀道328號寶石大廈地下G2A舖
FB:https://www.facebook.com/Leaves-Dessert-Cafe-1109953142361198/?fref=ts

 
7. 真心抵!睇得又食得甜品

荃灣食甜品,大家都知路德圍嗰邊有好多間,夜晚就大排長龍,但唔係間間都好味,價錢又唔算抵。地膽介紹轉個場地食飯,之後去呢間食甜品就可以避開人潮。呢間甜品店開咗一年多啲,但已經喺 Instagram 洗版。網民大讚佢嘅抹茶甜品做得好,可以話係新界區嘅抹茶天堂!呢個叫煎餅金時,喺抹茶雪糕隔離就插咗三大塊抹茶煎餅,超濃抹茶味,而且脆卜卜。雪糕啲抹茶味都勁,但就溶得快,要食快啲。紫薯心太軟一樣「掂」,真材實料,堅有紫薯味,好過唔少其他甜品店嘅出品。
 

圖:tocoffee@IG、yuirene@IG
 
Ideas Dessert
地址:荃灣荃貴街10A號富麗花園商場A座地下13B及15號舖
FB:https://www.facebook.com/ideas.dessert/?fref=ts

 
8. 就是喜歡Eat With 雞蛋仔

唔知幾時開始,雞蛋仔就由街頭小食升格成為一店之主,呢間小店入面所有嘢都用雞蛋仔做靈魂,有唔少鹹甜嘅新奇配搭,如「肉醬」配雞蛋仔就好似食咗個漢堡包咁。最近就以《愛麗斯夢遊仙境》做主題,出咗新嘢,成個 high tea set 咁!最特別就係呢個用雞蛋仔同其他食材整到好似成個三文治咁,呃 Like 又飽肚!甜食就一定係配雪糕啦,爽呀!
 

圖:Eat With Me FB 、hktablefor2 @IG
 
Eat with Me
地址:荃灣四陂坊12號雅緻樓地下D舖
FB:https://www.facebook.com/eatwithmehk/?fref=ts
 
 
9. 街坊價食炸雞

「星星熱」過後,炸雞店數目多咗,但價錢就愈來愈貴,有時想食都係食返K記。而荃灣呢間韓食小店主要做街坊生意,炸雞有得揀半隻同全隻,半隻都係$78,約7-8件,2個人 share 啱啱好。炸雞有4款口味:原味、醃醬辣味、香蔥同醬油。醃醬辣味炸雞就有韓國特色啲,有韓式辣醬味,加咗蒜蓉同洋葱蓉……味道特別。而香蔥炸雞好吸睛,雞上面有一座堆到好高嘅蔥山,雖然無汁,但雞炸得唔油,皮脆而肉嫩又 juciy!
 

圖:edithedithedithedith @IG
 
KOKIO 韓國料理
地址:荃灣荃華街36-48號富麗花園A座地下15A舖

 
10. 荃灣街頭嘆墨西哥風味小食

路德圍食店愈來愈多樣化,最近更加衝出亞洲,開出咗食墨西哥捲餅嘅食店。捲餅唔只有豬、牛、雞呢三種肉類餡料,仲有宜家好受歡迎嘅 superfood 牛油果(配煙三文魚),感覺即刻唔同咗,變成健康小食!除咗捲餅,仲有唔同小食,好似燕麥紫薯波、芝士粟米筒等,甜品迷嘅我見到餐牌上有「車打芝士煉奶捲餅」就兩眼發光,決定下次要食!


圖:捲餅兄弟FB
 
捲餅兄弟
地址:荃灣荃興徑25 - 31號
FB:https://www.facebook.com/burritobrother/
 
係咪睇到好肚餓,好想即刻飛入荃灣食曬佢哋呢?快啲啦!睇完LIKE埋我哋Facebook,之後就唔會錯過咗我哋最新嘅【香港好去處】推介啦!
 
重溫:【香港好去處】走遍荃灣尋覓8大特色美食 齊齊食好西!

Edited by CLASSES



新聞資訊