香港好去處-鰂魚涌太古打工仔注意Lunch-Dinner好嘢食湧住嚟 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2016年08月17日
【香港好去處】鰂魚涌太古打工仔注意!Lunch Dinner 好嘢食湧住嚟
【香港好去處】鰂魚涌太古打工仔注意!Lunch Dinner 好嘢食湧住嚟

太古、鰂魚涌呢兩個地方雖然寫字樓多,舖租貴,一直以嚟區內嘅食肆大多數係連鎖餐廳。不過,最近就變天喇!因為呢兩個地方都有個好吸引嘅 Food Court!我呢位 CLASSES 最為食嘅小編就梗係唔可以錯過啦,跟我嚟啦!
 
第一站:7號美食共和國



長過手掌鰻魚漢堡! 

鰻魚飯、鰻魚手卷、鰻魚壽司就食唔少,但鰻魚漢堡就真係第一次見!咁創新嘅嘢食,小編我都係第一次聽,咁就梗係要試喇!去拎食物嗰時,見到條鰻魚咁長咁大條,真係嚇一跳!你睇,仲長過小編隻手呢~


 
鰻魚同包夾唔夾架?食之前,同事話驚好乾,又驚中伏,食完一啖之後,佢仲食得快過小編囉。鰻魚好長,好厚身;雖然唔係好貴嗰啲,不過勝在夠軟,皮唔韌,而且無骨,已經好過好多鰻魚飯嘅鰻魚。除咗鰻魚,中間仲有蛋同醬汁,所以食落一啲都唔覺乾。個包仲要係竹炭包,感覺又矜貴咗。
 
Za爺煮意 Master Za's Kitchen
地址:7號美食共和國I舖
 

足料特色壽司長龍卷

呢間餐廳最吸睛嘅就係特色壽司卷,除咗啲名特別之外,好似「日本之活火山」、「午夜牛郎」、「忘不了你」同「煙花之夜」……連上檯時個樣都好型格!呢個「金龍卷」真係擺到「S」形,好似條龍尾咁!



金龍卷外面有生的三文魚,上面有啲芝士,而中間就捲有炸蝦、芝士同紫菜。炸蝦一啲都唔稔,爽口,炸過嘅皮同紫菜一樣咁脆,。而三文魚雖然唔係一大片,但配埋啲飯同蝦一齊食,感覺清新啲!除咗卷物,呢度仲有拉麵、刺身、定食同好多日式小食,絕對係唔錯嘅選擇!
 
古今二
地址:鰂魚涌英皇道971號英皇大樓2樓F舖
 
「勁拉芝」鐵板芝士烤雞+鐵板芝士炒年糕
小編無諗過呢度嘅韓式餐廳會咁潮,竟然有新派嘅韓國嘢食,唔單止有炸雞,仲有芝士炒年糕、芝士雞蛋卷、芝士烤雞同芝士泡菜炒飯。嘩,真係潮到不得了喇!平時嗰啲 CANTEEN 最叻都係有炒粉絲同石鍋飯,真係估唔到可以遇上芝士食物,仲可以拉芝!



你睇下個鐵板芝士烤雞,上面舖滿勁多芝士,見到都狂吞口水。撈勻嚟食,一定唔可以錯過呢個難得嘅「拉芝」效果!除咗芝士多,味道都好好架!雞肉嫩滑,一啖一件,啱啱好。韓式辣醬好惹味,唔會過鹹,味道恰當。雖然食到出汗,但就係好味到令人停唔到口!
 
藝餐
地址:鰂魚涌英皇道971號英皇大樓2樓H舖
 
7號美食共和國其實係乜?

「7號美食共和國」係一個集合咗9間唔同菜式嘅餐廳嘅 Food Court,除咗頭先介紹嘅日式、西式同韓式之外,仲有星馬越、台式、印巴菜、米線同港式美食。呢個 Food Court 有位於鰂魚涌電車路,坐地鐵之後出 A  出口過對面馬路就到,超方便!上到去有個大 MENU 可以一次過睇曬有啲咩食,就可以去落單。之後將飛仔交到你點嘅食物所屬嘅餐廳,就可以等熱辣辣嘅食物出爐喇。
 
地址:鰂魚涌英皇道971號英皇大樓2樓
 
往太古方向行5-10分鐘,就會去到另一個食好嘢嘅天堂!
 
第二站:Aeon Style
 
搶鏡爆靚果撻

一入 Aeon,就見到麵包店同呢個賣果撻嘅餅店。原來呢間係 Italian Tomatoes 嘅品牌,今次首次由東京引入!玻璃櫃擺放咗唔同款式唔同大細嘅法式果撻,真係超吸引。當日就有提子撻、香橙撻、朱古力紅桑子撻同士多啤梨撻等等。睇見啲提子咁大粒,加上宜家係食提子嘅季節,就揀咗提子撻。



唔係講笑,啲提子唔單止大粒,仲好清甜,又爽口彈牙,真係好正!其他果撻都勁足料,又用時令水果,賣相又靚爆鏡!撻底同撻皮都好味,唔會好膩。聽講遲啲會有其他味嘅果撻,亦都會有鹹批!
 
Fari-Beurre
地址:太古康山道1-2號康怡廣場南座 AEON 地下G09-10號舖
 
即點即做大阪燒章魚燒

呢度真係好「日本」!點解咁講,因為呢間小食店竟然好傳統咁同時提供大阪燒同廣島燒,跟足日本。廣島燒比較複雜,又要加麵同豬肉,所以平時唔多地方有得食。不過小編當日都係揀咗「大阪燒」同「章灸燒」。兩款都係用日本入口嘅專用麵粉製作,喺大家面前即叫即整,齋係企喺度睇都令人流曬口水!食落好足料,中間大大粒章魚,正呀!



Cona Cona
地址:太古康山道1-2號康怡廣場南座AEON地下
 
相機食先呃Like必食花花甜品
 
估唔到喺呢度見到呢間喺銅鑼灣由韓國人開嘅花花甜品店!餐廳一邊係賣乾花鮮花,另一邊就賣花花甜品,有唧花蛋糕同沙冰!無論係蛋糕或刨冰,上面都有一朵朵用豆蓉唧成嘅鮮花,睇得又食得,唔怪得吸引到咁多女仔入去啦!


圖:missishyuen & noelhahababa @Openrice
 
Flori Flower & Korean Dessert Cafe
地址:太古康山道1-2號康怡廣場南座 AEON 地下 G01-G02 號舖
 
除咗呢幾間食店之外,其實嗰度仲有其他食店,食魚生飯、鐵板燒、上海菜……同樣好似個大食堂!隔離就係超級市場,可以食完再買嘢返屋企再食,好方便!
 
第三站:康怡廣場MOS Café
 
爆漿!Super Food 牛油果漢堡

MOS Burger 喺香港引進 MOS Café 之後,食物都開始變得創新!好似呢個「牛油果漢堡」,真係夠曬新意同誠意!包勁大個,塊漢堡扒又厚,望上去肉汁都多!重點係啲牛油果!餐廳將牛油果打到蓉,之後放到餡料同麵包中間。你睇,啲蓉滿到「咇」曬出嚟,一咬個包就好似爆漿一樣!漢堡扒唔單止 juicy,而且肉味濃!



MOS Cafe
太古康山道1-2號康怡廣場北座1樓F20號舖
 
係咪無諗過呢兩個地方宜家有咁多嘢食呢?梗係啦,每個人最開心嘅時刻就係可以同鍾意嘅人一齊食好嘢嘛,無好嘢食,無好去處,點講得通喎?快啲嚟睇下有咩其他好去處啦!

延伸閱讀:
【香港好去處】元朗搵食Trip 邊走邊食12個好介紹
【香港好去處】沙田大圍-新舊美食11個好介紹
【香港好去處】走進西灣河 太安樓 冷氣叮叮一日遊
【香港好去處】上環10間必食小店
【香港好去處】走入大埔密密食
【香港好去處】美孚荔枝角邊走邊食

大家支持一下CLASSES KITCHEN 嘅煮食教學啦!

Edited by CLASSES



新聞資訊