香港好去處-輕鬆搭地鐵去黃埔食勻區內美食 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2016年10月04日
【香港好去處】輕鬆搭地鐵去黃埔 食勻區內美食
【香港好去處】輕鬆搭地鐵去黃埔 食勻區內美食
 
觀塘線延線就嚟通車喇,為食小編終於可以由新界極速去到黃埔搵食,清下張美食清單。話你知丫,其實黃埔紅磡一直都係個美食集中地,雖然有紅磡站,不過去食好嘢始終遠咗啲,唔太就腳。宜家黃埔站嘅位置可以話係比紅磡站更紅磡,每個出口都總有美食喺附近,真係啱曬各位為食嘅Classmates 喇!
 
1. 一切就流 真.熔岩蛋包飯

成日係網上見到日本嘅蛋包飯一切即流,每次睇完都會流曬口水。不過,呢個情況應該唔會再出現喇!因為香港都有餐廳供應呢種蛋包飯,就係紅磡咋!呢間餐廳開咗無耐,啲蛋包飯就立即成為「相機食先」嘅少男少女嘅頭號目標,頻頻排隊去食。雞蛋未切之前震騰騰,由此可知裡面嘅蛋汁有幾咁澎湃!蛋皮很滑,用刀輕切,蛋汁開始湧出嚟,好似心太軟嗰種效果。最後用刀撥一下,啲飯就被蛋包住咗。值得一提嘅係,飯唔係白飯,而係炒過架,值得欣賞!


圖:foodaholicgals@IG
影片:cathy_sxch@IG


 

Renee :)(@renee1026_foodie)張貼的影片 張貼


Asobu Bistro
地址:紅磡德民街29號德民大厦地下D3號舖
FB:https://www.facebook.com/asobubistro/
 
2. 傳聞:全香港最好味嘅鰻魚飯

鰻魚愈食愈貴,坊間唔少日式餐廳食個鰻魚飯動輒都百多二百元,質素亦參差。網上有傳聞話紅磡呢間小店嘅鰻魚飯有可能係全港全香港最好味嘅鰻魚飯,真係要嚟試下。鰻魚大大塊咁舖喺沾上鰻魚汁嘅白飯上面,鰻魚勁厚身,又燒得靚,上1面啲汁又夠,食落啖啖肉,又嫩滑,勁惹味,佐飯一流! 幾錢?90蚊有找,真係要食多碗呀!


圖:Lawrence Memories @FB
 
三河屋MIKAWAYA
地址:紅磡明安街14號寶石戲院大廈地下D舖
 
3. 生必到 輕食甜品café

女仔想瘦,但又偏偏鍾意食甜品。既然甜品唔可以唔食,就唯有正餐食輕怡啲啦!Café Charm’s就睇中女生心態,所以店內食物都係輕食同賣相極吸引嘅甜品。淨係窩夫,就已經有五六款,除咗大熱嘅抹茶紫薯味之外,仲有Oreo及朱古力布朗尼、焦糖香蕉、士多啤梨等等。輕食就有沙律、意粉同漢堡包,最特別嘅就係「芝士炸雞窩夫」,真係講起都想食。



Café Charm’s
地址:紅磡黃埔花園第3期百寶坊G27號地舖
FB: https://www.facebook.com/cafecharms/?fref=ts
 
4. 深夜「宵」一燒

食宵夜呢個動作雖然邪惡,但係有時餓起上嚟真係會忍唔到口。睇完演唱會嘅話,可以嚟寶其利街食返轉宵夜。呢度有2間人氣小食店,一間就專賣串燒,一間就賣串燒之外,仲有雞蛋腸粉、車仔麵……燒燒賣都有,真係想食乜都有!你睇,雞翼燒得幾靚,真係好想食呀!


圖:hayheyman@IG、hkwanderlust@OP(美味佳)及大食積神@OP (千味燒)
 
美味佳
地址:紅磡寶其利街2號
 
千味燒
地址:紅磡寶其利街12號地舖
 
5. 雞排的非凡魔法

自豪大大之後,呢間過江龍雞排店喺台灣一樣好巴閉,自2010年開業以嚟就已經開咗唔少分店,台灣以外,內地都有約200間。究竟啲雞扒有咩魔力?原來一切在於自由選擇!由「醃味」、「炸皮」以至到灑上邊種「味粉」都可以由客人自己揀。人就係鍾意有得揀,唔怪得咁多人捧場。雞扒大大塊,食落外皮酥脆!炸完之後,雞肉都仲保留到肉汁,超juicy,咁咪俘虜到港人嘅味覺囉!


圖:zhangyutinggg@IG

魔法雞排
地址:紅磡德民街1-15號地下A4A舖
FB:https://www.facebook.com/wemadechicken/
 
6. 現場製作 純手工拉麵

估唔到,今時今日仲有人會喺店內現場即製拉麵!拉麵師傅每日親自喺店內打麵,麵條有寬麵、粗麵及幼麵三種選擇。為食小編點咗幼麵,麵條食起嚟好彈牙,有口感,就算食到最後嘅麵條,都無過稔,同平時食嘅唔同,手打即製果然係唔同啲!


圖:chloehahahaha@OP
 
牛肉拉麵
地址:紅磡明安街25號地舖
 
7. 蟹迷開心大發現!

呢度咖啡店話就話係Café,但原來內有乾坤!呢度可以變身做咖啡店私房菜館。當中最驚為天人嘅係呢個蟹肉凍餅!以為係蛋糕麵包咁簡單,咁你就大錯特錯!其實呢個蟹餅極考工夫,因為要將蟹肉同蝦肉整碎,之後整成呢個糕餅形狀!層次豐富,上層有芒果同芝士混合物,中間就有蟹肉同蝦肉(多到爆),最底層就係消化餅底,足料好味,蟹迷一定超鍾意!


圖:meilunchan@IG
 
咖啡煮意
地址:紅磡馬頭圍道37-39號紅磡廣場地下67號
 
8. 令人懷念的台式早餐

有時星期六日想回味下台灣味道,可惜香港供應台式早餐嘅店舖絕無僅有。除咗蛋餅,你又懷念邊種台灣味道呢?「鹹豆漿粢飯」又會唔會係你嘅心水選擇呢?估唔到,在香港都可以食到鹹豆漿粢飯,真係令人感動。粢飯大件好足料,油炸鬼、榨菜同肉鬆都有,油炸鬼好脆!至於豆漿,有豆香,裡面都有油炸鬼同榨菜,另外仲加咗蔥花同蝦皮,溫度恰好,配粢飯食真係唔錯!


圖:Koeykaren@OP、mslky2003@OP
 
滿堂樂滬京風味
地址:紅磡明安街4號
 
9. All Day Breakfast 溝熱狗?

食All Day Breakfast,最令人感動滿足嘅一定係嗰隻半生不熟嘅Egg Benedict!當你將佢切開,蛋汁勢將蜂湧而出嘅時候,嗰一刻嘅你一定雙眼發光。原來,今時今日食熱狗都可以Mix 班迪尼蛋!紅磡呢間熱狗店就出咗「爆醬班尼迪熱狗」,特別之處就係用熱狗裡面藏有一隻班迪尼蛋,另外仲有煎香嘅煙肉同雞肉腸,淋埋荷蘭醬汁!食嗰時,將蛋切開,蛋漿一發不可收拾!真係比食All Day Breakfast更滿足!


圖:sy_miko@IG
 
1987 Hot Dog
地址:紅磡差館里21-27富業大廈地下5號舖
 
同區仲有另一間出名嘅熱狗店,之前為食小編都有介紹過,招牌熔岩芝士熱狗絕對要試!

【延伸閱讀】邪惡至極 全港必試瘋.芝美食
 
10. 街坊之選甜品店

區內有唔少甜品店,不過大多數街坊都推介呢間,仲話佢嘅紅豆冰同其他地方好唔同,值得一試。傾談之間,小編都好似有啲印象,原來之前有介紹過,諗返都想食返個回味下。
 
重溫【2014精選「相機先食」甜品店(下)】


圖:YCL=]@OP
 
糖蓮子
地址:紅磡蕪湖街68號光明閣地下D舖
 
11. 再度回歸 依然美味

喺港島區或者新界區食清湯腩,或者你會即時諗起幾個好選擇。嚟到九龍區,就唔可以唔提「八寶」喇!八寶煮意上年告別之前,唔少食客都趕去食最後一碗清湯腩。近日,「八寶」重臨紅磡,皆大歡喜,清湯腩水準依然。凈牛寶包括坑腩、爽腩同崩砂腩。件件牛腩都有少少脂肪,口感軟滑而甘腴,齒頰留香。雖然係貴,但可以一次過試曬三寶就豪一次咁多!


圖:fabricelau@IG
 
八寶煮意
地址:紅磡鶴園街2G號恆豐工業大廈第2期地下B2舖
 
12. 掃街必食腸粉

唔知點解,去到邊一區都總係有一間必食腸粉店。嚟到紅磡,就有林記小食!腸粉軟滑,但唔會一拮就爛。每一層腸粉都好薄,但冇穿冇爛,包得夠實淨。再按照個人喜好加埋豉油、甜醬、麻醬、辣醬同芝麻,熱辣辣咁趁新鮮快啲食,呢個先係掃街嘅樂趣!
 

圖:yeemanjaii@IG
 
林記小食
地址:紅磡差館里21 號
 
13. 隱藏的秘密:茶記晚市變身名不虛傳膏蟹店

如果唔係有人話我知,都唔會知道呢間茶餐廳原來係食蟹嘅專門店!呢間茶記白天就係普通茶記,晚市就會變身成膏蟹專門店。好多蟹迷專程去食「生滾膏蟹粥」同「膏蟹蒸飯」。呢兩樣食物,聽個名都知道厲害啦!前者粥底夠綿,裡面有一大隻蟹,粥吸引咗蟹嘅精華,食起嚟有蟹味,蟹肉又鮮甜,粥裡面啲蟹膏更加係唔可以錯過。蒸飯都好好味,蟹膏嘅精華同油脂都滲透每顆飯粒,真係無得彈!
 

圖:mika921@OP及coyeechung@OP
 
生記茶餐廳
紅磡老龍坑街13號地下
 
其實呢區又點止咁少好嘢食丫!時新、蒙麵、紅磡雞蛋仔同媽咪雞蛋仔呢啲就唔使小編講,大家都知啦!不過,隨住黃埔站通車,相信呢區會好似西環咁愈來愈多食肆進駐,AEON Style都加入咗好似西灣河Aeon Style嘅Food Court 元素呀,大家要繼續留意喇!
 
重溫下Aeon Style有咩食?
【香港好去處】鰂魚涌太古打工仔注意!Lunch Dinner 好嘢食湧住嚟
 

  Edited by CLASSES



新聞資訊