香港好去處-走進西灣河-太安樓-冷氣叮叮一日遊 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2016年06月17日
【香港好去處】走進西灣河 + 太安樓 冷氣叮叮一日遊
【香港好去處】走進西灣河 + 太安樓 冷氣叮叮一日遊

等咗好耐,今次為食小編決定帶大家去遠啲搵食,過海去東區食好嘢!去港島區,梗係要坐下叮叮啦!驚熱?怕乜丫,宜家有冷氣叮叮,你想食勻電車沿線都無問題!呢次就去西灣河啦,搭叮叮就喺「太安街」站落車喇!


1. 地踎超滑抵食港式蛋包飯
上年網上瘋傳呢間餐廳嘅咖哩蛋包飯,吸引咗好多區外人去食,搞到本來只開午市嘅小店都做埋晚市。小店位唔多,客人要喺後巷食,但為咗美食,大家都唔介意。蛋包飯即叫即整,蛋皮煎到半熟,有流心效果,食落入口嫩滑;特別嘅係係裡面嘅飯係炒底,仲加埋雞肉炒!咖哩汁淋喺蛋上面,甜甜哋又唔辣,配埋飲品都係$35蚊咋!日日食都肯呀!

華記士多

華記士多
地址:西灣河筲箕灣道48號地下3B號



2. 平價好味海南雞
海南雞可以有幾平呀,連鎖快餐店閒閒哋都收四五十蚊喎;好味嘅話,差唔多一百啦!唔信嘅,就跟住嚟啦!呢間位於大安樓嘅海南雞專門店,一碗海南雞飯配餐湯都只係$25(配埋雞腎都係多$5)!賣相好吸引,雞肉嫩滑,無骨,夠方便,雞皮爽滑;配嘅油飯好香但唔膩,口感軟硬適中,係水準之作,性價比好高呀!

海南雞專門店
圖片來源:carcarcarcarwong @IG

海南雞專門店(第二分店)
地址:西灣河筲箕灣道57-87號太安樓地下A32B號舖



3. 預測:香港十大雞蛋仔大熱候選人
太安樓有2間雞蛋仔店,呢間人流就明顯多啲,網上亦有唔少人推介,應該好味啲?「鴻記」嘅雞蛋仔即叫即做,寫明需時4至5分鐘,買咗之後去隔離食其他嘢再返去拎都得。拎住喺手,未食都已經聞到好香嘅蛋味,雞蛋仔外脆內軟,中間唔係空心,但唔會太「實」太「硬」,口感香脆又鬆軟。呢度只供應原味雞蛋仔,唔少人都食夾餅,除咗原味,仲有朱古力同士多啤梨味,有機會去到就試埋喇!

鴻記極品雞蛋仔
圖片來源:foodexploreyumm @IG

鴻記極品雞蛋仔
地址:西灣河筲箕灣道57-87號太安樓第二街A34C號鋪



4. 大大粒自家製粉果
除咗魚蛋燒賣,如果攤檔賣埋粉果,有一班人的確會選擇買粉果。呢度嘅粉果係自家製,同其他地方賣嘅唔同。大大粒粉果,外皮食落有彈性,餡料就有豬肉碎同沙葛,好多人食完其他嘢,都會過去買幾個返屋企食,係太安樓必食之選!

娥姐粉菓
圖片來源:HK Epicurus @OpenRice

娥姐粉菓
地址:西灣河筲箕灣道57-87號太安樓地下A01舖



5. 最得街坊歡心嘅茶檔
無論點變,茶記依然係唔少香港人嘅選擇。,而每一區都總會有一間特別受歡迎。喺西灣河市政大廈熟食中心裡面嘅興民咖啡奶茶唔單止價錢夠貼地,食物質素都唔錯。你睇,呢個「牛扒餐肉多」,真係諗都無諗過塊牛扒會咁靚,咁足料!多士又烘得金黃又夠脆!更加難得嘅係,伙記服務態度好,同熟客有傾有講,仲會講下笑話,唔怪得咁多街坊支持啦!

興民咖啡奶茶
圖片來源:為食瑜珈豬九號 @OpenRice

興民咖啡奶茶
地址:西灣河太安街12號西灣河市政大廈地下熟食中心C3號舖



6. 菲律賓人主理嘅超好味車仔麵
真係估唔到呢度竟然有間唔係地道香港人下廚,但係好好味嘅車仔麵店,到底堅唔堅架?腩汁加辣勁惹味,米線好滑,就算食到最後吸咗啲湯,都唔會斷開一截截,又唔覺得腍咗。豬皮豬腸夠入味,豬皮又好滑,咁大碗都只係$29蚊!真係值得回頭呀!出咗門口,見到舖名先知道原來呢度叫「超級無敵車仔麵」,仲要開到凌晨3點,半夜肚餓都可以食到車仔麵,咁好服務,真係「超級無敵」喇!

超級無敵車仔麵
圖片來源:Mandymanlovefood @IG

超級無敵車仔麵
地址:西灣河西灣河街116號地下
FB:www.facebook.com/SuperDuperNoodles


文章重溫:香港十大最好味車仔麵推介


7. 掃街指定動作:篤魚蛋
嚟到太安樓,講到篤魚蛋,就一定係去「呀伯魚蛋」啦!搵唔到?咪即係「魚蛋佬」囉。呢間魚蛋店好出名,以前係阿伯做,就叫「呀伯魚蛋」,宜家子承父業,就改名叫「魚蛋佬」。食魚蛋,個汁先係重點。呢度啲汁係秘製,甜得嚟又有又少少辣,好惹味,令人食完一串又一串。

魚蛋佬
圖片來源:karencky @IG

魚蛋佬
地址:西灣河筲箕灣道57-87號太安樓地下A28號B舖



8. 點都要滿足下個甜品胃
有呀伯,就梗係有阿婆啦!呢位阿婆係賣中式糖水嘅,好似紅豆沙、綠豆沙同芝麻糊呢啲就一定唔少得,夏天可以食芒果西米露、涼粉;綠豆沙有臭草,夠曬正宗足料,但又唔會過甜,啱曬食甜嘢但又怕肥嘅女生們啦。

阿婆糖水
圖片來源:foodiegloria @IG

阿婆糖水
地址:西灣河筲箕灣道57-87號太安樓28號舖


如果你想同時食埋中式以外甜品嘅話,可以去附近嘅「明記」喇!嗰度唔止有傳統嘅糖水,仲有綿綿冰、班戟、糯米糍同木糠布甸食。不過,原來佢嘅名物係唔同口味嘅木糠凍餅!凍餅有芒果、榴槤、抹茶、士多啤梨、朱古力同咖啡共6種口味,件件都好香奶味,食起上嚟又夠滑,睇落去以為係蛋糕,點知食嗰陣先發現好似雪糕咁會溶,好特別。

明記咖啡糖水小食
圖片來源:nal0r @IG

明記咖啡糖水小食
地址:西灣河西灣河街114號



9. 撐小店 輕鬆嘆特色自製西餅
呢間咖啡店雖然細細哋,但勝在食物種類多,又有特色。最吸引嘅一定係呢度獨有嘅西餅同蛋糕,好似野菌批、芒果芝士餅、鵝肝醬多士同埋英式蜜糖薑蛋糕,名物就有唔少IG foodies都盛讚好味到傻咗嘅「檸檬撻」……呢度賣嘅西餅特別得嚟價錢又唔貴,咁嘅小店,梗係要撐啦!

牡丹咖啡
圖片來源:moon_usako @IG;jessiewu_hksgi @IG;Wy_y @OpenRice

牡丹咖啡
地址:西灣河筲箕灣道117至119號地下G舖



10. 夜「燒」磨
食咩宵夜好?小編我一定揀串燒,因為超有風味。喺太安樓,一定會被呢間小食店嘅串燒吸引而至。嗰度嘅串燒係重慶燒烤嘅方法烤製,即叫即燒,燒到差唔多,就加孜然粉,嗰股咁獨特嘅香氣係重慶串燒先至有!鍾意嘅人,直頭會覺得「索一索,舒筋洞絡」呢。

東記小食
圖片來源:bageladdiction @UBlog

東記小食
地址:西灣河筲箕灣道57-87號太安樓地下A2-8及A2-9號舖


仲有另一間同樣係食串燒出名嘅,唔同嘅係用炭去燒,一樣咁有風味。其實,呢檔沙嗲佬之前係流動小販,上年先正式入舖,所以大家宜家要食就容易咗。雖然營運成本高咗,但老闆依然堅持用炭火將串燒烤到金黃,再倒入佢獨門秘製嘅沙嗲醬,肉同醬料嘅味道超夾,其他地方真係食唔到呢!

太安樓沙嗲佬

太安樓沙嗲佬
地址:西灣河筲箕灣道57-87號太安樓地舖A28C


當你身處太安樓裡面,你會覺得自己好幸福,因為你已經被美食緊緊地包圍住。小編個胃容量有限,一次實在試唔曬咁多,其他美食好似手抓餅、炸年糕同芝士餡餅其實都好吸引,你哋去開就幫我試埋佢啦!下次我哋再坐叮叮去另一區食過啦!


相關文章:
不能錯過的香港地道小食
【香港好去處】走入大埔密密食 10個好介紹

Edited by CLASSES



新聞資訊