香港好去處-美孚荔枝角邊走邊食 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2016年03月01日
【香港好去處】美孚荔枝角 邊走邊食
【香港好去處】美孚荔枝角 邊走邊食

放假想出街走走,醫下肚之餘,又可以逛一整天?唔想去郊外,又唔想去旺角尖咀銅鑼灣同人迫,到底可以去邊?小編介紹你去荔枝角同美孚啦!唔講你唔知呀,經過多年嘅變化,荔枝角唔少工業大廈已經活化咗,有啲介變咗齊文化同娛樂飲食於一身嘅商場,而美孚亦多咗新開嘅長龍食店……包你行足成日之餘又可以醫到肚呢!


1. 集潮流、文化、飲食及時尚生活於一身嘅工廈
工廈都有fashion?無錯,呢度前身係工廈,但已經活化成為商場,裡面有超過20,000平方呎嘅多用途空間同天台花園,地下至四樓係商場,當中有寫字樓、陳列室同工作室。



最特別嘅係,呢度唔同其他大商場,每個星期六日,呢度都會舉行唔同主題嘅「D2 Place Weekend Markets 周末市集」,令本地唔同嘅原創品牌有機會曝光,有更多人認識,推動本地創作文化,建立屬於年輕人嘅平台。

D2_PLACE

D2 Place
地址:長沙灣長義街9號
facebook:www.facebook.com/D2Place



2. 誘人紫色Café 嘆蛋糕
踏入D2 Place時,小編就已經被呢間裡外外都是紫色嘅 Cafe吸引住。Cafe門外有一輛紫得迷人嘅單車,酷愛單車嘅小編超想騎住架單車慢遊荔枝角同美孚。呢度唔係普通Café,只有咖啡同蛋糕,而係一間會提出埋泰式食品嘅Café,好似金邊粉、菠蘿炒飯、海南雞飯……連泰式椰汁芒果糯米都有,實在令人意外。不過,呢度紫得咁靚,又點可以唔試下紫色食物?

Ultra-Violet-princesshabi
圖片來源:princesshabi@IG

呢件紫薯蛋糕,性價比高。紫薯蓉人口軟滑,散發著淡淡的甜味,絕不失真;中間夾有海綿蛋糕,最下面就係為曲奇餅底,食完令人有種幸福感。最近仲推出咗「紫薯牛油卷」,紫薯迷記住唔好錯過喇!

Ultra-Violet-紫薯蛋糕-紫薯牛油卷

Ultra Violet
地址:荔枝角長義街9號D2 Place 地下V2號舖
Facebook:www.facebook.com/ultraviolet.hk



3. 凍冰冰特色牛扒
Tea Time都要鋸扒?係呀,因為呢塊扒好特別,而且得呢度有得食。Smokey Ice主打創意雪糕甜品,眼前呢塊識出煙嘅鐵板至尊牛扒,其實係雪糕!大大塊牛扒係用朱古力包住士多啤梨味嘅雪糕整成,比真牛扒更加有層次!隔離嘅薯餅其實係西多士,好鍾意食薯條嘅小編一心試下啲薯條,點知原來係燒過嘅香蕉,勁驚喜!

smokey-ice-purple-potato-ice-cream-smokey-stake

諗住食返個凍到出煙紫薯雪糕定下驚,嘩,點知食落去係熱架!原來係用熱嘅牛奶紫薯西米忌廉整成,裡面仲有埋朱古力Brownie喎,真係好盞鬼!

Smokey Ice
地址:荔枝角長義街9號D2 Place 1樓101號舖
Facebook:www.facebook.com/smokeyiced2place



4. 即叫即整3式窩夫
平時食窩夫都係大大件,每次只可以試到一種口味,完全滿足唔到有選擇困難的小編。今次喺D2 Place竟然有間咖啡店提供3式窩夫,一次過可以試3種口味,每塊窩夫嘅大小仲啱啱好。

PinkCoffee_july_loklok
圖片來源:july_loklok@IG

呢份3式窩夫係外脆內軟嘅比利時窩夫,即叫即製,每一件都唧咗忌廉同加咗果醬;窩夫香脆鬆軟,裡面亦綿密;上面仲配有蜜桃、士多啤梨同藍莓,酸酸甜甜。好味!臨走前竟然俾小編發現呢度有市面罕見嘅宇治抹茶蒙布朗(抹茶Mont Blanc),有機會要約個抹茶控去試!

PinkCoffee_0o0yummy0o0
圖片來源:0o0yummy0o0@IG

Pink Coffee
地址:荔枝角長義街9號D2 Place 3樓305號舖
Facebook:www.facebook.com/PinkCoffeeHK



5. 放假都要嘆返個早餐!
咁 Little Break Coffee and Kitchen 一定可以滿足到你。呢度最受客人歡迎嘅就係All Day Breakfast喇!好似呢個 “Ham So Excited”,用咗好似熱香餅嘅厚身Pancake夾住啲炒蛋、煙燻火腿同埋及脆煙肉,再配埋牛油同楓糖漿一齊食,甜甜鹹鹹咁,Pancake又夠鬆軟,食完真係令人好滿足架!

LittleBreakCoffee

除此之外,抹茶控不妨試下呢度嘅「特濃抹茶蛋糕」(配上鮮忌廉)。蛋糕抹茶味濃,質感實在但唔會過硬,似brownie嘅感覺。加埋啲忌廉一齊食,口感更滑,而且更加突出茶香。

Little Break Coffee & Kitchen
地址:荔枝角長義街9號D2 Place地下G03舖
Facebook:www.facebook.com/littlebreakcoffeeandkitchen



6. 走進中國古代庭院世界 嶺南之風
平時睇慣摩天大廈,每日都被高樓大廈包圍著,今次嚟到呢個充滿傳統古代庭院式嘅建築,穿梭於石林流水之間,心情即時變靚!呢個名為「嶺南之風」嘅庭院,喺荔枝角公園裡面。建築係嶺南風格,共有10個景區。整個庭院嘅中心是水池,周邊建築都是環繞著水池而向外伸延建成。設計係依足中國傳統庭院風格而建,就連早年嘅電視劇《宮心計》及《公主駕到》都係呢度取景拍攝。曾經出現過喺電視劇嘅場情都成為唔少人嘅影相打卡位!你又認唔認得呢?

石棋盤_嶺南之風
圖片來源:chris的小小世界@Blogspot

小編最有印象嘅就係呢個地上嘅象棋棋盤,每隻棋都好大粒,比小編個頭仲要大,唔通古代嘅人都有對「巨手」?另外,小編發現有人會喺呢度影畢業相、婚紗相……真係好特別喎!

嶺南之風

嶺南之風
地址:美孚美孚新邨以南的荔枝角公園三期
開放時間:星期一至日 07:00-23:00



7. 隱世足料街坊價車輪餅
車輪餅?乜嚟架?車輪餅其實即係日本街頭小食「大判燒」,亦即係類似長洲小食的「紅豆餅」。車輪餅小姐過年前開業,開業唔夠1星期,就已經喺Instagram 上面洗版。店舖藏身於一條小巷內,唔係專登去就根本唔會留意到。以為無乜人?小編之前去買嚟試,竟然驚見人龍,由排隊買至食物到手足足等咗1個鐘,都咪話唔受歡迎!

車輪餅小姐_搵食有僑

不過,當你見到個個足料兼爆餡嘅車輪餅嘅時候,你就會覺得好值得。小編試咗:流心日本宇治抹茶、自家低糖高纖紫薯、法國58%朱古力心太軟加香蕉及QQ朮麻糬士多啤梨Oreo,首推流心抹茶和朱古力香蕉,因為兩者中間都呈流心狀,未吃已經十分吸引,吃起來更是美味得很。前者抹茶味濃,甜味適中,並沒有蓋過抹茶味;後者朱古力和香蕉十分「夾」,加熱後的香蕉很軟,跟朱古力一起,口感特別!聽講陸續會有新味推出,每日只會隨機賣4款口味,想試鍾意嘅口味,要碰下運氣喇!


圖片來源:mavis_foodie@IG 及 搵食有僑 @ Blogspot

車輪餅小姐
地址:美孚美孚新村吉利徑19號50B7號舖
Facebook:www.facebook.com/Ms.wheelpie



8. 去美孚都要買手信
去元朗就話買老婆餅做手信唧,美孚有乜買呀?你真係有所不知喇,呢度最好的手信一定係多多餅店嘅「鳥結糖」。原來呢間嘅鳥結糖好出名,唔少外地遊客都識嚟呢度,之前過年好多人喺度辦年貨,十盒十盒咁買走,好誇張!最多人買嘅就係「雜錦鳥結糖包」,有齊八種口味:原味、杏仁、藍莓榛子、西梅杏仁、黑芝麻脆心、咖啡脆心、濃情朱古力脆心及薑汁杏仁,各有特色。

多多餅店_朱古力脆心鳥結糖

小編呢個朱古力迷最愛朱古力脆心口味,兩層鳥結糖之間夾住朱古力脆心,煙韌中帶來「脆」的口感。不過,最意外嘅係包裝紙與糖之間的那層如薄紗的米紙,它絕對是這糖的神來之筆,讓人回味。

多多餅店_咖啡脆心鳥結糖

多多餅店
地址:美孚新村百老匯街65號地下
Facebook:www.facebook.com/doordoorbakery



9. 長洲都無嘅糯米糍
糯米糍唔係長洲手信咩?點解嚟到美孚都要買?因為呢間啲糯米糍連長洲都冇囉!呢間嘅糯米糍唔單止皮薄餡靚又多汁,就連塊皮嘅製作都零舍有心思!糯米糍皮特別加入咗益力多、抹茶,甚至朱古力同黑糖呢啲元素,令大家食到唔同風味嘅糯米糍。

王孖記果子-芒果-士多啤梨

而王孖記果子本身係以賣新鮮水果為主,所以老闆就地取材,每日堅持新鮮製造,推出唔同水果嘅糯米糍,好似水蜜桃同奇異果,果肉大件得嚟,凈係望上去都已經知道幾咁鮮甜多汁,令人流曬口水!

王孖記果子-奇異果

王孖記果子 
地址:美孚新村第四期商場97A3號舖
Facebook:www.facebook.com/w.boysfruitstore

大家可以睇埋其他好去處介紹架>

Edited by CLASSES



新聞資訊