香港好去處-粉嶺十大平民美食 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2016年09月09日
【香港好去處】粉嶺十大平民美食
【香港好去處】粉嶺十大平民美食
 
小編之前帶大家食咗好多區嘅美食,最近有 CLASSMATES 話要報料,教小編入北區食好嘢。為食小編一向都唔係獨食之人,有好嘢梗係同大家開心「些牙」。原來北區唔止水貨多,美食都一樣多。唔講咁多,入粉嶺兜個圈醫肚先!
 
平靚正庶民美食 香滑豬腸粉

唔少人都鍾意掃街,所以食好嘢通常都係由小食開始。入到粉嶺,就點可以唔去湊熱鬧,去長期人龍店排隊,嘆返個靚腸粉呢?「四眼仔腸粉」由街邊檔做到入舖,有十幾年歷史,水準一定有保證啦。腸粉又平又好味,5蚊就有4條熱辣辣又白滑嘅腸粉,加埋自家製嘅甜醬同麻醬,特別滋味!
 

圖:為食鬆弛熊TK@OP
 
四眼仔腸粉
地址:粉嶺和隆街40B號地下
 
圓碌碌雞髀包

是但問個粉嶺人邊度有得食「雞髀包」,佢都應該答到你呢間麵包店。協香麵包西餅雖然店子細細,但就因為「雞髀包」而出名!麵包師傅將腸仔包嘅腸仔換成雞髀,雞髀原隻煎過,之後放入麵包裡面。賣相圓碌碌,得意之餘又好味,雞油滲咗入麵包內,麵包超香;加上雞髀肉有麵包包住,肉無變嚡,依然嫩滑多汁!小編宜家都想再食個!
 

圖:sophronia1995@OP
 
協香麵包西餅
地址:粉嶺聯和墟和隆街24號地下
 
香口邪惡炸物天堂

掃街期間,一定會抵抗唔住炸物嘅誘惑,何況呢間嘅炸物咁吸引!最受歡迎嘅係炸壽司,有腸仔同蟹柳兩款,大大件炸到金黃色,紫菜脆卜卜,飯外面食落似飯焦,中間就依然軟身,好得意!另外仲有炸飯球(蘑菇味),感覺就好似食緊炸意大利飯球咁!仲有炸芝士條、炸雪糕、炸芝士通心粉,真係好邪惡(但愈邪惡,愈想食)!
 

圖:雲津美食FB、himmy_food 及megacream@IG
 
雲津美食
地址:粉嶺聯和墟和隆街34號地舖
FB:https://www.facebook.com/wansnack
 
厚過多士 特厚蛋鹹牛肉餅

見到茶檔,就想坐低嘆杯奶茶,食返個多士。食咩多士?嚟到粉嶺漢興,梗係要試名物——蛋鹹牛肉配多士!唔好以為無乜特別,當你見到實物一定「嘩」出嚟!呢個多士好特別,除咗有4塊烘得香脆嘅多士,仲有蛋用鹹牛肉混合而成嘅勁厚蛋牛肉餅(但咁足料都只係賣$19蚊)!嗰刻除咗影相呃LIKE之外,最擔心一定係一個人點食得曬呀!(小編個胃無咁大喎)


圖:carrielingling IG
 
漢興茶檔
地址:粉嶺聯和墟聯興街3號地下B舖
 
風味依然 老字號豬手麵
喺區內屹立多年嘅群記,最出名就係豬手!豬手雖然只係白烚,但煮得夠稔,豬皮又爽脆,而且肉多骨少,大大啖咁食,超痛快!白烚豬手嘅湯豬骨味好濃,清得嚟又帶有肉味,真心正!舖埋有「牛肉」兩個字,因為呢度嘅牛丸都唔錯,爽口又彈牙!


圖:ansonia430@IG
 
群記牛肉圓豬手
地址:粉嶺聯和墟聯昌街5號豐景樓地下
 
隱世美味鰻魚飯

小編係鰻魚迷,每逢去到供應鰻魚飯嘅餐廳,都會挑戰店內嘅鰻魚飯。估唔到嚟到粉嶺,竟然都要挑戰鰻魚飯。據聞餐廳好隱秘,藏身喺工廈裡面,不過好多人都為咗個「蒲燒鰻魚蛋包飯」慕名而去!一大塊鰻魚舖在上面,超肥美;下面就係蛋包飯。蛋汁超多,蛋嘅口感香濃滑溜!蛋包裹住嘅飯唔係白飯,而係有用鰻魚汁炒過,真係落足工夫炮製呢!唔怪得咁多人山長水遠都去食啦!
 

圖:tobey1001@IG
 
What The Food Café
地址:粉嶺業豐街13號多利工業大廈1樓F室
FB:https://www.facebook.com/wtfcafehk/?fref=ts
 
蕃薯變主角開餐廳!

蕃薯好飽肚,以前更加係行軍打仗嘅主要糧食。話雖如此,但又點會諗到蕃薯可以變成主角,有埋主題餐廳呢?餐廳用「蕃薯」作為主要食材,自創多個蕃薯美食。例如蕃薯厚西多士,麵包中間夾住香甜嘅蕃薯蓉,炸好之後,食嗰陣加啲蜜糖同牛油,牛油同蜜糖慢慢滲入多士同蕃薯蓉之間,真係無得頂呀!另外,飲品都有蕃薯成分,我哋之前喺【港人必試的10款奶茶】都介紹過!講開又講,豬手都好正架!
 

圖:kenkwok78@IG、黃豆豆@FB
 
大蕃薯
地址:粉嶺聯和墟聯昌街7號地舖
 
仲有好多特別嘅西多士架,去食埋啦!-全港必食多士你要知
 
老牌經典扒房

舊式扒房愈來愈少,而粉嶺呢間真係 OLD SCHOOL 得嚟又幾 GRAND!原來以前係走高檔路線,洋人英軍係常客。只係睇外在裝修,都覺得零舍唔同,似去咗跑馬地多啲。宜家多數都係區內人幫襯,除咗扒,仲有西式焗飯、主菜小食同甜品,啱曬情侶同一家大細去懷舊一下。

圖:Winky Tse@FB及kate-hui@OP
 
雅士餐廳
地址:粉嶺聯和墟和豐街23號龍景樓地下(近聯興街)
 
的骰一口雞翼.邪惡甜品

呢間個名又苦又甜嘅Café,絕對係女仔最想去嘅一站!點解?因為呢度啲嘢食唔止靚,仲好鬼可愛。好似呢個「一口菠蘿釀雞翼」,一件一啖,啱曬唔想吮骨嘅女仔啦!味道酸酸甜甜,真係愈食愈想食!另外甜品同飲料都好吸引,石板街朱古力蛋糕朱古力味超濃,上面又有唔同顏色嘅棉花糖,呃LIKE贏曬!仲有「三色蜜糖厚多士」、「士多啤梨pancake」、「綠茶紅豆沙冰」同「碎曲奇咖啡沙冰」,真係好想全部試曬呀!
   

圖:Bittersweet咖啡館FB、Che@IG及 藍莓@OP
 
Bittersweet咖啡館
地址:粉嶺聯和墟和豐街和豐閣4號地下
FB:https://www.facebook.com/bittersweetcafehk/?fref=ts
 
日日新鮮食牛雜

粉嶺街坊真係有口福,除咗可以食到美味豬手,仲可以食到每日新鮮嘅牛雜。欽記嘅牛雜麵入面啲食材好齊全,有牛腸、牛肚、牛膀同牛肺,味道超香,超濃郁!聞到已經令人流曬口水!啲辣椒油都好正,食麵嗰時加少少已經好惹味!
 

圖:Bor Gor@FB
 
欽記麵家
地址:聯和墟和豐街和豐角3號
 
「粉嶺好遠喎?」遠,見仁見智啦!一切都係睇下你可以為美食去到幾盡唧!有咩好去處,好嘢食,或者想我哋介紹其他區嘅美食,快啲留言話畀小編知喇!

Edited by CLASSES



新聞資訊