香港好去處-築地市場之外灣仔10個必食點 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2016年06月27日
【香港好去處】築地市場之外灣仔10個必食點
【香港好去處】築地市場之外灣仔10個必食點

上次帶大家去咗西灣河搵好東西食,今次不如就去灣仔啦!大家都應該知道嚟緊灣仔會有築地魚生市場登陸,但其實除咗築地魚生之外,灣仔呢一年裡面都開咗唔少新食肆,當中好多都係日本嚟嘅品牌,咁鍾意日本嘅香港人,點可以唔試呀?


1. 估佢唔到咁特別嘅特色餃子
唔同地方都會食餃子,小編鍾情嘅始終係煎餃。當呢間日本連鎖餃子店要嚟香港時,小編我就已經決定要去喇!呢度嘅餃子每日新鮮包製,皮薄餡靚!最特別嘅係佢嘅餡料與別不同,有雞肉芝、生薑餃子、激辛餃子、SHAKE SHAKE 餃子……但最最最估佢唔到嘅係佢有甜餃——朱古力餃子!呢個仲係京都店最受歡迎嘅菜式!餃子皮包住日本品牌朱古力,雪凍之後再煎。食落去朱古力好似像慕絲咁滑,配埋個雲呢嗱味雪糕,真係無得輸!SHAKE SHAKE 餃子就將啲炸餃放入紙袋裡面,再加調味粉Shake勻先食,真係新奇有趣!小朋友去一定好開心!

餃餃餃子
圖片來源:chankathy @IG;chankathy@IG

餃餃 餃子
地址:灣仔廈門街31號地下
FB:www.facebook.com/chaochaogyoza



2. 嘆東京最佳咖啡
被評為東京最佳咖啡,外國人都專程去飲嘅Omotesando Koffee 月前落址灣仔,成為首家海外店。到底呢度嘅咖啡有咩過人之處?Omotesando Koffee 香港店用嘅咖啡豆同日本一樣,都係由小川咖啡室烘焙再直運到香港。香港店嘅駐場咖啡師都係由日本嚟,保證咖啡一樣飲到日本風味。而咖啡豆同樣分1號及2號,1號味甘,2號則甜中帶酸,迎合唔同客人需要。店家重點推介佢哋嘅Cappucino,佢哋嘅Cappuccino唔只味道好,而且相對特別滑。因為佢哋加入攪拌處理程序,將更多空氣打入咖啡裡面。而為咗迎合香港人口味,Omotesando Koffee 香港店推出咗香港限定嘅抹茶Latte,抹茶迷,Omotesando Koffee在呼喚你呢!

Omotesando-Coffee
圖片來源:size8istoomainstream@IG;nanajee @IG

Omotesando Koffee
地址:灣仔皇后大道東200號利東街G24-25號舖



3. 新鮮熱辣食薯片
熱辣辣嘅薯條就食得多,新鮮炸成嘅薯片你又食過未呢?唔使去日本,宜家香港都有得食喇!薯片即叫即炸,有波浪形同平切兩個口感選擇,你又可以揀加芝士或朱古力醬,再特別啲,仲可以加埋日本3.5生乳軟雪糕呢!除咗薯片,仲有薯條!最特別嘅係,Calbee Plus因應香港人口味,推出咗獨有嘅避風塘香辣味薯片,香港人去到又點可以唔試呢?嗰度仲有唔少嚟自日本卡樂B零食,大家以後去日本唔使搵得咁辛苦喇!

Okashi-Galleria
圖片來源:shefafoodie@IG;Omichael@IG

Okashi Galleria x Calbee Plus
地址:灣仔皇后大道東200號利東街地下G14-15號舖



4. 日過江甜點品牌開西餐
雖然日本手信多,但「雪茄卷蛋」你一定唔會唔識。出品「雪茄卷蛋」嘅日本品牌Yoku Moku喺灣仔開咗第一家西餐廳。餐廳有兩層,下層係微型酒吧,上層係用餐區,仲有半開放露台座位設計,夜晚去特別有feel!餐廳供應西日料理,唔少食材都係日本運嚟,質素高,個明太子溫泉蛋意粉就引死人!既然以甜品打響名堂,又點可以無甜品名物呢。名物南青山卷蛋入口軟滑、原味同奶茶都一樣好味!餐廳仲有其他甜品選擇,如士多啤梨夾心忌廉蛋糕,裡面就有原粒士多啤梨,啖啖果肉,超清新!

Blue-Brick-Bistro-by-Yoku-Moku
圖片來源:joycehaha820 @IG;inciris@IG
 
Blue Brick Bistro by Yoku Moku
地址:灣仔皇后大道東200號利東街地下G35號舖



5. 女仔至愛靚靚蛋糕店進駐灣仔
女仔最鍾意啲賣樣吸引嘅蛋糕甜品,因為可以呃LIKE嘛!而呢間Cake shop嘅蛋糕從來都係呃LIKE之選。只要佢一出現,全場嘅目光都會集中喺佢身上。名物「Uni-cone蛋糕」如甜筒倒插在蛋糕上,十分吸睛。蛋糕店近日從淺水灣搬到灣仔,蛋糕種類更多更吸引。夏天最啱食Summer Flourish,佢有荔枝啫喱,再加食用花瓣,見到已經心都動。中間有白桃、慕絲同雲呢拿蛋糕,絕對係夏日清新之選!其他啲蛋糕個樣都好靚,真係引死人!每件cake都係約$40或以上,都合理嘅。

Vive-Cake-Boutique
圖片來源:Vive Cake Boutique Facebook Page

Vive Cake Boutique
地址:灣仔皇后大道東200號利東街B樓05-06號舖
FB:www.facebook.com/vivecakeboutique



6. 「包」你飽 足料漢堡包
唔嚟灣仔都唔知,原來之前喺西灣河太安樓起家,賣手打牛肉漢堡嘅小食店搬咗去灣仔,唔怪得上次去太安樓唔見啦!新店大好多,仲有得坐,食物選擇都多咗。除咗漢堡包,仲有焗飯、扒同小食。不過,嚟呢度梗係食返個手打漢堡啦!漢堡即叫即製,麵包夠熱,上面佈滿芝麻,中間夾住一塊手打牛肉,仲有洋蔥同鮮蘑菇。小編貪心,加咗芝士、煙肉同煎蛋(追加餡料每款$5)!一啖咬落,勁滿足,勁痛快!包好軟熟,牛肉多汁有口感。真係好想食多個!可惜太飽了!

味口福
圖片來源:味口福Facebook
 
味口福
地址:灣仔灣仔道207號地舖
FB:www.facebook.com/WeiKouFu



7. 不朽經典火焰牛柳
港式老牌扒房愈來愈少,可能你知嘅都唔多,但呢間你就一定要知。呢間老扒房時至今日已經有50年歷史,70年代有個鐵板扒熱潮就係由呢間扒房掀起,而大家一定絕對唔可以錯過「鐵板火焰牛柳」,至今都仍然係餐廳嘅經典鎮店之寶!帶埋另一半去,唔只有得鋸扒,仲可以畀佢近距離見識下火燒牛柳嘅情景,話唔定仲開心。想食埋甜品,試埋個招牌甜品「火焰雪山」啦!嗰度嘅「火焰雪山」係小編食過最好味嘅!

波士頓餐廳
圖片來源:Kevinppixx @IG

波士頓餐廳
地址:灣仔盧押道3號地下



8. 送你一瓣……樹葉餅
呢塊嚟自東京嘅「樹葉餅」風靡唔少去日本嘅人,開幕後一直大受歡迎,日本當地有唔少名人都係Fans!樹葉餅係招牌嘢,用咗新鮮牛奶、牛油同麵粉製成,之後再摺疊成一共256層酥皮,再製成樹葉嘅形狀,食起嚟好鬆脆!另外一款好似棋子餅嘅曲奇,鹹鹹哋,牛油味勁香,啱曬唔多鍾意甜食嘅朋友呢! 臨走嗰時,可以去買返盒做手信呢!

Ginza-West
圖片來源:Ginza West @IG

Ginza West
地址:灣仔皇后大道東200號利東街G13號舖
FB:www.facebook.com/GinzaWestHK



9. 貼地立食丼丼飯堂
平時在日本菜餐廳吃一個海鮮丼,再平都要過百元,質素亦未必有保證。不過,最近灣仔就有一家專門食「丼」嘅餐廳,價錢又不貴,質素更相當不錯呢。食店嘅材料由日本、挪威等地直送,成本較貴,但店家好大方,刺身同飯嘅份量一樣多,超抵食。海鮮丼內嘅刺身粒粒厚切,飯嘅醋酸度恰恰好,令人回味。每碗$60蚊起就有交易,加多5蚊仲有麵豉湯同飲品,真係抵到貼地!唔怪得短短幾年就已經連開12間分店啦!雖然無提供座位,要立食,不過唔緊要啦,最緊要又抵又好食!

哲平食堂
圖片來源:caryiii @IG

哲平食堂
地址:灣仔克街6號地下B2號舖



10. 樓上親民價食高質刺身壽司
估唔到樓上唔只有café,宜家仲可以食壽司同刺身。呢度主打嘅係吞拿魚同拖羅刺身,想食得平又正嘅可以食佢超值嘅十蚊壽司。十蚊壽司選擇都多,有三文魚腩、火炙安格斯牛肉、油甘魚、芝士飛魚籽……特選鮪盛一客有6件,單睇到個樣都已覺得物有所值。件件厚切,而且筋絡清晰,脂肪多而均勻,食落肉質好又入口即融,充滿魚油香。10蚊壽司質素亦高,三文魚腩肥美新鮮,令人垂涎。

家賀屋刺身寿司
圖片來源:搵食有僑 @Blogspot;Handsome XO @OP

家賀屋刺身寿司專門店
地址:灣仔灣仔道83號1樓
FB:www.facebook.com/hhsushi


(突然感性MODE~)喺小編記憶中,灣仔係帶點舊舊哋嘅感覺,但係今次搵完食之後,先發現原來灣仔變咗好多!如果以電車路作分界線,走向皇后大道東嘅一方就愈來愈新潮時尚,而另一邊就保留住灣仔原來嘅色彩……嗯,又幾特別嘅~

下次大家想去邊區呀?快啲話我哋知啦!!!


相關文章:
走進西灣河 + 太安樓 冷氣叮叮一日遊
【香港好去處】走入大埔密密食 10個好介紹
【香港好去處 沙田大圍 】新舊美食11個好介紹

Edited by CLASSES



新聞資訊