香港好去處-沙田大圍-新舊美食11個好介紹 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2016年04月18日
【香港好去處】沙田、大圍 新舊美食11個好介紹
【香港好去處】沙田、大圍 新舊美食11個好介紹

沙田同大圍,睇落去好似好舊,而且主要係住宅區,無咩好行。其實,美食就在「人」間。愈多人住嘅地方,就愈多好嘢食!除咗一直出名好味嘅餐廳之外,近來愈來愈多新食肆進駐呢區,仲要間間都係好食架!唔信?就等小編帶你哋一齊捐窿捐罅,試齊區內嘅新舊美食啦!

即日手製無添加「堅」紫薯麵包
無諗過呢類咖啡店會喺大圍出現,店舖主打咖啡,提供輕食和一些自家製的手工麵包。不過,小編覺得最吸睛嘅一定係每日手製限量供應嘅麵包。由搓麵粉、做餡料、發酵,都係負責人每日喺店內即場搞掂,麵包真係好新鮮!紫薯包勁足料,中間嘅餡就係負責人親手用紫薯整成嘅蓉,沒加糖,沒加油!絕對是堅.紫薯包!除此之外,還有抹茶黑糖包、抺茶紅豆麻糬包、Oreo貝果及焦糖檸檬磅蛋糕等。

捐窿捐罅入沙田大圍試盡新舊美食-dearcoffeebakery

Dear Coffee & Bakery 
地址:大圍積運街2-8號海福花園地下22號舖
Facebook:www.facebook.com/dear.coffee.bakery



韓式菠蘿冰到底係點?
韓風真係無處不入!現在就連屋邨商場都被吹襲呢。大圍一個屋邨商場出現咗一間具韓國復古風裝潢的餐廳,食新式韓國菜。去到必食嘅一定係韓國漢拿山芝士炒飯、火焰芝士拉豬仔骨同埋韓國菠蘿冰。頭2個大家都知係乜,小編想特別介紹下「韓國菠蘿冰」。菠蘿冰用原個菠蘿製成,店員會將菠蘿肉抽走,之後將菠蘿心棄掉,用水、冰和餘下嘅菠蘿肉攪成沙冰,最後再倒入原來嘅菠蘿內。呢個原汁原味嘅菠蘿冰,飲一啖,爽呀!

捐窿捐罅入沙田大圍試盡新舊美食-sisterkoreacafe
圖片來源:iki_cheung @IG

Sister Korea Café
地址:大圍翠田街2號新翠商場地下17,18 &18A號舖
Facebook:www.facebook.com/Cafesister



日本都未必有得食嘅「炸壽司」
壽司、飯卷就食得多,但大圍有間餐廳竟然有「炸壽司」食。嘩!小編諗呢樣食物真係遠赴日本韓國都唔會食到。唔好以為係「伏」物,唔少人食過都話好食,仲推介話係「必食」。炸過嘅飯卷,外皮酥脆,但裡面嘅飯依然軟身,唔會硬;味道好,嗰汁同所有嘢感覺都好夾!係值得一試!

捐窿捐罅入沙田大圍試盡新舊美食-江南驛
圖片來源:victor_mak @IG

江南驛
地址:大圍田心村254號地下



韓國人氣吐司hit到嚟香港
韓國通嘅你一定唔會唔識呢間韓國連鎖咖啡店啦!識又點?因為佢最近喺香港開咗分店喇!識食梗係要食佢嘅人氣吐司啦!吐司有鹹有甜,不過香港女生一定鍾意食甜多啲。「蜂蜜奶油吐司」同「蜂蜜芝士吐司」都係小編心水。吐司即叫即烘,上檯嗰時熱辣辣,入口外脆內軟。加埋上面啲蜜糖、Cream、糖漿……超邪惡,但甜度恰好,正!另外一個「蜂蜜芝士吐司」,裡裡外外都有芝士味,鹹鹹哋;配埋清甜嘅蜜糖,夾到呢!

捐窿捐罅入沙田大圍試盡新舊美食-tomntoms
圖片來源:Tom N Toms Coffee @IG ; suk2w.heidi @IG

Tom N Toms Coffee
地址:沙田新城市廣場一期1樓158號舖
Facebook:www.facebook.com/tomntomshk



堂食Tony Wong 蛋糕!
Tony Wong 西餅大師嘅大名好多人都知,不過啲舖頭通常都唔就腳,有時經過想買嚟試下,又要拎走,無位堂食,企都無得企。但係,原來喺沙田嘅分店有得坐喺度食!去開就要食返夠本。蛋糕超多選擇,不過小編覺得最靚嘅始終都係招牌嘅玫瑰花蛋糕——士多啤梨玫瑰花蛋糕!蛋糕手工精緻,花瓣其實是白朱古力,但弧線和形態都處理得很好,整朵「花」栩栩如生。蛋糕亦具層次,忌廉同海綿蛋糕以及餅底都配合得超好!

捐窿捐罅入沙田大圍試盡新舊美食-tonywong
圖片來源:amychong1811 @IG

Patisserie Tony Wong
地址:沙田新城市廣場1期7樓704號舖
Facebook:www.facebook.com/PatisserieTonyWongofficial



隱世Pizza 高手!
如果唔係去開呢度,都唔會諗到嗰度有個食Pizza嘅好地方!跟新城市廣場約有5-10分鐘路程,但食物質素和價錢絕對令你覺得「行遠少少都係抵」。Pizza係自家手工搓製,屬於薄批類;入口香脆,不油膩。餡料多,但油分處理得好,吃數塊都沒有感到很膩呢。焗意粉和小食也是值得一試的。想慳時間,方便啲話,可以喺去到店舖之前30 分鐘先打電話預訂!不過,記得記得,店舖係星期二休息架!

捐窿捐罅入沙田大圍試盡新舊美食-星期二薄餅
圖片來源:funfun_choice @IG

星期二薄餅皇
地址:沙田排頭村12號



人氣必食:Pancake
呢間係日本過江龍,同Wired Café唔同嘅係,呢間主打Pancake同Hotcake。既然係咁,大家記住去嗰度食Pancake好喇!Pancake分熱凍2種,前者用煎鍋上,後者碟上。呢個沖繩甜薯黑糖Pancake用Pan上,吸睛度高;而且熱辣辣食,蛋香夠,入口軟綿綿,紫薯蓉唔會好甜,恰到好處!呢度亦有鹹版Pancake,好似「煙三文魚牛油果班戟」同用煙肉、生菜及蕃茄製成嘅「Rosie’s精選班戟」。

捐窿捐罅入沙田大圍試盡新舊美食-rosiescafe
圖片來源:winniethefood @IG

Rosie’s Café by Café Company
地址:沙田新城市廣場三期三樓A305號舖



Pantone 粉系女子至愛雞蛋仔
雞蛋仔係唔少香港人嘅心水小食,近年甚至揚威海外,香港亦多咗唔少雞蛋仔專門店,款式五花八門。呢間位於沙田第一城中心嘅「第一城冰站」,賣雞蛋仔同格仔餅賣到出曬名!客人可以揀雙拼,之前有人試過揀6拼!今期大熱Pantone色系,要拼就梗係拼呢個「粉紫(香芋)加粉紅(士多啤梨)」啦!放上網一定勁呃LIKE!

捐窿捐罅入沙田大圍試盡新舊美食-第一城冰站
圖片來源:HONG KONG FETCHEST @IG

第一城冰站
地址:沙田第一城中心地下G65號舖


港式和味大排檔
有人問,有無港式食物好介紹架?沙田作為昔日新界其中一個發展的新市鎮,是主要住宅用地,點可能無香港特色嘅食店呢?估唔到,到咗今時今日,屋邨裡面仲有大排檔。陳根記唔單止係區內居民嘅飯堂,更加唔少區外人士慕名而去。因為它係全場最旺,菜式創新,其他店舖都仿傚它,價錢合理。招牌菜Wasabi手撕雞絕對不容錯過。雞肉入口嫩滑,每絲大小恰好;重要的是wasabi味道辣而不嗆喉,令人愈食愈上癮。

捐窿捐罅入沙田大圍試盡新舊美食-陳根記
圖片來源:cat_fi_so @IG

陳根記
地址:沙田禾輋邨街市大牌檔3-5號



人情味火鍋店
舊區搵食,除咗食得有風味夠地道之外,最令人難忘的一定係「人情味」。店舖白天賣麵,晚上變身為火鍋店,有時會賣盆菜。老闆不是金錢為首的生意人,反而是他給老人免費贈麵這些事令他廣為人知。好吃的火鍋,材料一定要夠新鮮。盛記供應的是本地鮮牛肉,看這手切鮮肥牛,紅白分明,吃著必有嚼勁!有人更說,吃過這裡的牛肉,便不能回頭呢!

捐窿捐罅入沙田大圍試盡新舊美食-盛記
圖片來源:CynthiaLok @Openrice

盛記盆菜 / 盛記麵家
地址:沙田瀝源熟食中心5號舖



食「菠蘿船」嘅甜品店
食完正餐,梗係要試埋甜品。唔好以為呢區只有連鎖甜品店,其實只要識搵,都有呢區獨有嘅糖水舖。呢間名叫「甜椰椰」嘅甜品店,甜品坊間少見。香蕉船你就聽得多,「菠蘿船」你應該第一次聽吧?將半隻菠蘿挖空加入超多水果上碟,仲要加多球雪糕,勁足料!而楊枝甘露更配埋椰皇燉奶一齊食,又滑又好味!食完第二日皮膚都好啲!記得飽都要去食埋喇!

捐窿捐罅入沙田大圍試盡新舊美食-甜椰椰
圖片來源:maggie80076hk @IG ; Jasminelovers @IG

甜椰椰
地址:沙田崗背街9-11號全輝中心B座L1 16號舖
Facebook:www.facebook.com/sweetsweetcoco


沙田同大圍嘅好嘢又點止咁少呢?之前我哋去大圍踩單車嘅時候,都介紹過幾間好味嘅餐廳畀大家架!快啲睇下有無你平時去開嗰間啦!


文章重溫:
香港好去處:美孚荔枝角邊走邊食
香港好去處:秋天踩單車搵食一日遊

Edited by CLASSES



新聞資訊