香港好去處-慈雲山小食館以外的街坊美食 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2016年01月28日
【香港好去處】慈雲山小食館以外的街坊美食
【香港好去處】慈雲山小食館以外的街坊美食
慈雲山近排有間開咗廿幾年,專食港式小食嘅地標「小食館」就因為老闆退休執笠而 HIT 爆嘅全城,其實小編以前都喺果頭番學,所以都真係盛載咗唔少回憶。趕唔切食佢最後一餐,小編諗起都有啲眼濕濕。但其實慈雲山街坊美食又點只呢間?仲有好多都有番咁上下年資嘅街坊小店,同樣陪伴我哋成長架!襯佢哋未「榮休」之前,就好好珍惜同「寵幸下」呢啲傳統老店吧!

1. 霸氣小店 x 足料脆扑扑牛油雞翼:越式阿肥美食

越好食嘅野,從來都唔會咁輕鬆就可以享用到,睇下「澳牛」咩環境大家就會明。位於慈雲山毓華里嘅阿肥美食就正正話到俾我哋知,就算傳聞呢度出名服務態度差,大家都仲係要爭住排隊食,而唔會有勇氣去 Blacklist 佢。小編都真係成日去食,試過佢嘅真章,必食 item 蒜蓉牛油雞翼真係令人一試難忘,大大隻,熱辣辣,蒜香同牛油味極香濃,炸到外脆內軟,內層肉汁爆棚,但唔會太油膩,兩個人 share 四隻就啱啱好;另外,必試嘅仲有佢嘅金牌香茅豬扒飯,大碟夾抵食,豬扒肥美甘香,每塊厚薄適中,加埋啲蔥蒜調味,就好似毒品一樣會令人上癮,我哋永遠都估唔到點解出面食唔番呢種味道!其實服務態度又有咩好怕喎?橫掂平時返工都成日俾人鬧啦,如果係為咗食好野,都值得架!不過人哋太忙喇,先冇咁多時間鬧囉!


圖片來源:(左) nc222(Openrice)(右) Carrie Lui(Facebook)

人龍真係…萬里長城咁長


圖片來源:Carrie Lui(Facebook)

價錢:半客牛油雞翼 (4隻) $33;香茅豬扒飯 $36

越式阿肥美食
地址:慈雲山毓華里16號地下6號舖
營業時間:12:00 - 23:00(逢星期一、二休息)


2. 打冷首選必食招牌黃金炸蠔餅:三記飯店

被譽為慈雲山三寶之一嘅打冷專門店「三記飯店」,佢嘅招牌炸蠔餅幾乎係每枱必點嘅名物。平時喺深水埗、廟街食開嘅炸蠔餅都比唔上呢間咁足料,啲蠔仔仲零舍肥美大隻過人。蠔餅炸起熱辣辣,炸到完美黃金而且少少燶都冇,麵粉、蛋漿同蠔嘅比例完美,唔會淨係食到粉漿,所以食落香口唔油膩,蠔味同蛋味非常平均,唔會互搶。蘸埋佢附送嘅豆瓣醬同魚露,別有一番風味。據聞,平時三記好旺場,星期六日就更加係一位難求,所以大家要試就真係要早少少去搵定位喇!


圖片來源:Kino0617

價錢:蠔餅 $52

三記飯店
地址:慈雲山蒲景里6號地下
營業時間:06:00 - 01:00(星期一至日)


3. 平到「安已不」嘅咖喱牛腩 PIZZA:孖寶薄餅屋

想平住咁食好西,慈雲山嘅呢間小型 PIZZA 舖「孖寶薄餅屋」就簡直係平到無朋友,六十蚊左右就可以食到一大個全人手製嘅 PIZZA,有款好特別嘅口味「咖喱牛腩批」更加係史無前例咁備受追捧,成日一開舖無耐就賣晒。餡料好足,有齊晒切成小件嘅咖喱牛腩、洋蔥、青椒同埋意想不到嘅薯仔,食落唔太辣,牛腩煮得夠腍,牛肉味十足,一次過滿足你想食咖喱牛腩同埋又想食 PIZZA 嘅願望!另一招牌,加咗牛肉汁嘅芝士薯條「滿地可薯條」更加係街坊最愛嘅平、靚、正小食,熱辣辣嘅手切即炸薯條,淋上自家製牛肉汁、足料嘅牛肉碎加埋多到好似唔洗錢嘅微溶芝士,撈埋一齊食,好味之餘又醫到肚,而且廿零蚊就食到,難怪長期深受附近的學生歡迎。


圖片來源:海豚團長(Openrice)


圖片來源:arbb(Openrice

價錢:咖喱牛腩批 約$62;滿地可薯條 $27

孖寶薄餅屋
地址:慈雲山毓華里28號萬寶大廈1A舖
營業時間:11:00 - 22:00(星期一至四及日);11:00 - 23:00(星期五及六)(逢星期三休息


4. 狂爆蛋漿足料菠蘿包:榮記茶餐室

之前杜如科都有介紹過會食到爆晒蛋汁嘅「新鮮蕃茄煎蛋菠蘿包」原來都係出自慈雲山呢間茶記 - 榮記!其實榮記仲有一樣野係更加出名,就係「芝士撈丁」!撈丁用嘅係出前一丁,芝士汁香濃好味,加埋坊間比較少見嘅蟹柳絲、火腿絲落去煮,口感更加豐富。35 蚊任自選一配料,小編認為識食一定係食佢嘅炸豬扒!炸到外脆內軟,同佢個爆蛋汁嘅菠蘿包一樣,都係 juicy 至極,撈埋芝士食加倍美味。三十幾蚊,算係唔錯架喇!


圖片來源:tian.chan & 蝗蟲同學(Openrice)


圖片來源:~妖狐藏馬~(Openrice)

價錢:煎蛋菠蘿包 $18;芝士撈丁 $35(包一餸)

榮記茶餐室
地址:慈雲山毓華里12號地下A-B舖
營業時間: 06:30 - 22:00(星期一至日)


想知仲有邊區有好西食?繼續痴實 CLASSES 啦!

延伸閱讀:
【香港好去處:走遍荃灣尋覓8大特色美食】齊齊食好西!
【香港好去處】走入九龍城尋找甜品聖地

Edited by CLASSES





新聞資訊