香港十大最好味車仔麵推介 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2016年04月29日
香港十大最好味車仔麵推介
香港十大最好味車仔麵推介

雲吞麵之外,小編覺得更平民嘅車仔麵店都可以成為香港最佳餐廳!要揀10間,真係談何容易。一嚟每間都係小店,二嚟各有特色,絕對比雲吞麵同米線更難揀!小編今次同大家分享以下呢10間全港必食嘅車仔麵好店!你唔係唔去試呀嘛?


1. 全香港最好味車仔麵
繼全宇宙最好食嘅米線之後,原來香港仲有一間食店供應「全香港最好味車仔麵」!聽都未聽過?梗係啦,呢間麵店極少接受訪問,但喺觀塘嘅老街坊就一定識!最近,呢間有30幾年歷史嘅「金僑小食」就原班人馬喺觀塘重新開業,帶嚟一如既往好味嘅車仔麵。佢啲車仔餸好好味!豬腸入味又夠稔、豬紅滑溜又足味,魷魚更加係鎮店之寶!唔少慕名而去嘅老顧客食過之後都話Keep到當年嘅水準啊!

來多碗車仔麵
圖片來源:來多碗車仔麵 Facebook

來多碗車仔麵
地址:觀塘康寧道62號地下


2. 好辣者必試
對於車仔麵,你唔會奢望個湯底係用上等材料熬成,而食嗰時,你會加自己想食嘅配料同汁。嚟到呢度,點都要試下佢嘅靈魂——辣醬!唔止又香又辣,同時又帶啲麻!辣到出汗?試完之後,你就唔會介意嗰些少汗水呢!此外,雞腳亦煮得夠稔,入曬味,但食落幾爽脆,停唔到口!

萬利小食店
圖片來源:Kam Ion, Kaka Wong @萬利小食店 Facebook

萬利小食店
地址:大埔安泰路1號大埔廣場地下15號舖


3. 立食嘅車仔麵長龍店
企喺度食嘢已經唔舒服,何況係食麵?原來香港有間車仔麵店不設座位,要立食,但依然好多人食,每逢午餐時間就特別擁擠,附近返工嘅人都湧去打頭陣醫肚,想食就要早啲去排隊喇!雖然無得堂食,但人龍依然係咁長,因為個個都抱住一個「信念」——等唔到堂食,咪外賣囉。點解咁吸引?因為麵店係區內嘅抵食選擇,而且車仔餸選擇多,又好味……必食項目係「甜酸齋」!

車仔麵之家
圖片來源:Alexandra HY Lau @IG;Wayne Chan @IG

車仔麵之家
地址:灣仔晏頓街1號A


4. 風頭勁過同區米芝蓮車仔麵店
年初,米芝蓮新增咗「街頭小食推介」,荃灣區有兩間車仔麵店同時入圍,而呢間就特別受街坊歡迎,更有人話係「最強車仔麵」!雖然環境麻麻,但每當午飯晚飯時間就長龍不絕,堂食外賣都有!皆因大家對嗰度嘅雞翼同雞翼尖情有獨鍾囉!


圖片來源:bbuunnnnyy @IG

榮安小食
地址:荃灣大河道24號B地下


5. 隱世車仔麵
真係估唔到,喺青衣偏到喺山腳附近嘅「山卡拉」地方竟然有間咁好味嘅車仔麵!唔係網民同朋友報料,小編真係呢一世都唔知有間隱世車仔麵。據聞有分店,不過無咁好食,而呢間就係好味嗰間。每個餸都處理得唔錯,但食客話咖喱汁同辣油至係店舖獨門秘製。咖喱汁幾辣,但辣得嚟又有啲椰汁香甜味,其他地方食唔到。講到咁,怕辣都要試啦!


圖片來源:winnie_027 @IG

華記小食店
地址:青衣涌美老屋村90號地下


6. 放工先有得嘆嘅人情味車仔麵
位於油麻地比較少人行經嘅鴉打街,有間不起眼嘅車仔麵店。店很小,環境一般,主理嘅一位伯伯,煮麵工夫、技術純熟,效率高,下單後,不消一會,熱呼呼嘅麵就送到面前。牛腩是碎腩,但一食就知係媽媽的味道。小編只是食過一次,但之後就一直回味。臨走前發現,原來伯伯缺了左手掌,呢一刻更加令我對伯伯產生一份敬佩。可能,我一直回味嘅仲有一份「人情味」。特別值得一提嘅還有那裡特別嘅車仔餸——雞腸,晚上6點半開門,未到7點,雞腸就賣完了,必食程度可想而知。


圖片來源:搵食有僑 Facebook

輝記車仔麵
地址:油麻地鴉打街33號雅達商業大廈地下


7. 鬧市中嘅必食車仔麵
油尖旺不乏搵食好地方,平時出到去,你就一定唔會諗起食車仔麵。但原來有間旺角鬧市有間必食車仔麵店!個個去完都大讚,仲話一定要試嗰度嘅豬腸同豬紅,唔只香而入味,豬紅口感仲好似豆腐咁滑!加埋自製辣椒醬,真係無得彈!不過,人真係好多,食得唔係咁舒服囉。為咗食好西,捱下又有咩所謂?

明記麵食
圖片來源:eddie_ilovefood777 @IG

明記麵食
地址:旺角花園街174號地下


8. 澳牛式車仔麵店
澳牛嘅待客之道,你見識過未呢?以為今時今日,澳牛係萬一無一?咁你就錯喇,主打車仔麵嘅榮記待客風格同澳牛如同出一轍,規矩多多:落完無得加單、唔可以改餸;唔要腩汁(招牌嘢喎!)要早講,出咗無得退……覺得好無理?無計啦,喺人哋地方,國有國法,家有家規,想食就要聽跟足規矩,除非你唔食囉!不過,可能真係太好食,唔理係外賣抑或堂食,店舖都係逼爆人!到底有幾好食?去試下啦!

榮記粉麵
圖片來源:garfield918 @IG

榮記粉麵
地址:銅鑼灣糖街27號A地下


9. 罕有獨特車仔餸
車仔麵配菜嚟嚟去去都係個啲,有無其他特別啲?梗係有啦!呢間麵店每日未到食飯時間已經坐滿曬,每位客人都叫麵店特有嘅新鮮牛雜或豬雜。老闆每日朝早去街市入貨,之後返舖清洗乾淨,客人一落單,即叫即灼。內臟洗淨工夫多,愈來愈少人肯做,所以好多客人專程去食。點解老闆識搵咁多新鮮牛雜同豬雜?原來佢以前喺西環屠房外推車仔賣過,唔怪知得有「窿路」啦!

麵食坊
圖片來源:tomchu_747 @IG;「好天一直在」@Blogspot

麵食坊
地址:西環堅尼地城吉席街22-34號順興大廈地舖


9. 可以撈嘅車仔麵
車仔麵原來唔一定湯上,一樣可以撈嚟食!筷子記主打車仔麵,但其特色在於可以揀撈麵,而沙嗲撈麵就特別受歡迎,大家要試!咖哩魚蛋更加係必食,唔少人專登經過買嚟食!魚蛋超入味,頭兩粒覺得唔太辣,之後就愈食愈辣,好刺激,正!撈麵汁多,又夠濃郁,好惹味!


圖片來源:搵食有僑 Facebook

筷子記
地址:中環威靈頓街85-89號群英商業大廈A1號舖


10. 升級版終極車仔麵
升級終極版有咩咁巴閉?因為呢間麵店唔單止可以揀撈車仔麵,更令人意想不到嘅係,小編多年嚟疑惑:「點解車仔麵無得揀腸粉?」竟然畀佢解開咗!呢度嘅車仔麵有得揀「腸粉」!以為腸粉質素普通,點知食落發覺竟然好滑,好滑,好滑(重點要重複3次)!撈埋其他車仔餸一齊食,呢餐真係大滿足!小編強烈建議全港車仔麵店都將「腸粉」加埋入去車仔麵做其中一個麵底選擇!

源品車仔麵茶餐廳
圖片來源:my_fav_of @IG;oscarleepapa @IG

源品車仔麵茶餐廳
地址:大坑京街18號地下


10間必試車仔麵就介紹完喇,但小編就想同大家分享多一間。事關小編放 Lunch 去食飯時,就發現咗呢間車仔麵連發哥都幫襯!食客打卡仲話,發哥有讚好味啵!大家有興趣可以去試埋呢!

麵尊
圖片來源:Angela Yu Facebook @ 麵尊

麵尊
地址:上環蘇杭街22-24號1號舖

相關文章:
香港十大最好味米線店
沙田大圍  新舊美食11個好介紹
尖沙咀10大必試新餐廳

Edited by CLASSES



新聞資訊