澳門好去處-過大海睇小丸子-360度食盡澳門15大美食 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2016年08月03日
【澳門好去處】過大海睇小丸子 360度食盡澳門15大美食
【澳門好去處】過大海睇小丸子 360度食盡澳門15大美食
暑假好多人去旅行,小編無得去,唯有近近哋去澳門搵埋小丸子一齊放暑假啦。一場嚟到,就梗係要食盡澳門啦!又係食葡撻豬扒包?梗係唔會啦,小編成個旅程都未食過豬扒包同葡撻喎,係咪好叻呢?唔信,跟住 CLASSES 編採組一齊去啦!
 
1. 韓國過江龍 人氣吐司店

嘩!真係無諗過喺澳門竟然食到韓國好出名嘅 Issac Toast!雖然個樣望上去無咩特別,但食過嘅人都話其實醬汁先係精髓呢!呢度仲有澳門限定嘅安格斯牛肉吐司,真係引死唔少牛迷。咁吸引,去唔到韓國食嘅小編,就食住呢個止下癮先啦!到訪當日仲發現嚟緊澳門會開多一間分店,幾時先開嚟香港啊?


Issac Toast & Coffee
澳門龍嵩正街8D號祐生大廈地下A1座
FB: https://www.facebook.com/isaactoastmacau/?fref=ts
 
2. 吸睛甜品輕食Café 
抹茶與紫薯呢兩樣甜品嘅勢力範圍原來唔只限於香港,連澳門都係!樂點咖啡有2層,提供意粉、飯類食物同各式特製甜品,好似厚熱香餅,軟心厚Pancake等。招牌嘅紫薯軟心厚 pancake,小編覺得其實即勁量版紫薯心太軟,一切即流心!入口軟綿,「紫薯心」甜得嚟夠自然,甚有紫薯味;配埋自家製嘅紫薯雪糕一齊食,一冷一熱,真係無得彈!另外燒汁魷魚筒釀飯都唔錯,筒內嘅飯唔會一切就散,可見手藝之巧。魷魚筒夠彈性但唔韌,墨魚汁飯口感亦好,令人滿意。小編仲有好多未試,下次再去!



樂點咖啡
澳門新橋鏡湖馬路72 號臻華大廈地下A 座
FB:https://www.facebook.com/joycafemacau/?fref=ts
 
3. 平香港勁多嘅勁好味閃電泡芙
唔好成日以為澳門咩都慢過香港,澳門人食嘢分分鐘潮過你同我,澳門已經有3間唔同嘅品牌專門店賣「閃電泡芙」。小編揀咗呢間喺樂點咖啡附近嘅 Oh la la ,見到啲蛋糕就知道呢度係外國師傅坐陣。精美嘅蛋糕同排得整整齊齊嘅 Éclair 賣相超吸引,顏色又鮮艷。當日小編就試雜莓及雲呢拿奶油味,有藍莓同士多啤梨,再加埋紅莓嘅cream,真係莓味十足!裡面粉紅色嘅紅莓吉士酸酸甜甜,食曬成條都唔覺得「膩」,真心覺得好味過香港嗰啲。重點係呢度賣MOP$28咋,平過香港(HK$38-$4X)好多呢!去開記得食多幾條喇!上面啲花都食得架,係法國食用花嚟架!

 

當日店員向小編推介新出品,就係呢枝針筒狀嘅甜品。你估係咩呢?小編真係無諗過係蛋糕!店員話只要將佢唧出嚟,就可以食架喇!


Oh la la French Patisserie 
澳門連勝街55號家寶大廈地鋪A號 
FB: https://www.facebook.com/ohlalafrenchpatisserie/
 
4. 小編至愛雪糕 
上次去澳門食嘅雪糕專門店拎咗米芝蓮,今次再訪,本來都打算再食。但去到門前就見到隔離開咗間新雪糕店,仲話係嚟自日本抹茶之鄉靜岡縣,雪糕低糖又低脂,梗係要食啦!識食梗係食抹茶!呢度有「綠茶」同「抹茶」兩個口味,有咩分別?



淺色啲係綠茶,另一種就係抹茶。兩種都好好味,如果一定要講分別,前者就奶味重過茶味,後者就茶味突出之餘,食完之後口腔仍留有甘苦同澀味,抹茶真係幾堅喎。不過啲雪糕好快溶,一來天氣熱,二來因為雪糕無咩添加劑(日本雪糕師傅嘅堅持),所以大家要快啲食!小編兩日都有食,再試埋極罕見嘅西瓜味!好清新,西瓜味好實在,絕對唔係用色素同糖粉溝成架。大滿足!大家想食雪糕,記得去呢間喇!雪糕口味好特別,有葡撻、木槺布甸、澳門皇家奶茶、櫻花、番石榴、红酒等。
 
KIKA gelato じぇらーと
新馬路大堂巷11號地下
FB: https://www.facebook.com/kikagelato/
 
5. 夏日必飲吸精「彩虹」解渴飲品 
香港熱,澳門都係!就係呢個熱到就嚟想暈嘅時候,我遇上彩虹……丫,唔係,係「彩虹清新蘇打」先啱。呢杯顏色咁靚嘅飲品名叫「遇上彩虹」(改得真貼切),其實係由用咗唔同口味嘅果汁調配而成嘅沙冰飲品,好似士多啤梨、檸檬、藍柑等等,每一啖嘅味道都唔同,飲飲下顏色組合又會唔同咗,好得意!店內仲有其他唔同款式嘅特飲,仲可以揀可愛熊仔頭嘅樽,真係引死人!


Macao Imperial Tea
澳門提督馬路97-c榮勝大廈地下A座
FB: https://www.facebook.com/MACAOIMPERIALTEA.68818455/
 
6. 賣萌cute爆造型雪糕甜品
宜家興Emoji、Pokemon Go,如果食到呢啲雪糕同甜品,係咪會玩得仲開心呢?呢間主打韓式甜品 Antique 就專賣馬卡龍,除咗平時食開嗰款之外,老闆仲自創多款卡通馬卡龍造型,仲推出埋馬卡龍雪糕,真係睇見都想食。見到有枝極 cute 哈哈笑雪條,唔只影相可以呃like,食落酸酸哋,乳酪味,食完之後,涼曬!




圖(首3張):Antique Facebook Page
 
Antique
澳門渡船台16號
FB: https://www.facebook.com/Antique-Macau-1614326118807130/?fref=ts
 
7. 澳門最滑豆腐花 
好多人話呢間豆腐花好味,因為店舖咁多年嚟都堅持用黃豆去磨製豆腐,從來都唔加石膏粉,務求令啲豆腐滑得嚟又有豆香。小編食過另一間同樣出名嘅,始終覺得呢個嘅口感嫩滑啲,唔怪得當年葡萄牙總統都要嚟食啦!


榮記荳腐麵店
新馬路果欄街4 號地下
 
8. 挑戰黑色窩夫
抹茶窩夫、紫薯窩夫、麻糬窩夫、炸雞窩夫,你都可能試過,但黑色窩夫你又試過未?可能見都未見過呢。澳門呢間餐廳就供應黑色窩夫,黑色窩夫其實用咗台灣竹炭粉泥合整成,配雪糕甜食,窩夫食落有淡淡竹炭味,口感當鬆軟,好特別!



圖:tressssk@IG
 
Roomage 30空間叁拾
澳門高地烏街64號東方花園商場地庫 
FB: https://www.facebook.com/roomage30/?fref=ts
 
9. 抹茶控去澳門必到之地
抹茶控嚟依度一定會失控!去年開嘅汴京茶道館係全澳門唯一的日本正宗茶道館(香港都未有),嗰度除咗有唔同嘅茶之外,裡面仲用咗好傳統嘅和風佈置,座位係「榻榻米」,令大家有種置身日本茶館嘅感覺。大家喺茶道館可以一邊品茶,一邊嘆日式小吃,例如茶味菓子。


圖:汴京茶道館FB & smloveg@IG
 

你亦都可以去試業中嘅「汴京茶寮」,雖然係外賣店,無榻榻米坐,但賣嘅茶一樣唔輸蝕。小編發現個度有日本宇治直送嘅抹茶杯裝雪糕賣,每日限量架!雖然表面有啲碎冰,但溶咗又無令雪糕味變淡。雪糕抹茶味極濃,每一啖都有甘苦味而不甜,令人一試難忘!
 



 
呢枝櫻花白茶當然要買嚟影相啦!雖然叫白茶,其實都係綠茶,只不過係最淺色。因為夠淺色,櫻花先會變得突出!小編抵抗唔到誘惑,買咗枝嚟呃like!
 
汴京茶道館
澳門渡船街65號A
FB: https://www.facebook.com/tealosophymacau/
 
汴京茶寮
 三盞燈三龍閣地下B舖
FB: https://www.facebook.com/tealosophyteabar/
 
10. 氹仔小店驚泰國街頭即拉甜薄脆! 
去泰國,一定要會掃街,呢個喺泰國街頭經常出沒嘅小食Roti,小編喺澳門見到有得食呀!呢度同泰國一樣,可以加蛋、加香蕉,之後再加醬。小編食原味,就咁煎薄脆,加牛油同煉奶食!嘩,食落好香口,牛油味超香,煉奶滲曬入啲凹凸位,脆卜卜,好正呀!記住快手影完相就食喇!
 

二記
氹仔舊城區嘉模堂區德行街18號
FB: https://www.facebook.com/iketaipa/
 
11. 街坊都食嘅雞湯米 
喺香港,我哋多數都係食茄牛通、沙嗲牛肉麵、餐蛋麵,好少會食雞湯米。不過,去到澳門就發現原來好多澳門人會食雞湯米,而呢間茶餐廳嘅出品就被視為傳說中最美味嘅。
 
雞湯米嘅湯底估計係用咗紅棗、枸杞、木耳同埋雞骨所煲成,飲湯食米粉時都聞到紅棗味。呢種做法好有「家」的味道!小編記得以前媽媽蒸雞都會加紅棗。雞肉熟度啱啱好,夠滑又有雞嘅鮮味,唔怪得咁多街坊支持啦!


榮暉咖啡美食
新馬路十月初五街54號地舖
 
12. 唔食豬扒包 食魚餅包
小編今次嚟澳門,真係無食過豬扒包,但就食咗魚餅包。呢度嘅魚餅包原來係米芝蓮推介過,小編事後先知。呢度好多小食都同魚餅有關,魚餅係用鯪魚肉整成嗰種,煎香夾入豬仔包中間,同豬扒包一樣咁食。魚餅無豬扒咁膩,加上彈牙啲,又香口,真係唔錯哦!


新英記咖啡麵食
澳門沙梨頭惠愛街2B-2C 號雅佳大廈地下
 
13. 極有牛味牛尾湯通粉
牛尾湯粉喺好多澳門茶餐廳都有得食,不過喜蓮咖啡麵食嘅牛尾湯通粉真係無得輸。湯底甚濃,先是酸味,淡淡牛味隨之而來,可見湯底足料。牛尾肉呢,煮得軟腍,食落有牛肉味;通粉吸收咗蕃茄嘅鮮甜同牛尾嘅肉香,咬時又流出茄湯汁,大滿足!
 

喜蓮咖啡麵食
氹仔舊城區飛能便度街南龍花園地下B84號
 
14. 氹仔名物 牛油蛋糕
呢度嘅牛油蛋糕咁出名,就算小編食到飽,都買咗個嚟當早餐!呢個提子牛油蛋糕未食已經聞到勁香牛油味;雖然個樣普通,但食落有超多提子乾,而且內裡密度高,但夠綿,唔會好乾同涸喉,食幾啖就要飲水。值得一提嘅係仲有蛋香味!


沛記咖啡室
氹仔舊城區官也街25號地下
 
15. 來一個燕窩撻
喺香港,想食燕窩撻都唔知去邊搵!嚟到澳門,點都要食返個!呢個蛋撻叫價$15蚊,因為多咗燕窩。食落無平時食嘅蛋撻咁油,味道相對清新啲。蛋撻口感似蛋白撻,中間呈半熟狀、一下就滑到喉嚨去,超滑呢!
 

新好利咖啡餅店
氹仔舊城區地堡街13-14號
 
櫻桃小丸子動畫25週年展!
最後就梗係帶大家去睇小丸子啦!裡面有好多唔同嘅場景,好似小丸子一家人食飯、小丸子媽媽嘅廚房、小丸子間房、同爸爸一齊沖涼……仲有小丸子班房、運動會……最特別係加入咗小丸子同大家一齊食葡國餐,澳門限定架!







大家入場之後可以影幾耐都得,無限時,可以影個夠呀!近出口就有精品區,小丸子 FANS 最開心 FING 錢嘅地方,飲食區就有啲卡通片角色嘅肖像食物,好似馬卡龍、曲奇餅,小編就買咗小丸子雪條喇!
 
展覽詳情
日期:即日至2016年9月11日
時間:星期一至四12:00-20:00,星期五至日11:00-21:00,閉館前1小時停止售票及入場
地點:澳門會展中心
票價:$120/位
電話:(853) 2380 5083
購票:MacauTicket
http://www.macauticket.com/TicketWeb/
 
睇完係咪好想過返轉大海呢?咪諗咁多喇,快啲去啦!
 
更多好去處:
【香港好去處】沙田大圍-新舊美食11個好介紹
【香港好去處】走進西灣河 太安樓 冷氣叮叮一日遊

Edited by CLASSES



新聞資訊