旅遊教室-‬‬教你雪地玩樂7式 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2016年01月25日
【旅遊教室‬‬】教你雪地玩樂7式
【旅遊教室‬‬】教你雪地玩樂7式
又到雪季喇,一起玩雪吧!小編記得係網上面睇過一篇小品,內容大至係話香港好彩冇落雪,因為若然一打雪仗就唔會做到好似韓劇咁唯美,你亦唔會聽到溫柔嬌嗲嘅「oppa、夏之麻…等字詞」,換嚟嘅只會係粗魯到一個點嘅「粗口對聯一句句」。所以大家記得喇!去到日本、韓國玩雪上遊戲嘅時候千其唔好整臭港人個朵。不過其實人哋都未必聽得明。噢!By the way 其實除咗滑雪,仲會有啲咩新奇嘅雪上玩意呢?下次去日韓可以考慮吓玩呢啲呀!

1. 越野滑雪(Nordic Ski)

越野滑雪始源地其實喺北歐,所以另一個名叫「北歐式滑雪」,開始果陣兩腳要著住專用窄長滑雪板,配合兩支扶手,然後喺平坦嘅雪地上面滑住咁行,就好似「雪地遠足」咁,慢慢行;慢慢欣賞大自然風景,體驗天人合一嘅感覺,洗滌心靈。越野滑雪對心肺功能同埋腰部、腿部肌肉嘅鍛鍊好有幫助,所以一到冬天,世界各地好多人都會專程飛去滑雪。


圖片來源:etravelmaine.com

學費:2小時3,500日圓左右
難度:★★★☆☆


2. 單板滑雪(Snowboard)

單板一聽就知係型男用嚟表演嘅玩意啦!好簡單,因為玩呢種單板滑雪最大嘅特色就係將雙腳同時固定係雪板上面橫向咁滑雪,感覺就好似水上 Wakeboard 咁喺雪上滑行,玩呢樣野講求嘅係平衡感同埋轉移身體重心嘅能力。初學者就唔好諗住一開頭就可以型到玩晒花式,反而要多加練習基本功,例如:用比較冇咁型仔嘅「螃蟹走路」方式(即雙腳張開,微曲膝蓋,直視前方同將身體重心壓至最低)去控制速度同剎車,而大家最好就有定要被撻餐死嘅覺悟吧!


圖片來源:goturkey.com

學費:6小時10,000日圓左右
難度:★★★★☆


3. 雪鞋(Snowshoe)

如果只想「漫步人生路」,唔想過於刺激,建議大家玩番啲更基本嘅「雪鞋」。其實呢款西式雪鞋真係唔需要特別嘅技術或者體力,任何人,新手或者小朋友都可以好輕鬆咁 handle 到。因為呢種鞋係俾人步行散步,而唔係攞嚟滑架,大家唔洗就住就住怕跌餐死。就算係喺啲好厚嘅雪上面行,都唔怕下陷,既保暖又輕鬆。一齊慢慢咁穿越白茫茫披滿雪嘅山野林間,探索壯麗嘅冬日美景,享受一次真正嘅雪地深度遊。


圖片來源:Shutterstock/GROGL

學費:2小時3,500日圓左右
難度:★☆☆☆☆


4. 充氣滑板 / 雪上橡皮艇(Air Board)

充氣滑板係一款新興嘅雪上玩意,源自瑞士,一般嚟講個玩法會係坐喺充咗氣嘅厚橇滑板上向前方滑動,因為個身同雪地嘅距離好貼近,所以無論係視覺上或者感觀上都超級澎湃,果度衝擊力同埋速度感都相當強大。如果想再刺激啲大家更可以爬喺塊板上面,頭部同重心向前,用前半身控制方向同速度。操作好簡單,相信初學者可以好快上手。


圖片來源:hokkaidox.com

學費:2小時7,600日圓左右(通常二人才可成行)
難度:★★☆☆☆


5. 雪上電單車(Snowmobile)

水上活動有水上電單車,雪上原來都有「雪上電單車」,唔洗有車牌或駕駛執照都玩得,就連小朋友 (只要過6歲) 都可以一齊坐指定型號嘅電單車。可以唔洗跌、唔洗紅都面晒咁水皮,反而仲可以好型咁飛馳於雪白山嶺;穿梭於銀色山林深處之間,享受果種速度帶嚟嘅快感之餘,仲可以飽覽大自然嘅冰雪美景,簡直就係一件賞心樂事!有人話呢款車嘅軚盤都幾難控制,但小編反而覺得同技術、天份冇乜關係,可能只係咁唔好彩租著架壞車啫!


圖片來源:wordpress.com

學費:20分鐘3,600日圓左右
難度:★★☆☆☆


6. 橡皮艇雪橇(Snow Rafting)

海上有香蕉船玩,雪上又點可以冇類近嘅刺激野?難度咁大都只係因為大家真係冇咩可能唔俾佢拋出嚟囉!玩法好易明,首先會坐喺橡皮艇入面,隔離會有架電單車拖行住架橡皮艇,然後不斷加速,驚險又刺激萬分,當轉彎嘅時候,果種離心力真係會好似坐香蕉船咁拋埋個人出嚟,不過應該唔會好危險,因為雪地軟綿綿,相對之下冇香蕉船咁危,首先唔洗擔心小朋友會浸親先啦!


圖片來源: beitostolen.com

學費:每次 1,000日圓左右
難度:★★★★☆


7. 山岳滑雪(Backcountry Skiing)

如果自問已經係「雪地玩家」,咁就一定要試埋呢個 item:山岳滑雪,即係將滑雪嘅難度再升級,場地由滑雪場轉戰野外雪山,冇得搭纜車,只能用滑雪板或者雪橇行動,當然要更加貼近大自然就自然要承擔番一定嘅風險,登山前需要做足安全措施,要著雪鞋又或者用專用貼紙貼好雪板背面去防跣。所以最好都係一步一步嚟,千其唔好未學行學人走,勉強自己。


圖片來源:scarpa.com

學費:2小時10,000日圓左右
難度:★★★★★


延伸閱讀:
【滑雪旺季】北海道以外的隱世滑雪熱點
【香港好去處:走遍荃灣尋覓8大特色美食】齊齊食好西!

Edited by CLASSES

 


新聞資訊