搵食至上-士多啤梨風雲再現 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2016年01月14日
【搵食至上:士多啤梨風雲再現!】
【搵食至上:士多啤梨風雲再現!】
士多啤梨啤梨蘋果橙…早排 Twins 演唱會就有唱呢首經典,提醒咗我哋又夠鐘食士多啤梨喇!每年去到1、2月就係食士多啤梨最動人嘅時光,唔知香港又有乜好野 啱晒一眾草莓狂迷去「控」呢?小編就同大家一齊去望望先!

1. 草莓泡沫

身為「草莓飯」嘅小編早排終於試咗旺角呢間 Next Station Dessert 嘅「草莓泡沫」,真係齋睇賣相已經 sweet 到漏,就連唔好士多啤梨嘅朋友望到都忍唔住要借嚟食番幾啖。紅粉緋緋嘅外表,帶俾大家多重士多啤梨嘅口感,底層係 Tequila 玫瑰奶凍,酒味唔會喧賓奪主,反而突出咗士多啤梨嘅香味;中層係冰涼嘅士多啤梨味乳酪雪糕,仲有醃咗嘅粒粒草莓果肉,層果醬食落唔會有藥水味,而且酸酸甜甜,夠晒清新;上面有層好 creamy 嘅草莓慕絲,呼應番個泡沫主題,再加一大塊心型嘅士多啤梨朱古力脆餅放喺頂,令呢個組合望落更加甜蜜蜜!小編個心都跟住融化了。



草莓泡沫 $58

Next Station Dessert
地址:旺角黑布街13號地舖


2. 草莓咖啡

唔知大家有冇留意到 Starbucks 近排多咗款草莓新口味?今次唔再係士多啤梨芝士蛋糕,而係草莓紅絲絨朱古力咖啡!加入香濃嘅紅絲絨朱古力醬所製嘅經典咖啡,上層簡單灑上大量草莓脆粒同芝士蛋糕忌廉點綴,紅粉色調令成杯飲品更加可愛迷人之餘,每一啖都甜蜜過人,夠晒醒神!


圖片來源:Starbucks(Facebook)

草莓紅絲絨朱古力咖啡 $41

Starbucks
地址:各大 Starbucks 有售


3. 草莓蛋糕

小編每年都好期待東海堂年頭熱推關於草莓嘅新甜點,終於今個月又等到喇!今次仲要鋪天蓋地咁宣傳,就連廣告同宣傳都紅噹噹過人,一、二月生日嘅小公主有福了!呢個叫做「美人の赤莓」嘅靚爆蛋糕,嚴選日本頂級士多啤梨,粒粒紅潤有光澤,而且清甜多汁,果味濃厚。粉紅綿密嘅蛋糕內蘊藏細緻香滑嘅草苺慕絲、蛋白蛋糕、草莓果凍、草莓白朱古力脆脆等,未食已經散發啖啖莓香,食落就更加係多層豐富莓味在心頭!
 


圖片來源:東海堂

美人の赤莓 $338

影片來源:TPB HK CM 香港電視廣告庫
 
東海堂
地址:各大東海堂分店有售


4. 草莓牛奶卷

草莓真係旺到不行了,就連12月中喺上環新開嘅日本東京超人氣手信品牌 TOKYO MILK CHEESE FACTORY 都想趁熱鬧,獨家推出期間限定,日本直送嘅「草莓牛奶卷」。呢款牛奶卷外型就夠晒迷人 pink lady,用嘅都係有「博多甜王」之稱嘅九州優質士多啤梨所製作,鬆軟嘅士多啤梨海綿蛋糕捲住由北海道牛乳同白朱古力所整成嘅牛奶忌廉 mousse 同埋草莓忌廉 mousse,每一啖包含住兩種口感同滋味,軟滑香濃,感覺好似食緊軟雪糕咁。




草莓牛奶卷 $248

TOKYO MILK CHEESE FACTORY
地址:上環德輔道中323號西港城地下4-6號舖


5. 草莓窩夫

窩夫唔一定係正方形架!花形嘅你又見過未?黃埔呢間 Cafe Charm's 用八粒水滴形砌成嘅窩夫造型就真係似足一朵靚花喇!每粒水滴上面都唧咗忌廉同埋放咗半粒新鮮士多啤梨,中間係一球士多啤梨雪糕,上面淋滿士多啤梨漿同埋杏仁脆脆同忌廉等 topping。窩夫焗到金黃色,食落好鬆脆,甜度亦啱啱好,仲食到陣陣嘅蛋香味。最啱就係食一啖蘸咗雪糕嘅窩夫,然後一啖士多啤梨咁食,冷熱交融,加上士多啤梨嘅酸甜味中和咗窩夫嘅甜膩,食多件都唔怕滯,女士們一定會同部相機一齊「食」到心花怒放!


圖片來源:cafecharms (Instagram)

士多啤梨雪糕紅豆窩夫 $76

Cafe Charm's
地址:紅磡黃埔新天地3期百寶坊地下G27號舖


6. 草莓三食

雖然話就話女仔有多一個胃食甜品,但係如果俾佢哋揀,佢哋都會寧願少食多餐!即係點?即係用最少嘅 quota 試盡所有甜品呀!Joyful Dessert House 一士多啤梨三食嘅「士多啤梨三重奏」就正中要害,用新鮮士多啤梨整嘅士多啤梨布丁上放住一球士多啤梨雪糕,布丁食落好幼滑香甜,仲食到果肉喺入面,唔太漏,隔離仲有多杯士多啤梨 yogurt,酸酸地,食完呢個胃口大增,加埋士多啤梨醬畫花同黑白朱古力粒粒伴碟,既 Fancy 又滿足到少女們食足3種甜品嘅願望!


圖片來源:Joyful Dessert House(Facebook)

士多啤梨三重奏 $56

Joyful Dessert House
地址:旺角黑布街74號藝興大廈地下2及3號舖


7. 草莓甜品

各位高貴嘅女士們 high 個高貴嘅 tea 係人生必做的事,一件貼近一百蚊嘅 Strawberry Trifle Cake 你又捨唔捨得食?當你知道咗係西太后 Vivienne Westwood 開嘅 café,就可能覺得就算要排隊都值得試一次!Strawberry Trifle Cake 華麗嘅外表,三層蛋糕中央夾住兩層香濃嘅吉士醬,蛋糕上仲放滿四大粒新鮮士多啤梨同埋一塊用士多啤梨同朱古力做嘅 Westwood logo牌,夠晒浮誇!女士們,相機 ready?


圖片來源:sugarcat

Strawberry Trifle Cake HK $98

Vivienne Westwood Café
地址:尖沙咀沙咀廣東道17號海港城海運大廈OT305A號舖


延伸閱讀:
【香港好去處:走遍荃灣尋覓8大特色美食】齊齊食好西!
【香港好去處】走入九龍城尋找甜品聖地

Edited by CLASSES

 


新聞資訊