掃食葵芳!葵廣以外10大美食 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2016年11月25日
掃食葵芳!葵廣以外10大美食
掃食葵芳!葵廣以外10大美食

為食小編今次想帶Classmates去邊食嘢?大家應該成日都見到唔少人分享去葵芳食好嘢,而每次都係去葵涌廣場……不過,唔少人都話無論喺假日抑或平日,葵涌廣場已經淪陷。亦有人反映,其實裡面有好多嘢食都係個「伏」,唔係報導所講咁吸引,咁抵食同咁好味。既然大家都識葵涌廣場,小編就帶大家去葵涌廣場以外嘅地方,嘆盡10大美食!
 
去葵芳必食嘅魚蛋燒賣加牛肉球
魚蛋燒賣牛肉球,好多小食檔都有啦,有咩咁特別呀?咁你就錯喇!你搵日嚟睇下條人龍就知佢真係唔簡單,因為長期都係長龍店,尤其係放工等巴士嘅時間。點解?因為佢有其他地方食唔到嘅無敵醬汁。先甜後辣,又有少少陳皮味,最過癮嘅係,辣味係之後先「攻」上嚟,唔食得辣嘅你都可以冒險食下!魚蛋細細粒,彈牙有咬口,咖哩味又入味,加埋個汁,真係好正!而牛肉球大過乒乓波,入口軟彈,質感唔「粉」,中間有馬蹄粒,爽口,一定要淋埋個獨家醬汁先叫完美呢!
 

圖: hongkonglo@IG
 
強記小食
葵芳港鐵葵芳站D出口
 
叉燒滿佈 真叉燒拉麵

見到呢碗拉麵,腦海即時彈起嘅字句係「叉燒.全部都係叉燒!」。見到餐牌時,已經被呢碗拉麵吸引住。五六大片嘅叉燒舖平喺碗面,睇上去唔係好肥,但又食到油甘香;睇個樣係全熟,唔會好滑,但又估佢唔到咁嫩滑,可以因為係慢煮叉燒。湯底係大路嘅豚骨湯,唔會好鹹,食完狂飲水,切合香港人口味。
 

圖: Mi529G@OP
 
麵屋丸京
葵芳興芳路188號地舖
FB: https://www.facebook.com/marukyou.hk/?hc_ref=SEARCH&fref=nf
 
高登權威力推小店
大家都知,高登巴打絲打識飲識食,好有權威,佢哋推介得嘅,水準一定唔會差。呢間喺葵芳運動場對面嘅餐廳,地方唔大,舖面亦唔張揚,但每晚就總係有人喺外面等位食飯。餐廳係西餐廳,價錢合理,晚飯扒餐都係100蚊樓上,味道不俗,食物質素亦有水準,唔少人都話CP值高,回頭率高。下午茶亦有心思,法式芝士流心蛋厚多士比一般西多來得更吸引,可惜只限下午茶時段供應,好多去食晚餐嘅客人想食都食唔到。你都想食?記住下午茶時間早啲去喇!
 

圖: 食臺FB 、lilianleung(右)
 
食臺
葵芳榮芳路97-111號葵祥大廈地下E1舖
FB: https://www.facebook.com/%E9%A3%9F%E8%87%BA-1448975645350826/?fref=ts
 
鍾意芝士,想食更多唔同嘅芝士美食:
【邪惡至極】全港必試瘋.芝美食

轉角遇上平民美味西餐
難得地,在這個位置尋得這種西餐店。相比食臺,Star Kitchen的風格更似一家西餐廳。店內富英國色彩的裝潢佈置,讓在內品嚐西餐的客人更能投入。
 
食物價錢唔貴,甚至係好平民嘅價錢就已經食到美味又足料嘅意大利飯(一百蚊都唔使)。有時仲會有推廣優惠,上次小編去,只要按指示打卡就可以免費獲取一份黑油醋蕃茄作前菜,好好味架!另外,啲嘢食份量多,1碟都可以2個人食。小食同主菜好特別,好似吉列冬菇、軟殼蟹雞柳蘑菇意大利飯。
 





Star Kitchen
葵芳禮芳街21號地舖
FB: https://www.facebook.com/startkitchen97773132/?fref=ts
 
邪惡下午茶 熱辣辣拉芝肉醬通粉
肉醬通粉有咩咁特別?呢個肉醬通粉嘅特別之處就係加咗芝士落去焗,而食嘅時候仲可以拉絲……就係咁簡單?仲未完,小編覺得最治癒嘅地方係,呢個芝士肉醬通粉係原隻鑊仔上檯,份量足之餘,仲可以大飽口福。芝士同肉醬厚厚咁舖喺面,每一啖都係肉醬、芝士同通粉,絕對係個非常好嘅comfort food!肉醬酸酸哋,芝士份量恰好,唔會太膩,真係令人食到停唔到口!不過要記得,呢個只限下午茶時間供應咋!
 

圖: christina__cao@IG
 
錦榮餐廳
葵芳仁芳街12號地下6號舖
 
等位都要食嘅特色小菜館
呢間小菜館多年嚟喺呢區屹立不倒,生意好就唔使講,更加重要嘅係食物水準咁多年都Keep到!黃金蝦真係一試難忘,講開又想今晚再去食,回味下。蝦殼最好味,因為係用咗鹹蛋黃去兜炒炸好嘅蝦,但炸粉唔厚,蝦亦可以做到厚肉爽口……蝦殼食起嚟好「乾脆」,鹹蛋黃炒香之後亦變得可口,真係付人愈食愈想食。除咗黃金蝦,仲有黃金鮮魷、黃金南瓜等等,全部都好香口惹味。就係因為咁好食,啲街坊咪等到天荒地老都要堅持等落去囉!
 

圖: 山地^oo^@OP
 
金潮小廚
葵芳榮芳路9號恆景花園恆景商場地下G14-G15號舖
 
召喚米線控 刺激惹味麻椒湯底米線
 
大多數鍾意食米線嘅人都係因為嗰個令人上癮嘅辣味同回味嘅湯底,而呢間新開嘅米線店有獨家炮製嘅「麻椒湯」湯底,米線控一定鍾意。呢個湯底主要用上四川麻椒所製,食嘅時候,麻椒醬汁迷藥於米線之間;而嗰種辣味唔止令人出汗,仲會令人有種心癢感覺,愈食愈上癮;食到興起一刻,你會愕然發現你嘅舌頭被嗰股辣勁麻痺咗……雖然係咁,但你只會覺得刺激,甚至覺得美線愈食愈美味!
 
之前都同大家介紹過本港十大最好味米線,試曬未呢?
香港十大最好味米線店
 

圖: 斑紋@OP
 
麻辣川米線
葵芳信芳街36號豪勝閣地下E號舖
FB: https://www.facebook.com/smartricenoodle/?fref=ts
 
唔使入元朗 葵芳都食到醉雞醉豬手
宜家唔使入元朗都食到好美嘅醉雞麵喇!呢間喺葵芳嘅小店,茶餐廳格局,但其實裡面係食醉雞麵同魚湯麵。呢度招牌麵係醉雞醉鮮麵!醉雞嫩滑鬆軟;試埋豬手,十分爽口,值得一讚嘅係,兩者都好似飲醉一樣,酒香滲透咗肉同骨,非常濃郁。而「醉鮮麵」其實係無酒精成分,同酒無關,不過入口好爽滑,口感亦比米線煙韌,值得一試 。
 

圖: leewingshann@IG、搵食有僑BLOG
 
醉鮮靚湯特色粉麵
葵芳禮芳街17號葵福大廈側
FB: https://www.facebook.com/%E9%86%89%E9%AE%AE%E9%9D%9A%E6%B9
%AF%E7%89%B9%E8%89%B2%E7%B2%89%E9%BA%B5-350577055093496/?ref=py_c

 
葵芳價錢嘆九龍城水準嘅泰國菜
 
呢間泰國菜餐廳雖然地方細細,但菜式特別而且美味。炸蝦餅香口又惹味就人人都知,但呢度嘅蝦餅就內有乾坤——有芝士,叫做「芝士蝦餅波波」。食起上嚟,更加多重滋味呢!另外,仲有蝦膠釀皮蛋球同香辣椒鹽軟殼蟹,前者蝦膠好彈牙,皮蛋球同泰式辣醬出奇地咁夾;軟殼蟹用椒鹽烹調,又香口又惹味,餸飯最好!
 

圖: 醫胃@OP、BubuSara@OP
 
泰星匯泰國菜
葵芳信芳街40號
 
足料烘底蛋牛治
睇個餐廳名,你會以為係西式外賣快餐店,但其實內有乾坤,尤其係佢哋嘅名物。呢度嘅蛋牛治即叫即整,裡面係用新鮮牛肉,蛋汁又多,加埋烘底,麵包食起嚟脆身香口,真係無得彈。覺得似曾相識?其實呢度嘅老闆就係文生哥哥,係深水埗新香園(堅記)老闆嘅女婿嚟架,難怪一樣咁足料,咁好味啦!
 

圖: mic_mic_eat@IG
 
SHY Xpress
葵芳美芳街2-14號昌鴻大廈地下9號舖
FB: https://www.facebook.com/SHY-Xpress-1450921115165416/?fref=ts
 
以後去葵芳行街買嘢,就多咗好多選擇,唔使下下去葵涌廣場同人逼餐死先有得食喇!

相關文章:
【香港好去處】西貢輕鬆Hea 十間好味餐廳推介】
【香港好去處】一路向北 上水隱世美食推介
【香港好去處】輕鬆搭地鐵去黃埔 食勻區內美食
【香港好去處】粉嶺十大平民美食
【香港好去處】深入屯門食好西 試盡13間屯門特色小店
【香港好去處】元朗搵食Trip 邊走邊食12個好介紹
【香港好去處】沙田大圍-新舊美食11個好介紹
【香港好去處】走入大埔密密食
【香港好去處】齊齊入荃灣 食盡地膽街坊10大推介
【香港好去處】美孚荔枝角邊走邊食
【香港好去處】走進西灣河太安樓 冷氣叮叮一日遊

EDITED BY CLASSES



新聞資訊