【香港好去處】走入大埔密密食 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2016年06月10日
【香港好去處】走入大埔密密食 10個好介紹
【香港好去處】走入大埔密密食 10個好介紹

大家唔好以為新界區只有荃灣、元朗呢啲地方先有好嘢食,其實喺另一邊嘅大埔都一樣好多嘢。最近小編就跟大埔嘅朋友去搵食,地膽推介得嘅實無「伏」啦!咁以後入大埔,就唔好凈係識去踏單車同燒烤場喇!出發嚕~
 

1. 電影取景餐廳 必食名物
講起大埔,大家一定會諗起好hit 嘅《紅van》 取景餐廳同埋故事主角食嘅蘋果批。蘋果批固然係必食名物啦,外皮香脆鬆化,餡又足料。地膽朋友話,其實呢度嘅雞批同焗豬扒飯都好好味,所以食飯時間都好滿架!

華輝餐廳
圖片來源:dessert_sweeties @IG;Chan Mui E @FB;Antony Mui @FB

華輝餐廳
地址:大埔鄉事會坊17號地舖



2. 唔駛出九龍都食到美味足料煲仔飯
一話食煲仔飯,好多人都會諗起廟街或者香港島,唔通新界真係無人識煮煲仔飯?當然唔係啦!嚟大埔就食到喇!呢度嘅煲仔飯好足料,飯焦金黃色,食落又香又脆,肉汁同油分又滲咗入飯粒,正到令人好感動!豉油係甜嘅,最難得係自家製,所以記得要試!地膽仲話嗰度嘅腸粉都好出名,即叫即拉,超新鮮。啲皮又夠薄,好似透明咁,唔怪得有「玻璃腸粉」呢個大名!

陳漢記
圖片來源:tuisik @IG;thelittlechilipadi @IG

陳漢記
地址:大埔運頭街91B地下



3. 衝出大埔 一隻炸髀走天下
從來都無諗過,喺香港賣炸雞髀都可以賣到開分店。唔好以為小編亂講,呢個喺幾星期前已經成為咗事實。呢間喺大埔賣小食嘅小店,雞髀係生炸,大大隻,成隻素掌咁大,即叫即炸,外皮炸到金黃香脆,咬落去卜卜聲,雞肉嫩滑又多汁,難怪每晚都唔少人排隊去買,仲開埋分店去元朗。除咗生炸雞髀,原來呢度嘅炒腸粉都好受歡迎。炒腸粉有香辣肉碎同豉油肉碎2種,醬料分佈平均,食得辣嘅可以揀香辣肉料,因為辣醬係獨家秘製,食起嚟又夠曬惹味!

三多小食
圖片來源:“九十後”食在北區 @FB;kamikoliu @Openrice

三多小食
地址:大埔北盛街29號瑞安樓地下



4. 隱世味道 重新面世
多年前,大埔有家出名嘅麵店叫「和暢」,但後來結業,唔少人都覺得可惜。怎料地膽今次介紹這家叫「暢和」嘅店,兩者有關係嗎?去暢和,一定唔可以唔試佢嘅醉雞!呢度最特別嘅係「醉雞河粉」,醉雞用咗花雕酒浸,酒香味好濃,雞肉亦夠厚,入口嫩滑;可以配河粉都幾特別,河粉煮得啱啱好,又無爛,入口滑溜溜。同食其他麵相比,感覺好唔同,夠特別。

暢和麵家
圖片來源:Jennylui @Ctrip

暢和麵家
地址:大埔寶湖道3號寶湖花園商場二樓222B號舖
FB:www.facebook.com/kinder925



5. 三十年不變 依然
招牌有「魚蛋」兩字,招牌一定係魚蛋!呢度啲魚蛋自家製,每日都買魚起肉攪碎,經過多個工序同時間,先可以整到一粒粒魚味濃縮又彈牙嘅魚蛋。唔講唔知,原來除咗魚蛋,墨魚丸同雲吞都係自製,難怪每個人食完都大讚,阿媽會帶埋阿仔去食,搬走咗嘅都會專程去買魚蛋呢。

廣成魚蛋粉
圖片來源:Foot2food @IG

廣成魚蛋粉
地址:大埔廣福邨廣惠樓側冬菇亭3號



6. 新界「群記牛腩」代表
唔知點解,柴灣同灣仔嘅群記,都係以「牛腩」作招徠。無獨有偶,大埔呢間日日排長龍食牛腩嘅麵店又係叫「群記」。唔通「群記」同「牛」係有特別關係?唔理佢哋有無關係,對大家嚟講,最緊要係好味。呢間群記雖然規矩多多,不過食物質素有保證,老闆會因為牛肉唔夠靚而休息。牛腩嘅湯底每日用至少30斤牛骨去煲過夜,每一口湯盡是精華。牛腩有唔同部位可揀,爽腩、坑腩、蝴蝶腩、連極少有嘅牛面珠同牛鞭都有,真係好難得。難怪牛腩界有流傳住「中環有九記,大埔有群記」呢句名言。

群記清湯腩
圖片來源:delicioussoul @IG

群記清湯腩
地址:大埔墟大明里26號地下



7. 冬菇亭大排檔 分店開到去北京?
講你都唔信,喺香港隱世到分店都無開嘅冬菇亭大排檔,竟然喺北京搵到其蹤影?嘉華咖啡小食呢度嘅鹽焗雞飯真係引死人,望到張相已經口水直流。雞肉煮得啱啱好,入口嫩滑,雞皮又爽;味道有沙薑嘅鹹香,加上係炒飯底,真係唔食唔得喇!而呢度嘅奶茶都值得試,茶同奶比例恰當,飲落香滑,之後茶味餘韻悠長,是水準之作!

嘉華咖啡小食
圖片來源:imafoodlovah @IG

嘉華咖啡小食
地址:大埔廣福村廣崇樓側熟食亭5號



8. 街市冰室都有一口多士食
平時要喺西餐廳先食到嘅粒粒多士,竟然喺呢間藏身於大埔寶湖道街市嘅一間冰室都可以食到!呢個多士唔係普通多士,而係「一口多士」!一口多士有3款口味,分別為蜜糖、花生奶醬同埋杏仁朱古力。多士約2吋厚,麵包切粒之後再烘,之後逐粒疊起先上碟。多士烤得金黃,就連承托嘅麵包邊都烘得香脆!淋喺面嘅朱古力醬混入咗牛奶同忌廉,一啖一粒,外脆內軟又香口,連飲品套餐都只係廿幾蚊!唔係唔食嘛?酥炸魷魚鬚餐都好吸引!

珞桐冰室

珞桐冰室
地址:大埔寶湖道3號寶湖道街市P2舖

更多介紹:冰室一口多士 驚現街市!



9. 網上著名食評家兼地膽力推 大埔最好食西多士
西多士係唔少香港人嘅下午茶嘅選擇,嚟到大埔,就梗係要去試下網上著名食評家兼地膽都力推嘅西多士啦。據講呢度嘅西多士整之前吸滿蛋汁,之後就慢火煎15分鐘到金黃色,上碟之後,就切為9格,一口一粒,真係好貼心。你可以按個人喜好配糖漿或煉奶食,如果你想食,就記得早啲去喇,有時未到3點就已經賣曬!

李記咖啡奶茶
圖片來源:himmy_food @IG

李記咖啡奶茶
地址:大埔鄉事會街8號大埔墟街市及熟食中心2樓CFS33舖



10. 馳名超厚炸豬扒上海麵
雖然豬扒喺港人口中有貶義,但係當講起「炸豬扒」嘅時候,唔少人都會流口水,尤其係見到呢間上海麵店嘅炸豬扒。大埔街市嘅炸豬扒好出名,因為唔止大塊,又夠厚;每塒由人手揼鬆,再沾上炸漿,落鑊即叫即炸。外皮炸至金黃鬆脆,食落味道好,有口感之餘又多汁!真係食到停唔到口!炸雞翼都受唔少客人歡迎!

世記上海麵店
圖片來源:Siu King Kin @FB

熟食中心嘅另一個角落,你會再次見到炸豬扒上海麵嘅蹤跡。一啲都唔出奇,因為東記同世記其實係兄弟檔,東記係哥哥主理,而世記就由弟弟主理,兩店賣嘅麵不盡相同,但味道或有些微分別,因此各有支持者。

東記上海麵
圖片來源:Leung FunnyFunny @FB

世記上海麵店
地址:大埔鄉事會街8號大埔墟街市及熟食中心2樓CSF38舖

東記上海麵
地址:大埔鄉事會街8號大埔墟街市及熟食中心2樓CSF27舖



大埔又點止10間美食丫?不過時間有限,地膽帶住小編就行住咁多間先啦。不過,小編出發之前,就做咗資料搜集,知道以下呢間麵店係好嘢!私人醒多你一間啦!

私心推介 70年歷史嘅雲吞老麵店
係咪無諗過有間可能老過阿媽嘅雲吞麵店呢?呢間麵店之可以一直站住陣腳,一定有佢嘅實力。呢度最出名嘅就係雲吞麵,雲吞同麵兩者都做得好。唔單止自製雲吞皮,仲用鴨蛋自製麵條,真係夠曬誠意!雲吞嘅餡仲有獨家黃金比例,豬肉三分肥七分瘦就最完美,再包埋生猛爽滑嘅淡水蝦入去,真係無敵!

平記麵家
圖片來源:eatndrink @IG

平記麵家
大埔鄉事會街8號大埔墟街市及熟食中心2樓


相關文章:
【香港好去處 沙田大圍 】新舊美食11個好介紹
【香港好去處】 美孚荔枝角邊走邊食
香港十大最好味雲吞麵
香港十大最好味米線店

Edited by CLASSES



新聞資訊