【香港好去處】元朗搵食Trip-邊走邊食12個好介紹 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2016年07月05日
【香港好去處】元朗搵食Trip 邊走邊食12個好介紹
【香港好去處】元朗搵食Trip 邊走邊食12個好介紹

小編雖然唔係元朗人,但都知嗰區有好多好嘢食!美食集中地嘅元朗唔係凈係得華嫂架!小編每次去到諗食乜,都會心大心細,想試呢間,但又想食嗰間……今次要喺芸芸食肆裡面揀十二間介紹畀大家,真係一啲都唔容易!你哋記得要畀多啲心機睇喇!


1. 網民撐爆!全港最好味雲吞!
之前雲吞麵抬頭,唔少人都想食返碗。你又知唔知邊間係最好味呢?

好到底麵家
圖片來源:heynga_thn @IG

呢間位於元朗嘅麵店就有網民熱推,仲話,如果要揀全港十大最好味雲吞麵,一定唔可以無佢?以下呢段就係網民心聲喇!


圖片截取自《香港十大最好味雲吞麵》


好到底麵家
地址:元朗阜財街67號地舖
FB:www.facebook.com/HTTNS


立即重溫:香港十大最好味雲吞麵



2. 隱世高水準牛腩店
唔知幾時開始,呢間粉麵店就闖出名堂!附近街坊試完呢度嘅牛腩都讚口不絕,食過翻尋味!牛腩肉質稔滑又入味。雖然係清湯底,但味道好濃,我想連湯都飲埋!好多人都食魚片頭同豬手,問完先知原來呢2樣都係一流架!


傳麵世家
圖片來源:kfchow01

傳麵世家
地址:元朗合財街26-28號興隆樓



3. 還是家常小菜好
有時雖然出街食比較多選擇,但始終懷念屋企煮嘅餸。呢間喺屏山某個村落嘅食肆,就好知大家嘅心意,供應嘅食物就正正係甚有「媽媽的味道」嘅家常小菜,好似肉餅飯。依度嘅肉餅飯一啲都唔簡單,肉餅升曬呢,有芒果肉餅、榴槤肉餅,芝士迷無法抗拒嘅六重芝士肉餅!今次真係叫埋阿媽一齊食至得喇!

屏山老地方
圖片來源:屏山老地方Facebook Page

屏山老地方
地址:元朗屏山塘坊村32-33號地下
FB:www.facebook.com/lodteifong



4. 豬扒醉雞齊齊食
早前網上流傳呢間食肆嘅食物圖,個個見到都LIKE爆,仲要個個都分享,話要一齊去食。咁吸引,小編梗係要去朝聖啦。果然係正嘢,醉雞用新鮮雞,吸曬啲酒味,未食都聞到酒香,肉質嫩滑,雞皮爽口彈牙。配河粉食真係好特別,而且好夾,好好味。而另一樣名物就係豬扒,厚切但一啲都唔乾身,又夠入味,肉腍亦多汁!加多塊丫,老闆!



爽爽麵店
地址:元朗鳳攸北街5號順豐大廈地下5號舖



5. 區內必試西餐廳
唔好以為元朗呢區無咩靚西餐,其實呢度深藏不露。唔少人都話Chef’s Stage Kitchen CP 值高,食物同價錢都好合理,環境又好,無論係一大班人生日聚會還是2個人食餐好,都好啱要求。牛扒選料好,煮得啱要求,又夠大塊;食起嚟肉質嫩又唔韌,而且juicy,牛魔王一定好滿足!

Chefs-Stage-Kitchen
圖片來源:hitammy @IG

Chef’s Stage Kitchen
地址:元朗西菁街23號富達廣場52-55號地舖
FB:www.facebook.com/ChefsStageKitchen



6. 第2代小野二郎
小野二神係邊個?佢就係壽司之神喇!老闆係呢位日本寿司の神小野二郎嘅fans,因為受到佢嘅啟發,所以用紀錄片嘅名開咗呢間舖。老闆雖然唔係真嘅壽司之神,但都一樣專業。舖頭細細,人龍老是常出現。老闆果然係「神」,整壽司就係用時令食材,咩嘢啱時候就用嚟即整壽司,夠新鮮!去到食咩就由師傅發板,呢啲服務先係神級嘛!

壽司神
圖片來源:daisy0v0 @IG、oilming @IG

寿司の神
地址:元朗馬田路安寧大廈20-30B七號地舖



7. 爆喇!流喇!千層肉醬多士
本來平平無奇嘅屋苑快餐小店,因為一個千層多士而出名,吸引唔少為食友專程去食。究竟呢個千層多士有咩咁勁?一睇相你就明啦!多士有普通版同加碼版,材料超豐富,有肉醬、芝士、蘑菇、蕃茄同生菜,所有嘢配合得好好,味道超夾!芝士同肉醬多到爆,爆到流,真係引死人,食嗰時真係要小心啲!

輝記美食
圖片來源:hkfoodiemeow @IG

輝記美食
地址:元朗馬田路怡豐花園A座地舖


港島區都有爆醬多士:【香港好去處】等40分鐘都要食的早餐



8. 大過塊臉炸雞髀
無敵大雞髀果然名不虛傳,因為呢隻雞髀真係可以大過你塊臉。雞髀大大隻,每隻超過10安士重!醃到入味之後生炸,食落表皮奇脆無比,雞髀肉嫩滑又多汁!雖然呢度最出名係無敵大雞髀,不過唔少人都話嗰度啲焗飯同豬扒飯都好好味,有機會真係要試下!冰室連台北都開咗分店,香港人嘅你又點可以唔試?


圖片來源:dalisiutsz @IG

萬芳冰室
地址:元朗建德街35-55號時景花園地下10號舖
FB:www.facebook.com/manfongcafe



9. 零負評 堅.高水準甜品店
唔知你有無發現,元朗嘅甜品店特別多?不過唔係間間都出名,出咗名又站得住腳。而呢間甜品專門店就由幾年前開業至今都一樣咁旺場,食物依然有質素,就連某食評網(雖然公信力受疑)都可以零負評,真係好少有,好難得。甜品未食,但見到個樣,都已經感受到師傅嘅心機,用心製作都好重要!呢個「大糖鈕特選拼盤」將唔同嘅甜品拼喺一齊,整到成幅畫咁,真係呃到唔少LIKE!最緊要係,睇得之餘又食得嘛!下次入元朗,一定要再去!

小糖鈕甜品專門店
圖片來源:小糖鈕甜品專門店 Facebook Page

小糖鈕甜品專門店
地址:元朗裕榮徑11號地下10號舖
FB:www.facebook.com/Sweet.button.desserts



10. 芒果乜乜乜 連炒冰都得
夏天芒果最啱時候,芒果糯米糍、西米露、腸粉、布甸呀……呢啲都食厭咗,咁炒冰呢,食過未?芒果都可以炒冰?係呀!元朗一間甜品店就有得食芒果炒冰、榴槤炒冰……芒果炒冰睇上去以為係蛋糕,點知原來係一大塊冰!食落去芒果味濃,好清新!加上芒果當造,夠曬甜!凍冰冰,食幾啖,個人醒神曬!咁大件,記得同friend一齊食呀!隔離食緊芒果卷,都好吸引!

甜心鮮果園
圖片來源:laylaychan @IG、roytszchung @IG

甜心鮮果園
地址:元朗安寧路紫荊樓2期138號地下



11. 新奇亂溝創意雞蛋仔
估唔到,平平無奇嘅雞蛋仔由香港街頭小食,之前搖身一變,竟然可以喺外面出沒,加埋雪糕,成為新一代呃LIKE 美食ICON!最最最令人意想不到嘅係,元朗一間店舖創意無限,唔只玩變味,仲玩亂溝!雞蛋仔有4款味揀,又可以加餡,仲有9款餡料揀,朱古力、芝士同紅豆蓉呢啲已經好普通,玩大啲嘅就有栗子、M&M’s、OREO、蜜糖同紫薯!有人整彩虹雞蛋仔呢!想試勻知道邊個最好味,慢~慢~啦~

Sumore
圖片來源:instafoodhunter @IG

森 Sumore
地址:元朗又新街38號恆富大廈地下11c號舖



12. 一試難忘隱世煎餃子
小編對煎餃子情有獨鍾,有時都會買啲餃子返屋企自己煎。今次入元朗聽到地膽話有間隱世但好好味嘅煎餃子(韭菜豬肉餡,正!),就梗係唔會錯過啦!餃子即包即煎,超新鮮!餃子皮薄餡又多,啲皮真係可以用薄過張紙嚟形容,好似透明咁架!新鮮煎好雖然熱辣辣,但「香口嘢」就係要即食先開心嘛!

屏山鄧氏宗祠小食檔
圖片來源:food_cat_lover @IG

屏山鄧氏宗祠小食檔
地址:元朗屏山坑頭村屏山鄧氏宗祠外

咁好美食,係咪睇見都想食呢?快啲去啦,元朗唔止咁少好嘢食,小編我等緊你哋報料,下次再去食好西架!

更多好去處:
【香港好去處】沙田大圍-新舊美食11個好介紹
【香港好去處】走進西灣河 太安樓 冷氣叮叮一日遊
【香港好去處】上環10間必食小店
【香港好去處】走入大埔密密食
【香港好去處】美孚荔枝角邊走邊食

Edited by CLASSES



新聞資訊