【香港好去處】一路向北-上水隱世美食推介 - 品味新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 品味
  • >
日期:2016年10月20日
【香港好去處】一路向北 上水隱世美食推介
【香港好去處】一路向北 上水隱世美食推介
去完粉嶺,梗係要帶大家探埋上水呢個閨密啦!雖然上水同邊境只有咫尺距離,但其實都有好多啱香港人口味嘅美食架,唔講,出發去食喇!
 
1. 地膽推介:私伙泰國菜

呢間泰國菜唔係好多人知,絕對係地膽而又鍾意食泰國嘢嘅人先會知架。有咩咁特別?因為餐廳唔止位置隱秘,藏於閣樓間,即使平時經過,但唔細心留意嘅話,都唔會發現。餐廳由泰國人主理,食物有風味,夠曬正宗。好多菜式都跟足傳統。加入唔同香料製作,令人回味。

 

圖:iamroyceb@IG
 
碧姐私房菜
上水石湖墟新祥街22號閣樓
 
2. 隱世茶座 飲抹茶紅豆冰嘆煎雞尾包

又隱世?係呀,小編唔講大話。去呢度食嘢嘅通常都係行山或者踩單車嘅人,茶座係佢哋中途休息嘅落腳點。雖然似乎係獨市生意,但茶座嘅出品一啲都唔馬虎。坐低飲嘢食包唔少得,不過喺呢個茶座就要嘆得另類啲。因為呢度有呃LIKE指度爆燈嘅「抹茶紅豆冰」同埋極少有嘅「煎雞尾包」!足料豬扒包一樣值得試,同澳門食嘅一樣滋味!望下隔離,竟然有燒乳鴿?好想食呀!聽講Lunch時間仲有「餐肉七色飯」,除咗有午餐肉,仲有火腿、煙肉、魚片、煎蛋、腸仔同埋雞翼,超豐富!
 




圖:Yuen PoLo@FB、陸月妹@OP、Yankee Yan@FB及暴食小公主@OP

榮昌茶座
上水粉錦公路蓮塘尾村1號(近哥爾夫球場)
 
3. 上水閨密情侶好聚地

Café 以「貓」做主題,但入到去唔見有貓?因為店主都將啲貓畫喺牆上。呢度予人一種童話嘅感覺,加埋一啲歐陸裝潢陳設嘅元素,同一般café 好唔同!牆上貓貓圖案同其他繪圖,真係令人好易投入到2個人嘅世界。情侶去拍拖又得,閨密一齊去都得……啲蛋糕仲要好靚,款款都係自家製,出面食唔到!



 




Cafe Je T'aime
上水新功街7號地下
FB: https://www.facebook.com/24march2012/?fref=ts
 
4. 堅抵食$12豆腐花放題

$12蚊可以任食?係呀,你無睇錯。平時喺市區,食一碗豆腐花要$12,你都會照俾,但呢度$12就可以任食。$12放題唔只可以食豆腐花,仲可以飲豆漿,2樣一齊都得!真係好鬼抵。豆腐花可以自己鍾意加幾多糖都得,夠香甜又滑口,真係食得好爽!
 


圖:Innox Innox@FB
 
鴻淘士多‧羅太豆花
上水河上鄉快景路
 
5. 全港首創 椒鹽太陽蛋雞蛋仔

雞蛋仔款式愈來愈多,流心餡、配雪糕、配打邊爐食都有,但你又諗唔諗到雞蛋仔會「蛋中有蛋」呢?呢間「潮食」真係夠In,自創「椒鹽太陽蛋雞蛋仔」。雞蛋食喺倒入蛋漿之後即刻加入去,之後就用雞蛋仔機烘熟,期間會加埋自製嘅椒鹽粉,散發住陣陣鹹香味。雞蛋仔大大粒,真係見到都流口水。咬開雞蛋仔,就會見到荷包蛋嘅蹤影,有蛋白同蛋黃兩種風味,好特別!
 


圖:Cyinki@OP
 
潮食
上水智昌路8號順欣花園地下5C號舖
 
6. 上水區必食腸粉

唔知點解,去咗咁多區,小編發現每區都有街坊最捧場嘅「腸粉」,嚟到上水都唔例外。明記嘅腸粉好多人買,有人仲話呢間同大圍坤記及深水埗合益泰可以齊名,因為一樣咁滑。腸粉的確入口滑溜,皮厚薄恰到好處,大小亦均勻,每條腸粉都差唔多長。不過網上唔少人話服務態度一般,大家要自己「執生」喇!
 

 
圖:gloriakei@IG
 
明記腸粉
上水新康街11號地下
 
7. 足料真日本拉麵

上水嘅山下拉麵於2012年開業,而元朗嘅山下麵家亦於2015年開業!店主係日本人,風味更似地道日本拉麵。豬骨湯底熬足10小時,惹味濃稠;叉燒帶焦而入口軟稔。令人意想不到嘅係,一碗拉麵竟然有2隻溏心蛋,真係好重本,夠足料呀!

 

圖:Kylo Ren@OP
 
麵家山下
上水新康街63號地下D3-D4號舖
 
8. 吸精冰山紅豆冰

去冰室,梗係去食冰啦(笑)!港式冰室其實同茶記相似,入到去都係食茶記嘢。不過,去到廣成冰室,一定要飲嘅就係「冰」。呢座冰好有睇頭,因為高到有個「山峰」,講緊嘅其實係紅豆冰。呢杯紅豆冰啲冰堆到座山咁高,仲要有個「尖」。下面嘅係紅豆同奶。紅豆好稔,奶味恰到好處。雖然好多冰,不過因為係冰山,無咁易溶,所以奶味更持久,無咁快變淡。
 


圖:wanalvin @IG
 
廣成冰室
上水石湖墟新成路10號
 
9. 令人回味的牛腩

珍苑係間老麵店,雖然經歷過結業重開,但街坊一樣支持。因為嗰度嘅牛腩令人回味,入味之餘,口感又好。就算唔揀牛腩,但揀腩汁一樣可以感受到當中嘅精粹。除咗牛腩,滷水雞翼同蠔油冬菇同樣牽動住唔少食客嘅胃口呢!
 


圖:SandyKaYiLiu 及Summer Hell@FB
 
珍苑麵家
上水馬會道148號B舖
 
10. 北區車仔麵代表
 
車仔麵從來都係平快之選,同腸粉一樣,每區總有一間特別好味。成記就係上水區嘅代表。車仔餸唔需要幾十款選擇,但有得揀之餘,更加重要嘅係有自己嘅拿手好餸。成記最正嘅就係滷水蛋同雞翼!蛋同雞翼都滷得入味,但唔會過鹹,食落仲聞到滷水料嘅香味!

 

圖:犁牛@FB
 
成記麵家
上水新祥街13號地下
 
上水粉嶺都去咗,下次帶大家去邊呢?咁就要記得繼續留意喇!

重溫:
【香港好去處】輕鬆搭地鐵去黃埔 食勻區內美食
【香港好去處】粉嶺十大平民美食
【香港好去處】深入屯門食好西 試盡13間屯門特色小店
【香港好去處】元朗搵食Trip 邊走邊食12個好介紹
【香港好去處】沙田大圍-新舊美食11個好介紹
【香港好去處】走入大埔密密食
【香港好去處】齊齊入荃灣 食盡地膽街坊10大推介
【香港好去處】美孚荔枝角邊走邊食
【香港好去處】走進西灣河太安樓 冷氣叮叮一日遊
【香港好去處】上環10間必食小店


 EDITED BY CLASSES



新聞資訊