熱氣應飲邊款涼茶?教你分清各種涼茶大不同! - 健康新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 健康
  • >
日期:2017年08月03日
熱氣應飲邊款涼茶?教你分清各種涼茶大不同!
熱氣應飲邊款涼茶?教你分清各種涼茶大不同!

有啲熱氣,諗住飲杯廿四味實冇死?錯啦!涼茶唔係個個啱飲,唔好亂咁點呀!一齊睇吓應該點揀涼茶啦!



去到涼茶鋪門前,見到幾乎種種涼茶都寫住清熱、袪火、袪濕、解毒幾隻字,好似隻隻都啱自己飲咁,到底涼茶有咩分別,唔同情況又應該點揀呢?


1.      廿四味
首先講吓最多人飲嘅廿四味。其實廿四味好涼,藥性亦較高,唔適合日日飲用。廿四味可以清熱解毒,仲可以幫助消化同止痛。如果生痱滋、便祕、食濟咗、有熱痰,都可以飲一杯。
 

 
2.      五花茶
五花茶帶有微涼,性質溫和,有祛濕、散風同消炎作用,最啱濕氣重人士飲用。如果你係雨天時手腳關節位會濕痛、經常食生冷食、飲凍飲嘅人,就可以飲多幾杯啦!另外,如果酒後不適、喉嚨痛、咳嗽,都可以飲返一杯減輕症狀。
 
3.      袪濕茶
顧名思義,袪濕茶主要真係用嚟袪濕,所以同五花茶一樣,適合濕氣重人士飲用。但袪濕茶比起五花茶較苦口,如果大家飲完唔鍾意有苦味留於口中,小編建議飲五花茶。
 
4.      夏枯草
夏枯草都係屬於溫和涼茶,有時會同五花茶擺埋一齊飲用。但夏枯草有另一個功效,就係降低肝火。如果你心煩氣燥,未必要食太太口服液住,飲返啖夏枯草先啦!
 

 
5.      感冒茶
感冒茶唔係感冒先飲!其實感冒茶只可以預防傷風,同埋對初期傷風、風寒、風熱有用,可以舒緩頭暈同流鼻水嘅症狀,但對病毒入侵人體嘅感冒係冇用架!
 
體質濕熱嘅人,可以飲多啲涼茶都冇問題,但寒涼體質嘅人就唔啱啦!唔知自己咩體質?如果你飲完涼茶會胃痛、肚屙、或者手腳凍冰冰,大有可能寒涼體質,就要避開飲涼茶啦!另外,小朋友、老人家、懷孕或正值月經期嘅女仔都唔適合飲用涼茶架!
 
圖片來源:Boldsky.com、The Soup Queen、NileGuide
 
快啲話俾身邊嘅朋友知,以後唔好傻更更亂飲涼茶,要對症下藥先有用架!
 
相關文章:
飲湯一定好健康?原來湯水都有健康陷阱!
胃痛未必只係小事!留意潰瘍四大先兆

EDITED BY CLASSES



新聞資訊