夏天床底好易有書蟲!教你三招趕走書蟲! - 健康新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 健康
  • >
日期:2017年08月16日
夏天床底好易有書蟲!教你三招趕走書蟲!
夏天床底好易有書蟲!教你三招趕走書蟲!

你以為小編講緊一小粒黑點嘅書蟲?非也!係大大隻仲有鬚嘅書蟲呀!呢種害蟲最鍾意收收埋埋,平時好難見到佢,但夜晚就會出沒喺陰暗潮濕處,衣櫃、書櫃、甚至床底都會見到佢!唔想書蟲喺你瞓覺時爬嚟爬去?即刻睇以下三招!
 

 
書蟲有勁多名,蠹魚、白魚、壁魚、赤木蟲、衣蟲都係佢,而香港人普遍會叫佢書蟲或衣蟲,只因佢好鍾意食紙張同衣衫!
 
食書食衫都算,最重要嘅係!!佢個樣真係好醜,成隻異界生物咁,令小編一直諗起伊藤潤二嘅《魚》……大佬,點忍呀?快啲消滅佢啦!
 

 
問題係,書蟲身體佈滿鱗片,所以有時拍都拍唔死。呢種書蟲仲會脫殼,成世蟲會脫足幾次,就算生擒都唔知到底捉到個空殼定係捉到本體….(哭)就等小編教你最有效嘅消滅方法啦~
 
1.      準備臭丸
 

 
呢個可謂係最懶人嘅方法,就係喺每個書蟲可能出現嘅地方都放一袋臭丸,包括書櫃、廚櫃、衣櫃、梳發底、床底、床頭、雪櫃底等等等等。
 
2.      混合硼砂同砂糖
 


書蟲非常嗜糖,所以只要將砂糖同硼砂以1:1比例混合,放喺陰暗位,就可以毒死佢哋啦。如果你搵唔到硼砂,用石膏粉、氯化銨溶液都一樣可以。


3.      萬能陽光
 

 
書蟲怕光,所以只要將櫥櫃騰空,將衣衫同家具都放喺太陽下曬一個晏晝,再喺櫃噴啲硼酸,咁衣蟲自然頂唔住搬屋架啦~
 
以上三招,小編會一次過做哂,預防同治療都一次過搞掂,咁就冇後顧之憂啦!

圖片來源:Saxifraga、1688、ccjxhg、Home Genius

相關文章:
夏天必睇防蠓大法!三招趕走超痕小黑蚊!
夏天小心毀容!有種蚊蟲原來不可拍死!教你完美閃避隱翅蟲!

EDITED BY CLASSES



新聞資訊