新手情侶拜年順序必學8式 - 進修新聞 | CLASSES 香港學習資訊平台

CLASSES - Release Your Potential
  • Classmate 登錄
  • 訂閱優惠
  • Classes Hong Kong Facebook

  • 首頁
  • >
  • 新聞
  • >
  • 進修
  • >
日期:2016年02月04日
【新手情侶拜年順序必學8式】
【新手情侶拜年順序必學8式】
如果今年農曆新年前成功「脫毒」,又咁好彩同男朋友開始咗一排,而佢又對你認真嘅話,年中一次「拜會」下 Auntie、Uncle 都應該係一件走唔甩嘅事,啲日子有陣時就係橋到你冇人信,撞到正新年,即時倍加緊張。如果你認定埋呢個係 The One 的話,包你更加騰雞。不過,姐妹們咪亂!想留低好印象?Come on, take it easy!輕輕鬆鬆 step by step 跟住做包合格過到海!

Step 1:事前打定底
唔係事必要你講,男朋友唔主動同你講,你都要問定佢,「查家宅」是必須的,查得越撤底對你越有利!首先,你可以從男朋友打探到佢屋企人嘅喜好同埋棹忌,原來佢爸爸係肝癌死嘅,你走去買支酒俾人哋呀媽…又或者人哋個妹畢咗業,你就祝人學業進步咁唔岩 channel!即係呢...就算唔識討好人都起碼唔好討人哋厭先啦,會扣分架!

Step 2:預先揀好禮,唔好淨帶梳「蕉」
有教養嘅孩子新年流流真係唔會兩手空空走去拜年,就算係好 friend 嘅朋友,你都應該會買番盒賀年禮品「天神跌落凡間嘅朱古力」俾佢。更何況係你有機會同你成家立室嘅 The One 家庭喎!所以之前向你男朋友打探嘅野係有用架!起碼,你會知道男朋友媽咪原來好憎食「天神」嘅朱古力,反而係鍾意食日本佐賀縣的白色士多啤梨,咁你就要識做喇!咁細心,你仲唔係好女仔?記住,你對佢哋口味嘅了解程度如何,往後的日子將如何!


圖片來源:givegift.com.hk

Step 3:著衫唔好著到黑沉沉或者太複雜
雖知你著衫好有格調,唔係黑就白至夠型,但係拜年就真係唔好全黑,就算人哋唔迷信都唔係咁好啦!第一印象通常好深刻,你都唔想人家覺得你死氣沉沉掛?冇人叫你要著到花枝招展咁,襯番啲鮮色少少嘅配件,例如:頸巾或者係袋都已經 ok。著得鮮色啲,個人都醒神、精靈啲啦,望落飽滿啲,老人家又會鍾意啲,加分架!同埋,通常去到人屋企都要除鞋,唔想造成任何麻煩或不便,最好都係唔好著啲要綁或者好難著嘅鞋去,著埋襪仔就更加有安全感啦!

Step 4:入屋叫人,諗定幾個百搭祝賀台詞
有家教嘅好孩子應該細細個就深明「入廟拜神,入屋叫人」呢個道理。尤其新年入屋第一句百分百肯定會係「恭喜發財」!Follow by 就會係「 Uncle、Auntie,第一次見面,少少心意。」然後送上賀禮,之後接住落就係一連串對住唔同人總有一句百分百岩用嘅精景祝福語,呢啲真係要預早度定,仲要熟讀,唔係一定會開口夾著脷,小編試過啞咗幾秒,然後腦袋一片空白,講咗句行到不能再行嘅「心想事成」紅都面晒作結。大家早啲 mark 定幾句精讀下喇,又或者自創啲不失大體嘅祝賀說話都唔錯架!

老一輩:身體健康、龍馬精神、吉祥如意
長輩:大吉大利、財源廣進、萬事大吉
平輩:青春常駐(只限女士)、年年有餘、橫財就手、新春大吉
後輩:學業進步、笑口常開、快樂連連
萬用:恭喜發財、身體健康、事事如意、新年快樂
創意:靚上加靚、全年富貴、收錢收到手軟


圖片來源:english.sina.com

Step 5:唔好掛住㩒電話,專心啲聽人講野
記住由你入屋拜年開始,人哋幾十隻眼都係無定向咁觀察緊你,如果一個唔專心唔聽人講野,掛住禁電話,就算只得一秒,人哋都有權覺得你唔尊重,好無禮貌,扣晒分架!忍一忍啦麻煩各位,雖然好難同埋真係好悶!

Step 6:拎實隻杯咪打爛
通常一入屋主人家都會沖過杯熱茶過你飲吓嘅,切記!就算好熱都必須拎實,咪打爛或者倒瀉呀!雖則「落地開花富貴榮華」,新年流流喺自己屋企打爛野都會俾呀媽鬧到狗血淋頭啦,人哋表面唔介意,但係,呢啲始終都係小心洗得萬年船,仲要記得有禮貌講唔該呀!

Step 7:保持笑容,主動交流
笑多啲,除咗有助運程,仲可以融化人嘅內心同改變一個人對你嘅態度,就算佢屋企人好正經,不苟言笑都好,只要你笑多啲,呢種正能量其實係會感染到佢哋架!唔洗太介懷佢哋嘅面口。有時試下主動去打開話匣子,亦可以顯出你嘅誠意,一次生、兩次熟,你就當好似識多個朋友咁,好快就好好傾架喇,不過適可宜止,唔好太過火,講埋啲高危 topic,例如:政府、宗教。(當然,事前向男朋友了解定佢屋企人嘅事係絕對可以令你安心啲!)


圖片來源:pinterest.com

Step 8:俾面捧場,放棄減肥一日

Last but not least,通常拜年嘅最後一個動作就係食晚飯,你可以放一萬個心,因為 auntie 實好好客咁準備咗好多好野食過你!分分鐘十餸一湯,白飯任裝,連埋甜品同生果,唔夠仲有埋蘿蔔糕、年糕、煎堆等住你添!你就算真係食唔晒,咪裝少啲飯,餸就最好樣樣都食啲,試晒人哋啲心意先夠誠意,當然食完一樣就讚下人就最乖最俾面啦!


圖片來源:imoney.my/articles


Edited by CLASSES

 


新聞資訊